Jaꞌ An Biblia tiꞌ, Skꞌane Dios. Jaꞌton Dios jix colwa yin ebꞌ yet jix stzꞌibꞌen wan libro tiꞌ, yet watxꞌ jaꞌ tzet chi yoche Naj chi stzꞌibꞌe, jix yun ebꞌ. Junjun ebꞌ jix stzꞌibꞌe tzet chi tit yin snaꞌbꞌal yu Dios. Jaꞌ jun tiꞌ chi yal “inspiración” yin Español. 2a Timoteo 3:16, 17 chi yalaꞌ: “Jaꞌ Dios jix akꞌon tzꞌibꞌele An Juun bꞌey ey can skꞌane. Watxꞌ An Juun yin cu scuyoni. Watxꞌ An Juun yin cu stenchaneni. Chi Waꞌxi oc cu naꞌbꞌal yu An Juun. Chi cu scuy An Juun tzet chi kute cu jichlonen oc cu bꞌeybꞌal. Jaxca ton tiꞌ yopiso An Juun Tzꞌibꞌebꞌilcanoj, yet watxꞌ tzꞌajan chi naꞌcha el ku, cꞌal skeꞌon cu kunen yochwan Dios, jaon yet jon xa tiꞌ.”

Jaꞌ jun Biblia chi poꞌole yin caabꞌ tujanil. Jun tujan chi yij Antiguo Testamento, chi yal yeloc apnoj, “Icham Swa Kꞌane Dios”, jaxa junxa tujan chi yij Nuevo Testamento, chi yal yeloc apnoj, “Acꞌ Swa Kꞌane Dios”.

Jaꞌ An Antiguo Testamento tzꞌibꞌebꞌilcan yin Hebreo yu ebꞌ ẍejabꞌ Dios yet peyxa. Jaꞌ tzet chi yalaꞌ jaꞌton skꞌaneal tzet jix yun yel yich yul yibꞌankꞌinal, tzet jix yun skaey ecꞌ ebꞌ ánima sat txꞌotxꞌ tiꞌ, tzet naꞌbꞌil yu Dios yin ebꞌ. Chi yalon pax tzet jix yun yel yich conobꞌ Israel cꞌal tzet yeocoj. Chi yalon pax tzet jix yun ebꞌ Israel yin ecꞌal abꞌil. Ey tzet watxꞌ jix yun ebꞌ, ey pax tzet pena jix yun ebꞌ. Ey ebꞌ ẍejabꞌ Dios, jaꞌton ebꞌ chi yij “profeta” jix yalel skꞌane Dios xol ebꞌ, catuꞌ jix stzꞌibꞌe can pax ebꞌ jun libro tiꞌ.

Jaxa An Nuevo Testamento tzꞌibꞌebꞌil An yin Griego. Jaꞌ tzet chi yal An, jaꞌton skꞌaneal Jesucristo, yet jix ali, yet jix mulnai, yet jix cam yin teꞌ culus, yet jix pitzcꞌu aoj, masantaꞌ yet jix paxa satcan.

Chi yalon pax can skꞌaneal yu ebꞌ ẍejabꞌ Jesucristo, tzet jix yun yel yich iglesia cꞌal tzet oj yun slawi can apnoj yul yibꞌankꞌinal tiꞌ. Ecꞌal libro yul an juun tiꞌ, jix stzꞌibꞌe can ebꞌ ẍejabꞌ Cristo yet watxꞌ chi kotajne eloj tzet watxꞌ chi yun cu bꞌeybꞌalneni.

Jaꞌ ebꞌ jix mulna yin jun traducción tiꞌ yin cꞌal cꞌuancꞌulal jix seyaꞌ tzet chi yal yeloc apnoj junjun libro, junjun cꞌal kꞌane cꞌal junjun frase, yet watxꞌ yin sjichanil chi yun swaꞌxi traducir yin stiꞌ Akateko. Jix skꞌan ecꞌal traducción yin Castilla, wanxa stiꞌ ebꞌ Maya eyecꞌ scawilal ebꞌ Akateko yetoj pax oj, jix yil ecꞌal traducción yin Ingles.

Jix yun jaxca tuꞌ yet watxꞌ chi yotajne el skꞌane Dios ebꞌ ánima, jaxca chi yun yalon bꞌey Apocalipsis 1:3: “Jaꞌ mac chi awten a tzet chi yalaꞌ, cꞌal ebꞌ chi abꞌeni, caw watxꞌ yet ebꞌ, ta chi sjije ebꞌ tzet chi yalaꞌ.”

Chi yalon cꞌal pax bꞌey Apocalipsis 7:9: “Jix lawi tuꞌ, jix wilon an, ecꞌal ánima eyecꞌ sattaj jun despacho tuꞌ, yetoj sattaj Naj Yuneꞌ Meꞌ. Jaꞌ xol ebꞌ tuꞌ ey ebꞌ a junjun nación, junjun icꞌaale, junjun tiꞌeal, cꞌal junjun conobꞌal. Cꞌamxa chi alcha el jantaj sbꞌisil ebꞌ.”

Jaꞌ yet jix kakꞌ traducir jun Biblia tiꞌ, man kꞌane oj jix kakꞌ traducir, jaꞌton naꞌbꞌale yin wan kꞌane jix kakꞌ traducir, yet watxꞌ chi eloc naꞌbꞌale yin Akateko jaxca yin wan tiꞌe bꞌey jix tzꞌibꞌebꞌele yin sbꞌabꞌelal.

Ta tol chi kawte jantaj tzet chi yal An Biblia tiꞌ, cꞌal jantaj tzet tzꞌibꞌebꞌilcan yul, miman tzet chi kotajne eloj, chi chꞌibꞌ cu naꞌbꞌal yu an.

Ta tol chi kaoc yin cu cꞌul kawten a skꞌane Dios tiꞌ, chi cu cuyoni, chi cu bꞌeybꞌalneni, manxa jantajoj tzet chi kotajne eloj.

Jaꞌ yet chi kilon an junjuntaj el, ey wan yaliẍ letra jaxca jun tiꞌ (a), jaꞌton jun chi yij nota yajantaj xaj juun, eey snanlaj ma bꞌey slawubꞌal junjun versículo. Jaꞌ wan letra tiꞌ chi txꞌoxon eloj tol ey junoj kꞌane, ma junoj versículo yaꞌtaj snaꞌcha eloj, yu jun tuꞌ, yuxan chi skeꞌ cu seyon kil bꞌey slawubꞌal junjun xaj juun, jatuꞌ chi yalaꞌ tzet chi yal jun kꞌane tiꞌ, ma jun versículo tiꞌ.

Ey pax wan yechel ánima ma tzet eyoc yechel yul an, yet watxꞌ chi naꞌcha el ku tzet yeoc jun kꞌane tiꞌ.

Jaxa bꞌey slawubꞌal An Biblia tiꞌ ey jun yaliẍ Diccionario, ey bꞌie ma wan kꞌane ey tzet chi yal yeloc apnoj. Jatuꞌ ey can eyoj tzet chi yal yeloc apnoj junoj bꞌie ma junoj kꞌane. Ey jun chi txꞌoxoni sattaj wanoj kꞌane yul An Biblia, jaꞌton jun estrella tiꞌ.* Jaꞌ chi yalaꞌ tol jaꞌ jun kꞌane tuꞌ eyoc yul jun Diccionario yet watxꞌ chi naꞌcha el ku tzet naꞌbꞌale chi kil yin jun kꞌane tuꞌ. Ey pax junxa chi txꞌoxon yul An Biblia tiꞌ. Jaꞌton jun linea jaxca tiꞌ:/ Jaꞌ chi yal yeloc apnoj tol jaꞌ wan kꞌane snan xol wan linea tuꞌ cꞌam chi ilcha yul An yel icham copia yin stiꞌ Griego, ma Hebreo. Yuxan jaꞌ yul jun Diccionario tiꞌ chi skeꞌ snaꞌcha el ku wan tzetyetal man otajbꞌil ku yul cu tiempoal tinaniꞌ, cꞌal bꞌey cu lugar tiꞌ.

Jacꞌalaꞌ, ey pax wan mapa bꞌey chi lawi apnoj jun yaliẍ Diccionario tiꞌ, jaꞌ wan mapa tiꞌ, chi txꞌoxoni bꞌeytuꞌ chi kanoc wanoj conobꞌ chi bꞌina yul An Biblia tiꞌ. Chi xꞌox pax wan lugar ma wan conobꞌ eyecꞌ yet stiempoal Antiguo Testamento yetoj cꞌal yul stiempoal Nuevo Testamento. Ey pax wanxa mapa chi txꞌoxoni bꞌey chi can conobꞌ Israel yetoj bꞌey chi can cu nación tiꞌ.