2 Jix yalon tet naj Aarón jaxca tiꞌ:

Iꞌtej junoj noꞌ achꞌe wacax yet watxꞌ,

chi oc noꞌ yin xaambꞌaloj yu stooloj je penail,

cha wakꞌon tzꞌaꞌ junoj noꞌ icham meꞌ yin xaambꞌal,

jaꞌton noꞌ tol tzꞌajan cꞌal smimanil masanil,

jaxca chi ẍaꞌ scꞌul Dios.

3 Chi lawi tuꞌ xin,

cha walon tet ebꞌ ja wet Israelal,

tol chi yiꞌtej junoj noꞌ icham chiw ebꞌ yin xaambꞌalil yu stooloj spenail,

catuꞌ chi yiꞌon pax tej junoj noꞌ achꞌe wacax ebꞌ cꞌal junoj noꞌ meꞌ jun abꞌil skꞌinal,

jaꞌton noꞌ tol tzꞌajan cꞌal smimanil masanil.

4 Yetoj cꞌal junoj noꞌ wacax cꞌal junoj noꞌ icham meꞌ chi makꞌle cam yin xaambꞌal,

jaꞌton xaambꞌal yet watxꞌcꞌulal yetoj Dios.

Catuꞌ chi yiꞌon pax tej junoj saꞌbꞌeal ebꞌ yin tzet chi loꞌlei,

tol calbꞌil yetoj aceite olivo,

yutol jaꞌ Dios oj xꞌox sbꞌa yetoj yipalil ey jex tinaniꞌ,

ẍi naj Moisés tet ebꞌ.

5 Catuꞌ jix yiꞌontej masanil ebꞌ Israel tzet jix yal naj Moisés,

jix yamcha oc masanil ebꞌ ánima sattaj jun kꞌap na tuꞌ,

jaꞌ tituꞌ jix oc linan ebꞌ sattaj Dios.

6 Jix yalon naj Moisés tet ebꞌ jaxca tiꞌ:

Jaꞌton wan tiꞌ chi yoche Dios chi cu waꞌne;

ta oj cu jije kunen wan tiꞌ,

oj xꞌox yipalil je yilaꞌ.

7 Catuꞌ jix yalon naj Moisés tet naj Aarón jaxca tiꞌ:

Jitzwejtej ja bꞌa bꞌey scawilal jun yet xaambꞌal tiꞌ,

catuꞌ cha wakꞌon ja xaambꞌal yu stooloj ja penail cꞌal noꞌ xaambꞌal chi tzꞌaꞌi.

Jaxca tuꞌ oj yun yoc mimancꞌulal yin ja penail.

Catuꞌ cha wakꞌon cꞌal pax noꞌ xaambꞌal yu stooloj cu penail jaon Israel jon tiꞌ,

jaxca tuꞌ jix yun yalon Dios,

ẍi Moisés.

8 Catuꞌ jix apni oc naj Aarón scawilal jun yet xaambꞌal tuꞌ,

jix smakꞌon cam noꞌ achꞌe wacax yu yoc noꞌ yin xaambꞌalil yu spenail.

9 Jix lawi tuꞌ,

jix apni pax oc ebꞌ scꞌaal yetoj ẍiqꞌuil noꞌ xaambꞌal tuꞌ,

catuꞌ jix yaon eytoj yiximal skꞌabꞌ naj Aarón xol chicꞌ,

jix sbꞌonon oc naj yin yucꞌaꞌ jun yet xaambꞌal tuꞌ,

jaxa wanojxa chicꞌ tuꞌ xin,

jix secle can ey bꞌey yajantaj jun yet xaambꞌal tuꞌ.

10 Jix lawi tuꞌ jix yakꞌon tzꞌaꞌ masanil ẍepuꞌal noꞌ naj bꞌey yibꞌan jun yet xaambꞌal tuꞌ,

yetoj cꞌal pax yubꞌal noꞌ,

yetoj cꞌal ẍepuꞌal eyoc yin skꞌej noꞌ,

jaꞌton noꞌ xaambꞌal chi akꞌle yu yoc mimancꞌulal yibꞌan spenail,

jaxca jix yun yalon Dios tet naj Moisés.

11 Jal pax ẍiꞌbꞌeal yetoj cꞌal stzꞌuumal noꞌ jix yakꞌ can tzꞌaꞌ naj bꞌey stiꞌeltoj bꞌey bꞌulan ecꞌ ebꞌ tuꞌ.

12 Catuꞌ jix smakꞌon cam noꞌ xaambꞌal naj Aarón tol chi akꞌle tzꞌaꞌ masanil,

jaxa ebꞌ scꞌaal jix yiꞌontej ẍiqꞌuil noꞌ ebꞌ,

catuꞌ jix xion oc naj yin scanpaqꞌuil jun yet xaambꞌal tuꞌ.

13 Jix lawi tuꞌ,

jix yiꞌon pax tej sjolom,

cꞌal ẍiꞌbꞌeal noꞌ ebꞌ,

catuꞌ jix skocꞌ tzꞌokꞌnetoj yet chi akꞌle yin xaambꞌal tuꞌ,

jix yakꞌon tzꞌaꞌ naj Aarón tuꞌ yibꞌan jun yet xaambꞌal tuꞌ.

14 Catuꞌ jix xꞌaon el yul scꞌul cꞌal xubꞌ yetoj cꞌal yajan noꞌ ebꞌ,

catuꞌ jix yaon oc ebꞌ yibꞌan noꞌ lalanxa stzꞌaꞌ tuꞌ.

15 Jix yakꞌon wan xaambꞌal naj Aarón yu ebꞌ conobꞌ Israel.

Jix yiꞌontej noꞌ chiw jaꞌton noꞌ xaambꞌal yu stooloj spenail ebꞌ conobꞌ,

jix smakꞌon camoj,

catuꞌ jix yakꞌon yin xaambꞌalil jaxca jix yun yakꞌon wan xaambꞌal yet sbꞌabꞌelal.

16 Jix yakꞌon tzꞌaꞌ junxa noꞌ xaambꞌal tol chi tzꞌaꞌ masanil jaxca yalon sleyal.

17 Jix yakꞌon pax saꞌbꞌeal yin tzet chi loꞌlei,

jix yiꞌtej jun bꞌetxan ixim jarina jix yakꞌon tzꞌaꞌ yibꞌan jun yet xaambꞌal tuꞌ,

yetoj xaambꞌal chi akꞌle tzꞌaꞌ yet junjun skꞌinibꞌalil.

18 Jix smakꞌon pax cam noꞌ wacax naj Aarón cꞌal noꞌ icham meꞌ,

noꞌ jix yiꞌtej ebꞌ conobꞌ Israel yet chi akꞌle tzꞌaꞌ yin xaambꞌalil yet watxꞌcꞌulal.

Jaxa ebꞌ scꞌaal naj jix iꞌontej ẍiqꞌuil noꞌ,

jaxa smam ebꞌ jix txion oc yin scanpaqꞌuil jun yet xaambꞌal tuꞌ.

19 Jaꞌ yibꞌan jun yet xaambꞌal tuꞌ,

jix yaey ẍepuꞌal noꞌ wacax cꞌal noꞌ meꞌ tuꞌ ebꞌ,

jaꞌton ẍepuꞌal yin sne noꞌ,

cꞌal yin yul scꞌul noꞌ,

cꞌal yubꞌal noꞌ,

cꞌal ẍepuꞌal eyoc yin skꞌej noꞌ.

20 Junne jix yakꞌ ẍepuꞌal ebꞌ yetoj cꞌal xaamscꞌul noꞌ.

Jaxa naj Aarón jix akꞌon tzꞌaꞌ ẍepuꞌal bꞌey yibꞌan jun yet xaambꞌal tuꞌ.

21 Jal pax xaamscꞌul noꞌ xin,

cꞌal xubꞌ noꞌ bꞌey swatxꞌ,

tucꞌal jix bꞌatxbꞌale ey noꞌ sattaj Dios,

jaxca jix yun yalon tet naj Moisés.

22 Jix lawi tuꞌ xin,

jix yiꞌon a skꞌabꞌ naj Aarón,

jix yalon watxꞌ kꞌane yibꞌan ebꞌ conobꞌ Israel.

Yet jix lawi yakꞌon tzꞌaꞌ noꞌ xaambꞌal yu stooloj spenail tuꞌ,

yetoj cꞌal xaambꞌal tol chi tzꞌaꞌ masanil,

cꞌal noꞌ xaambꞌal yet watxꞌcꞌulal,

catuꞌ jix eytej naj bꞌey jun yet xaambꞌal tuꞌ.

23 Jix lawi tuꞌ,

jix octoj naj Moisés yetoj naj Aarón yul jun Kꞌap Na bꞌey chi ẍaꞌle sbꞌa ebꞌ yetoj Dios,

jaxa yet jix eltej ebꞌ jix yalon can watxꞌ kꞌane ebꞌ yibꞌan conobꞌ Israel.

Jix lawi tuꞌ,

jix xꞌoxon yipalil Dios tet masanil ebꞌ conobꞌ tuꞌ.

24 Jix eytej kꞌakꞌ bꞌey satcan yu Dios,

jix yakꞌon tzꞌaꞌ noꞌ xaambꞌal tuꞌ yetoj cꞌal ẍepuꞌal noꞌ eyatoj yibꞌan jun yet xaambꞌal tuꞌ,

jix tzꞌaꞌtoj noꞌ masanil.

Jaꞌ yet jix yilon masanil ebꞌ conobꞌ Israel jun tuꞌ,

caw jix el yaw ebꞌ yu tzalacꞌulal,

jix ey noan ebꞌ sat txꞌotxꞌ yet chi yiꞌon ey sbꞌa ebꞌ sattaj Dios.