2 Al masanil wan chejbꞌanile tiꞌ tet ebꞌ ja wet Israelal:

Yal cꞌal mactxequel junoj jex jaex tiꞌ ma junoj txꞌoj conobꞌal caan ecꞌ je xol,

ta tol chi yakꞌ junoj yuninal yin xaambꞌal tet jun comon dios chi yij Moloc,

sowalil chi kꞌojchꞌennele cam jun ánima tuꞌ yu ebꞌ conobꞌ.

3 Ey sjowal jin cꞌul yibꞌan jun ánima chi yun jaxca tuꞌ,

yuxan oj jin qꞌueyel xol ebꞌ yet conobꞌ,

yutol chi yetnentoj snail jin calubꞌal ebꞌ cꞌal jin yintajnen el ebꞌ,

yutol chi yakꞌ yuninal ebꞌ yin xaambꞌal tet jun comon dios chi yij Moloc.

4 Ta tol jaꞌ ebꞌ yet conobꞌ tuꞌ,

tucꞌal chi yiloc ebꞌ tzet chi swaꞌne jun mactxequel tuꞌ,

cꞌam chi smakꞌ cam ebꞌ,

5 jain xa oj wakꞌ sowalil tet jun ánima tuꞌ,

tet yistil,

tet yuninal,

cꞌal tet masanil ebꞌ caan yetoj yul sna,

catuꞌ oj wakꞌon qꞌueyel xol yet conobꞌ,

yetoj cꞌal ebꞌ chi oc eyilal tet jun comon dios chi yij Moloc.

6 Ta ey mactxequel chi skꞌanle sbꞌa tet ebꞌ atxum,

cꞌal tet ebꞌ chi awten spixan ebꞌ camom,

catuꞌ chi sjijen tzet chi yal ebꞌ tuꞌ,

jain xa oj wakꞌ sowalil tet ebꞌ,

catuꞌ oj jin qꞌueyon el ebꞌ yul sconobꞌ.

7 Junelne che yaoc je bꞌa yul jin kꞌabꞌ,

watxꞌ cꞌal che yute je bꞌa jin sattaj,

yutol jain Dios jin tiꞌ,

je Diosal jin.

8 Jaꞌ ojabꞌ wal jin chejbꞌanil che bꞌeybꞌalne catuꞌ che jijeni,

yutol jain tiꞌ jix jex jin sicꞌ eltej yu je yoc wetoj.

9 Yal cꞌal mactxequel chi bꞌawa yin smam xutx,

jaꞌ jun tuꞌ sowalil chi cami,

jacꞌal oc chi locontej camich tuꞌ yibꞌan.

10 Ta ey mactxequel chi mulwi yetoj yistil junoj yet winajil,

sowalil chi cam jun winaj tuꞌ yetoj cꞌal jun ix ix tuꞌ.

11 Ta ey mactxequel chi mulwi yetoj yistil smam,

chi yiꞌel sqꞌuixwil smam tuꞌ.

Jaꞌ jun tuꞌ sowalil chi cami,

catuꞌ chi cam cꞌal pax ix ix tuꞌ,

jacꞌal oc ebꞌ chi yiꞌtej camich yibꞌan.

12 Ta ey mactxequel chi mulwi yetoj yalibꞌ,

sowalil chi cam ebꞌ scawanil,

yutol yel xacꞌal pena tzet chi yun ebꞌ tuꞌ,

jacꞌal oc ebꞌ chi yiꞌtej camich yibꞌan.

13 Ta ey junoj winaj chi yun amulal yetoj yet winajil,

jaxca chi yun yetoj junoj ix ix,

sowalil chi cam ebꞌ scawanil.

Jacꞌal oc ebꞌ chi yiꞌtej camich yibꞌan,

yutol jaꞌ tzet chi yun ebꞌ tuꞌ yel xacꞌal yaabꞌetaj yul jin sat.

14 Ta ey mactxequel chi iꞌon junoj ix ix,

catuꞌ chi iꞌle pax ix txutxe tuꞌ yu naj,

jaꞌ jun tuꞌ caw wal pena xacꞌal tzet chi yun ebꞌ tuꞌ,

yuxan jaꞌ jun winaj tuꞌ,

yetoj cꞌal wan ix tuꞌ chi nusle tzꞌaꞌ ebꞌ yoxwanil.

Yet watxꞌ cꞌamxa bꞌey oj bꞌina jun bꞌeybꞌale tuꞌ je xol.

15 Ta ey junoj winaj chi mulwi yetoj junoj noꞌ noꞌ,

jaꞌ jun winaj tuꞌ sowalil chi cami,

catuꞌ chi cam cꞌal pax noꞌ noꞌ tuꞌ.

16 Ta ey junoj ix ix chi mulwi yetoj junoj noꞌ noꞌ,

jaꞌ jun ix tuꞌ sowalil chi cami,

catuꞌ chi cam cꞌal pax jun noꞌ noꞌ tuꞌ.

Jacꞌal oc chi yiꞌtej camich yibꞌan.

17 Ta ey junoj chi yiꞌ yanabꞌ yistiloj,

yanabꞌ yu smam,

ma yanabꞌ yu xutx,

ta jaꞌ ebꞌ tuꞌ chi smitxꞌle oc sbꞌa,

sattaj wal masanil ebꞌ conobꞌ chi qꞌueyle el ebꞌ scawanil.

Yutol junne chi sloctej qꞌuixwilal ebꞌ yibꞌan,

yutol jaꞌ mactxequel chi yun amulal yetoj yanabꞌ yel xacꞌal qꞌuixwiltaj.

18 Ta ey junoj winaj chi yun mul yetoj junoj ix ix,

yet eyoc ix yin yilon sbꞌisbꞌal xꞌaaw,

cꞌam yeloc apnoj tzet chi iꞌon ix tuꞌ yul sat,

catuꞌ bꞌejan pax scꞌul ix xꞌoxon el syaꞌilal tuꞌ,

ta ey bꞌey chi yun jaxca tuꞌ,

chi qꞌueyle el ebꞌ scawanil je xol.

19 Cꞌam ojabꞌ cꞌal mactxequel chi yun mul yetoj yanabꞌ smam,

ma yetoj sno xutx,

yutol chi yiꞌel sqꞌuixwil mactxequel yican to sbꞌa yetoj,

chi can spenail yibꞌan ebꞌ scawanil.

20 Ta ey junoj mactxequel chi mulwi yetoj yistil yuẍtaj smam,

ma yetoj yistil sno xutx,

caw qꞌuixwiltaj jun tuꞌ,

chi can jun mule tuꞌ yibꞌan ebꞌ scawanil,

yuxan cꞌam tocꞌal junoj yuninal ebꞌ chi ali.

21 Ta ey junoj mactxequel chi mulwi yetoj yistil yuẍtaj,

jaꞌ jun tuꞌ chi yiꞌel sqꞌuixwil yuẍtaj tuꞌ.

Caw yaabꞌetaj jun bꞌeybꞌale tuꞌ,

yuxan chi can smul ebꞌ yibꞌan ebꞌ scawanil,

catuꞌ cꞌam tocꞌal yuninal ebꞌ chi ali.

22 Bꞌeybꞌalnewej jin ley,

cꞌal je jijen jin chejbꞌanil tiꞌ;

jijewej masanil xin,

yet watxꞌ man oj jex jin qꞌueyel bꞌey sat txꞌotxꞌ txꞌotxꞌ bꞌey oj jex apnoj caey tuꞌ.

23 Cꞌam ojabꞌ che bꞌeybꞌalne sbꞌeybꞌal ebꞌ ánima oj wiꞌel je sattaj tuꞌ.

Jaꞌ ebꞌ chi bꞌeybꞌalne masanil wan tzetyetal tiꞌ,

yu cꞌal jun tuꞌ,

caw cꞌamxa chi techa spenail ebꞌ tuꞌ wu an.

24 Jain caw jix wakꞌcan jin tiꞌ ey jex,

tol oj waoc xꞌotxꞌ ebꞌ tuꞌ yul je kꞌabꞌ;

jain oj jex wiꞌtoj sat txꞌotxꞌ txꞌotxꞌ caw wal ey syaxil sat,

bꞌey ey noꞌ lech yetoj noꞌ yal awcabꞌ.

Jain Jehová je Diosal jin tiꞌ,

jain jix jex wiꞌeltej xol wan txꞌoj conobꞌal,

yutol caw miman je yeloc apnoj yintaj wanxa ebꞌ tuꞌ.

25 Yuxan sowalil ey ojabꞌ sqꞌuexanil noꞌ noꞌ yul je sat.

Ey noꞌ saj,

ey pax noꞌ tzꞌiltaj,

ey noꞌ tzꞌiquin saj,

ey pax noꞌ tzꞌiltaj.

Yuxan cꞌam ojabꞌ che yute je bꞌa yin yaabꞌetaj jin sattaj,

yu cꞌal tol che chiꞌ noꞌ noꞌ tzꞌiltaj tuꞌ,

noꞌ tzꞌiquin cꞌal noꞌ chi sjutx sbꞌa sat txꞌotxꞌ tiꞌ,

jaꞌton noꞌ jix wal ey jex tol tzꞌiltaj noꞌ.

26 Yuxan jaex tiꞌ xin,

watxꞌ ojabꞌ cꞌal che yute je bꞌa jin sattaj,

yutol jain tiꞌ watxꞌ jin cꞌal.

Jain jix jex jin sicꞌ eltej,

yutol txꞌoj je yel yintaj wanxa conobꞌ,

yet watxꞌ jin conobꞌ che yun can ocoj.

27 Ta ey junoj winaj ma junoj ix ix je xol chi kꞌanabꞌ yetoj spixan camom,

ma chi yaoc sbꞌa yin atxumal,

jaꞌ jun tuꞌ sowalil chi kꞌojchꞌennele camoj,

jacꞌal oc chi sloctej camich tuꞌ yibꞌan,

ẍi Jehová.