Yalubꞌal Naj Moisés
2
Jaꞌ yet jun tiempoal tuꞌ,
ey jun naj winaj titnaj yin yicꞌaal Leví,
jix nupi naj yetoj jun ix ix.
Jatuꞌ titnaj pax yin yicꞌaal Leví.
2 Jix ali jun swinaj unin ebꞌ,
jaꞌ yet jix yilon ebꞌ tol caw watxꞌ yili jun neneꞌ tuꞌ,
catuꞌ jix yewbꞌan can el jun unin tuꞌ ix yin oxebꞌ xꞌaaw.
3 Jaꞌ yet cꞌamxa chi skeꞌ yewbꞌan el jun yaliẍ unin tuꞌ ix,
catuꞌ jix yiꞌontej jun xuc ix,
catuꞌ jix yaon oc wan kꞌol yin jun xuc tuꞌ jaxca yili asfalto bꞌey chi snubꞌle sbꞌa,
yet watxꞌ cꞌam chi octoj jaꞌ jaꞌ yul.
Jix lawi tuꞌ,
jix yaon eytoj jun yaliẍ unin tuꞌ ix yul,
catuꞌ jix bꞌet yakꞌon can ix xol wan teꞌ teꞌ jaxca yili teꞌ aa bꞌey stiꞌ jaꞌ miman jaꞌ chi yij Nilo.
4 Ey jun ix yanabꞌ naj unin tuꞌ,
jaꞌ ix jix teynen can jun sno tuꞌ stiꞌ jaꞌ jaꞌ tuꞌ.
Naat tacꞌal jix tit tꞌanan ix yu tzet chi eloc jun unin tuꞌ.
5 Jaxa jix yun xin,
jix apni ix scutzꞌin naj sreyal Egipto tuꞌ aẍnoj bꞌey stiꞌ jaꞌ tuꞌ.
Jaꞌ yet lalan yecꞌ ebꞌ ix paẍal bꞌey stiꞌlaj jaꞌ jaꞌ tuꞌ,
catuꞌ jix yilontoj ix xol wan teꞌ jaxca yili teꞌ aa,
tol ey jun xuc eey tituꞌ,
catuꞌ jix ẍejontoj jun yakꞌomal servil ix yet chi too yiꞌontej jun xuc tuꞌ.
6 Jaxa yet jix sajon a jun xuc ix tuꞌ,
jix yilon ix tol neneꞌ unin jun eeytoj yul,
lalan yokꞌi.
Yu tuꞌ xin,
caw jix okꞌ scꞌul ix yin,
jix yalon ix jaxca tiꞌ:
—Jaꞌ jun unin tiꞌ yet ebꞌ ix a Israel,
ẍi ix.
7 Jaxa ix yanabꞌ naj unin tuꞌ,
jix jul ix scꞌatan ix scutzꞌin naj rey tuꞌ,
jix yalon ix jaxca tiꞌ:
—¿Chim yal ja cꞌul,
chi too wawte junoj ebꞌ ix a Israel tuꞌ,
yet chi jul yakꞌon txutxwoj jun neneꞌ unin tiꞌ ey jaach?
ẍi ix.
8 —Asiꞌ awte junoj ebꞌ ix xin,
ẍi ix scutzꞌin naj Faraón tuꞌ tet ix unin tuꞌ.
Catuꞌ jix too ix yawtentej xutx naj unin tuꞌ.
Jaxa yet jix apni oc ix txutxe tuꞌ,
jix yalon ix scutzꞌin naj rey tet ix jaxca tiꞌ:
9 —Iꞌtoj jun yaliẍ unin tiꞌ bꞌey ja na,
catuꞌ cha wilon chꞌibꞌoj,
catuꞌ oj wakꞌon ja tool yu ja wilon chꞌibꞌoj,
ẍi ix scutzꞌin naj rey tuꞌ,
jix yiꞌontoj ix txutxe tuꞌ jun unin tuꞌ,
jix yilon chꞌibꞌoj.
10 Jaxa yet jix chꞌibꞌa naj unin tuꞌ,
jix bꞌet akꞌle can naj unin tuꞌ yu ix tet ix scutzꞌin naj rey tuꞌ,
jaxca wal yuneꞌ ix jix yun ocoj,
Moisés jix akꞌle yij sbꞌi naj yu ix,a
chi yal yeloc apnoj;
jain jix wiꞌatej yul jaꞌ jaꞌ.
Jix El Moisés Bꞌey Txꞌotxꞌ Egipto
11 Jaꞌ yet jix bꞌey cꞌaltoj tiempo xin,
jaꞌ naj Moisés jix oc naj yin icham animail,
catuꞌ jix too naj bꞌey caan ebꞌ yuẍtaj bꞌey chi mulna ebꞌ,
jaꞌton bꞌey eyoc ebꞌ yin yakꞌomaloj servil.
Catuꞌ jix yilon naj tol ey jun yet conobꞌ lalan smakꞌle yu jun naj a Egipto.
12 Catuꞌ jix ecꞌ tꞌananoj tol cꞌam mac tꞌanantej yin,
catuꞌ jix makꞌle cam naj a Egipto tuꞌ yu naj,
jix smujon can eytoj xol chꞌen arena.
13 Jaxa yet junxa cꞌu jix too yilon ebꞌ yet conobꞌ junelxa;
jix yiloni tol ey cawan ebꞌ lalan yakꞌlen jowal,
catuꞌ jix yalon tet naj chi makꞌwa tuꞌ:
—¿Tzet yuxan cha makꞌ naj ja wet conobꞌ tiꞌ?
ẍi naj Moisés.
14 Jix takꞌwi jun yet conobꞌ naj tuꞌ jaxca tiꞌ:
—¿Mac jix jaach aon oc yin yaawil cꞌal yin juezal cu xol yuxan cha kꞌanle?
¿Ma cha woche chin ja makꞌ cam jaxca jix yun ja makꞌon cam naj a Egipto yet ewi?
Jaꞌ yet jix yabꞌen Moisés tzet jix yal naj tuꞌ,
jix xiwaoj jix snaꞌon eloj,
tol jix abꞌcha ocoj tol jaꞌ naj jix makꞌon cam naj a Egipto.
15 Jaꞌ yet jix yabꞌen oc naj sreyal Egipto,
tol jaꞌ Moisés jix makꞌon cam naj Egipto tuꞌ,
jix yalon naj rey tol chi seyle ecꞌ Moisés yet chi makꞌle camoj.
Yuxan jix el naj,
jix too naj bꞌey jun txꞌotxꞌ chi yij Madián.
Jaꞌ yet jix apni oc tituꞌ,
jix ey chotan naj xew bꞌey scawilal stiꞌ jun jaꞌ ucꞌbꞌal jaꞌ.
16 Jaꞌ tituꞌ ey jun naj winaj chi yij sbꞌi Reuel,
yalomal oc stiꞌ ebꞌ ánima tet sdiosal,
caan yul yet Madián.
Ey jujwan scutzꞌin naj.
Jix apni oc ebꞌ ix iꞌo atej jaꞌ yet chi yakꞌon no teꞌ jucubꞌ ebꞌ ix,
yet watxꞌ chi yucꞌ jaꞌ noꞌ smeꞌ smam ebꞌ ix tuꞌ.
17 Jix lawi tuꞌ,
jix apni oc wan ebꞌ ilom meꞌ,
catuꞌ jix yalon ebꞌ tol chi el ebꞌ ix bꞌey jun ucꞌbꞌal jaꞌ tuꞌ,
catuꞌ jix a lemna Moisés jix too colwa yetoj ebꞌ ix,
yet jix yuqꞌuen jaꞌ noꞌ meꞌ tuꞌ.
18 Jaꞌ yet jix apni ebꞌ ix bꞌey smam tuꞌ,
jix skꞌanlen naj tet ebꞌ jaxca tiꞌ:
—¿Tzet yuxan eyman jix jex meltzo tinaniꞌ?
19 Catuꞌ jix takꞌwi ebꞌ ix:
—Ey jun naj winaj a Egipto jix cu colon tet wan ebꞌ naj ilom meꞌ,
catuꞌ jix yiꞌon atej jaꞌ naj yucꞌ noꞌ cu meꞌ tiꞌ,
ẍi ebꞌ ix.
20 Catuꞌ jix skꞌanlen naj mame tuꞌ tet ebꞌ ix:
—¿Bꞌeytuꞌ jix can oc can naj je yu?
¿Tzet yuxan ma je yiꞌtej naj titiꞌ?
Eymanwej,
asiꞌwej awtewejtej naj lowoj,
ẍi naj mame tuꞌ.
21 Queytuꞌ jix yun yapni oc naj Moisés bꞌey sna naj Reuel tuꞌ.
Jaꞌ yet jix ecꞌ cꞌal el tiempo,
catuꞌ jix yakꞌon jun scutzꞌin naj Reuel tuꞌ yistiloj Moisés,
jaꞌton ix Séfora.
22 Jix lawi tuꞌ xin,
jix ali jun yuninal ebꞌ;
jix akꞌle yij sbꞌi Guersón yu Moisés,b
yutol jix snaꞌ naj:
Txꞌoj conobꞌal weoc bꞌey jun txꞌotxꞌ tiꞌ.
23 Peyxa tax tuꞌ,
jix cam naj sreyal Egipto.
Jaxa jix yunen cꞌal xin,
jaꞌ ebꞌ Israel ey cꞌal oc ebꞌ yaloni tol eyoc ebꞌ yin syaꞌtajilal yin yakꞌomal servil bꞌey Egipto.
Jix yabꞌ Dios scuscꞌulal ebꞌ cꞌal syaꞌtajilal eyoc yibꞌan ebꞌ.
24 Catuꞌ jix yabꞌen Dios yokꞌilal ebꞌ,
jix snaꞌontej swa kꞌane jix yakꞌ can yetoj naj Abraham,
yetoj naj Isaac,
cꞌal yetoj naj Jacob,
25 catuꞌ jix yilon Dios syaꞌtajilal eyoc yibꞌan ebꞌ Israel,
yuxan jix okꞌ scꞌul yin ebꞌ.