—Akꞌ wuneꞌ.

Ta cꞌamaj,

tiꞌ wal chin cami,

ẍi ix.

2 Yu jun tuꞌ,

jix tit sjowal naj Jacob yin ix Raquel tuꞌ,

jix yalon naj tet ix jaxca tiꞌ:

—¿Tumi Dios jin cha wilaꞌ?

Jaꞌ Naj cꞌam chi akꞌon ja wuneꞌ,

ẍi naj Jacob.

3 Jix yalon ix tet naj:

—Weyan yetoj ix Bilhá ix wakꞌomal servil tiꞌ,

jaꞌ yetoj aloj yuneꞌ ix jaxca wal wuneꞌ chi yun ocoj,

ẍi ix Raquel tuꞌ.

4 Jix yakꞌon jun ix yakꞌomal servil ix Raquel tet naj Jacob tuꞌ,

catuꞌ jix wey naj yetoj ix,

5 jix ali jun yuneꞌ ix Bilhá tuꞌ.

6 Jix yalon ix Raquel jaxca tiꞌ:

Dan,^a

oj yij sbꞌi naj unin tiꞌ,

yutol jix yabꞌ Jehová jin txa,

jaꞌ jix pajtzen tzet chi woche,

yuxan jix yakꞌ jun unin tiꞌ ey jin,

ẍi ix.

7 Jix lawi tuꞌ,

jix ali junxa yuneꞌ ix Bilhá yetoj naj Jacob.

8 Jix yalon pax ix Raquel tuꞌ:

Jaꞌ jun unin tiꞌ oj yij sbꞌi Neftalí,^b

yutol chi wakꞌ jowal yetoj ix jin noo Lía,

tinaniꞌ jix eyqꞌuey ix wu,

ẍi ix.

9 Jaꞌ yet jix yilon pax ix Lía,

tol cꞌamxa yuneꞌ ix chi ali,

yuxan jix yakꞌon pax jun yakꞌomal servil ix tet naj Jacob,

jaꞌton ix Zilpá.

10 Jaꞌ yet jix ali yuneꞌ ix Zilpá tuꞌ yetoj naj Jacob,

11 jix yalon ix Lía jaxca tiꞌ;

caw watxꞌ wet,

yuxan Gad jix yij sbꞌi jun unin tuꞌ.^c

12 Jix lawi tuꞌ,

jix ali junxa yuneꞌ ix Zilpá yetoj naj Jacob,

ix yakꞌomal servil ix Lía.

13 Jix yalon ix Lía jaxca tiꞌ:

Caw tzalacꞌulal wet,

ey ebꞌ wet ixal oj alon oj tol watxꞌ wet,

yuxan Aser jix yakꞌ yij sbꞌi jun unin tuꞌ,^d

ẍi ix.

14 Ey jun cꞌual,

jix too naj Rubén yet stiempoal skꞌuple a ixim tiriw.

Jaꞌ tituꞌ jix ilcha oc wan sat teꞌ teꞌ yu naj,

chi yij sbꞌi mandrágora.^e

Jix yiꞌontej naj tet xutx,

jaꞌton ix Lía,

jix yalon ix Raquel tet ix Lía tuꞌ.

Chin kꞌan ey jaach an,

akꞌ wal junoj sat teꞌ mandrágora tuꞌ ey jin an,

teꞌ jix yiꞌtej naj ja wuneꞌ tuꞌ,

ẍi ix.

15 Catuꞌ jix takꞌwi ix Lía tuꞌ jaxca tiꞌ:

—¿Iꞌbꞌil ecꞌ wichamil ja wu,

jaxa pax tinaniꞌ cha woche xacꞌal cha wiꞌ pax ecꞌ sat teꞌ mandrágora jix bꞌet yiꞌtej naj wuneꞌ tiꞌ?

ẍi ix.

—Ta cha wakꞌ teꞌ sat mandrágora tuꞌ ey jin an,

chi skeꞌ chach wey yetoj naj Jacob yet jun akꞌbꞌal tiꞌ,

ẍi ix Raquel tuꞌ.

16 Jaꞌ yet tuꞌ,

caw yeycꞌualil xa jix meltzo naj Jacob yin smulnail,

jix chaꞌle apnoj naj yu ix Lía tuꞌ,

jix yalon ix tet naj jaxca tiꞌ:

—Jaꞌ yet jun akꞌbꞌal tiꞌ oj jaach wey wetoj an,

yutol jix wakꞌ teꞌ sat mandrágora jix bꞌet yiꞌtej naj wuneꞌ yu yoc ja maanbꞌaniloj tet ix jin no Raquel,

ẍi ix tet naj.

Jaꞌ yet jun akꞌbꞌal tuꞌ jix wey naj Jacob tuꞌ yetoj ix Lía.

17 Jix abꞌle xa ix Lía yu Jehová,

yu jun tuꞌ,

jix ali junxa yuneꞌ ix yetoj naj Jacob,

yet xa sjoꞌ unin ebꞌ.

18 Jix yalon ix Lía jaxca tiꞌ:

Isacar,^f

oj yij sbꞌi naj unin tiꞌ,

yutol jix spajtze Jehová ey jin,

yutol jix wakꞌ ix wakꞌomal servil tet naj wichamil an.

19 Jix lawi tuꞌ,

jix ali junxa yuneꞌ ix Lía yetoj naj Jacob,

jaꞌton yet swaj unin ebꞌ.

20 Jix yalon ix jaxca tiꞌ:

Jix yakꞌ Jehová jun saꞌbꞌeal tiꞌ ey jin,

yuxan oj jin camcꞌulnele yu wichamil tinaniꞌ.

Yutol eyxa wajwanxa unin chi wil yetoj naj,

yuxan jaꞌ naj unin tiꞌ oj yij sbꞌi Zabulón,^g

ẍi ix.

21 Yin xa slawubꞌal jix ali junxa yuneꞌ,

ix unin,

jix yakꞌon yij sbꞌi Dina.

22 Jaꞌ Jehová jix okꞌ scꞌul yin ix Raquel,

yuxan jix pajtzele xa ix,

yutol jix ẍaꞌ scꞌul Jehová tol chi ali yuneꞌ ix.

23 Jaꞌ yet jix ali jun sbꞌabꞌel unin ix,

jix yalon ix jaxca tiꞌ:

Jaꞌ Jehová jix yiꞌel qꞌuixwilal win an,

yutol cꞌam taꞌ wuneꞌ.

24 Jix lawi tuꞌ,

jix yakꞌon ix yij sbꞌi José,^h

naj unin tuꞌ,

catuꞌ jix yalon pax ix:

Tol oj wal chi el yin scꞌul Jehová chi yakꞌ junojxa wuneꞌ,

ẍi ix.

25 Yet jix ali naj José,

jix yalon Jacob tet naj Labán jaxca tiꞌ:

—Jaꞌ tinaniꞌ chaꞌ jin pax toj bꞌey jin conobꞌ bꞌey caan jin.

26 Akꞌ wiꞌtoj ebꞌ wuninal tiꞌ yetoj ebꞌ ix wistil tiꞌ an,

yutol miman tiempo jix jin mulna ja wetoj yu ebꞌ ix,

yuxan smoo xa chin pax toj bꞌey jin conobꞌ.

Caw ja wotaj tzet jix yun jin mulna ja wetoj,

ẍi naj Jacob.

27 Jix yalon naj Labán tet jaxca tiꞌ:

—Cꞌamaj,

chi wal ey jaach manche jaach toi,

yutol ja wu,

yuxan ey syaaxilal Jehová ey jin an.

28 Al ey jin jantaj chach jin toolane,

oj wakꞌ ey jaach yal cꞌal jantaj cha kꞌanaꞌ,

ẍi naj Labán.

29 Jix yalon naj Jacob:

—Caw ja wotaj tzet jix yun jin mulna ja wetoj,

cꞌal tzet jix yun wilon noꞌ ja jobꞌbꞌeal noꞌ tiꞌ.

30 Yutol txenne sbꞌisil noꞌ yet cꞌamto chin juli,

jal pax tinaniꞌ caw mimanxa sbꞌisil noꞌ,

jatax cꞌal yet jix jin juli,

jix cꞌoli yakꞌon syaaxilal Jehová ja wibꞌan.

Jaꞌ tinaniꞌ,

¿bꞌakꞌin oj jin chaꞌel yich jin mulnail yul wet yetoj ebꞌ ix wistil cꞌal ebꞌ wuninal tiꞌ?

ẍi Jacob.

31 —Jantaj wal ja tool cha kꞌanaꞌ oj wakꞌa,

ẍi naj Labán.

—Cꞌam ojabꞌ jin tool cha wakꞌa,

asan tol chi wil cꞌal noꞌ ja meꞌ tiꞌ niꞌojxa,

ta oj ẍaꞌ ja cꞌul tzet oj walaꞌ.

32 Chaꞌ jin oc xol noꞌ ja meꞌ tiꞌ tinaniꞌ,

catuꞌ chin poꞌon el masanil noꞌ yuneꞌ meꞌ cꞌal noꞌ yuneꞌ chiw,

tol kꞌejin,

noꞌ tzꞌibꞌin,

cꞌal noꞌ jasquiltaj yoc stzꞌibꞌil.

Jaꞌ noꞌ tuꞌ chi oc jin tooloj.

33 Yu jun tuꞌ xin,

jaꞌ yet cu sattajto tuꞌ,

ilaꞌ tol watxꞌ chi wute mulna jin bꞌa ey jaach,

jaꞌ yet oj ja wochen ja sey ja wil noꞌ jin jobꞌo.

Ta jaꞌ xol noꞌ wet tuꞌ ey noꞌ chiw,

ma noꞌ meꞌ man tzꞌibꞌinoj,

ma tol man kꞌejinoj,

ipan jaach welkꞌanen chi yal tuꞌ,

ẍi Jacob.

34 Yun ojabꞌ jaxca tuꞌ xin.

Chi ẍaꞌ jin cꞌul tzet cha wal tuꞌ,

ẍi naj Labán.

35 Jaꞌ yet jun cꞌu tuꞌ jix spoꞌon el masanil noꞌ icham chiw tol tzꞌibꞌin xol noꞌ yet naj Labán,

cꞌal noꞌ jasquiltaj yoc stzꞌibꞌil,

cꞌal noꞌ xutx chiw tzꞌibꞌintaj cꞌal yoqui,

yetoj masanil noꞌ meꞌ kꞌejin yili,

jix yakꞌon tet ebꞌ yuninal tuꞌ.

36 Jix yiꞌontoj noꞌ meꞌ ebꞌ scꞌaal naj Labán tuꞌ bꞌey jun txꞌotxꞌ caw naat,

ey oxebꞌoj cꞌual stecꞌbꞌanil.

Jal wanxa noꞌ smeꞌ naj Labán tuꞌ jix cancan naj Jacob steyneni.

37 Eyman jix snaꞌ naj Jacob.

Catuꞌ jix stzokꞌon el skꞌabꞌlaj jun teꞌ teꞌ chi yij álamo,

teꞌ almendro,

cꞌal teꞌ castaño.

Jix oc ian naj soson el stzꞌuumal teꞌ naj,

ey sajin,

ey kꞌejin cꞌal stzꞌibꞌinal yul scꞌul teꞌ.

38 Jaꞌ yet jix el teꞌ stzokꞌon naj tuꞌ,

jix yaon ey naj bꞌey chi yucꞌ jaꞌ noꞌ meꞌ tuꞌ,

yet watxꞌ chi yil noꞌ meꞌ tuꞌ yet chi jul noꞌ yuqꞌuen jaꞌ.

Jaꞌ tituꞌ chi akꞌle sajcho noꞌ txutxe yu noꞌ icham.

39 Jaꞌ sattaj noꞌ,

eey teꞌ teꞌ tzꞌibꞌintaj yili,

yuxan jaꞌ yet chi uneꞌwi noꞌ txutxe tuꞌ,

tzꞌibꞌintaj xacꞌal yili yuneꞌ noꞌ chi juli.

40 Jaꞌ masanil noꞌ tzꞌibꞌin chi ali,

chi spoꞌoel naj Jacob xol noꞌ yet naj Labán.

Jaxca tuꞌ jix yun spoꞌon el naj Jacob tuꞌ smeꞌ xol noꞌ yet naj Labán.

41 Masanil noꞌ tol bꞌakꞌech,

jaꞌ yet chi sajchi noꞌ,

catuꞌ chi yaon ey naj Jacob wan teꞌ teꞌ tuꞌ,

sattaj noꞌ yet chi bꞌet yuqꞌuen jaꞌ noꞌ,

yet watxꞌ chi yil noꞌ wan teꞌ teꞌ tuꞌ yet chi sajchi noꞌ.

42 Jaꞌ yet chi jul noꞌ bꞌajtaj wal yoqui,

cꞌam chi yaey teꞌ teꞌ naj Jacob tuꞌ.

Yu jun tuꞌ,

jaꞌ noꞌ bꞌajtaj tuꞌ yet naj Labán,

jaꞌ noꞌ bꞌakꞌech yet naj Jacob.

43 Jaxca tuꞌ jix yun yoc Jacob tuꞌ bꞌeomal,

caw jix chꞌibꞌ sbꞌisil smeꞌ,

ecꞌal sbꞌisil scamello cꞌal sbꞌuru,

ecꞌal sbꞌisil ebꞌ naj yakꞌomal servil cꞌal ebꞌ ix yakꞌomal servil naj.