Moneŋ qanaŋ râe bâmoc eniŋte jazawec
9
Mitiŋic ehâmo‐jarehuc moneŋ jareniŋte i sâcne manaŋgopieŋ, irec wemocte boc qâreŋke‐ŋarepemu.* 2 Akaia opâ ruac ŋoŋe jara raŋɋanao biac afeckerâ moneŋ bâbâfua fuŋkembiŋ, irec binaŋ Makedonia ŋic bajarepe ŋic gâcne sâko jaŋe ʒoɋac‐ŋeŋicte biŋe manarâ bujeŋic âeckewec. 3 No muafec‐ŋopapo i racne ezacte âgofâc‐nane sorec‐jopape fâpie mupo iŋuc hâcne erâ ʒawienʒepieŋ. 4 No nahac ʒâhec Makedonia ŋic jaŋehec fâpe moneŋ rârâere bititiepie dâŋnane wawahane eme no â ŋoŋe mâmâc mimienʒipeŋ. 5 Irec hâcne ŋic ejarepe bânierâ fâŋgopieŋ. Fâ fisipie bubiaŋ moneŋ râeniŋte nazambiŋ i qanaŋ râe bâmoc epie ŋezejec. Eme micneneŋte moneŋ mâcne, mitire bubiaŋte moneŋ ezejec. Buafecko wiac qiqikiŋ irec Anutuzi maname biaŋkeekac
6 Erâ ine ʒiŋuc mukopac: Moc e wiac afecne he sarac eocmu, e wiac afecnea nâ roroc eocmu, â moc e wiac ŋemâcne he sarac eocmu e wiac ŋemâcnea nâ roroc eocmu.* 7 Irec ʒiŋuc efârezo: Moc e buafec‐ticnere sâcko wiac‐ticne qikiŋnezejec, jâiŋko me micneneŋte misac. Wiac buafec qikiŋneocmu, ŋic iŋucnere Anutuzi maname biaŋkeocmu.* 8 Anutu e tâpiri runezi buafec‐ticnere jambuŋ‐ŋopame mâriri fua‐ŋareme ŋaŋacne nâ bac eipiehuc bâmec gie fuŋne fuŋne baniŋte wiac mi basaniŋmu. 9 Dâŋqâreŋ ʒiŋuc hâcne fokac:
“E kada bahuc ŋic hapetac bâmec bajareekac,
â buafec‐ticne i tofamâc fohuc juocmu.”*
10 Ŋic ukicne bâfua‐jareme he sarac eeŋgopieŋ â fârine bâfua‐jareme nâ bac eeŋgopieŋ, Anutu e hâcne ŋoŋe wâc he sarac eniŋte ukicne bâfua‐ŋarerâ jambuŋkeme buafec‐ŋeŋicte fârine fua sawec eocmu.* 11 Eme mâriri sâkohec erâ ŋic bâmec fuŋne fuŋne bajarepie jaŋe nâŋâcnere erâ Anutu daŋge mumuteŋ ecneniŋmu.* 12 Ŋoŋe mitiŋic bubiaŋ wiac ejarepie izi roroc‐jeŋic jâpeocmu sawa mâcne, izi daŋge mumuteŋ irec mâriri wâc bâfuame Anuturao qacneocmu.* 13 Ŋoŋe Kristore Biŋebiaŋ mana rereŋ eeŋgopieŋ irec fuŋne bubiaŋ wiac‐ŋeŋiczi bataniŋkeme Jerusalem haeonec mitiŋic â opâ ruac gâcne sasawa jaŋehec ââgo ʒuʒuhuc‐ŋeŋic fuame Anutu mumbiaŋkeniŋmu. 14 Erâ ŋoŋerao Anutu miti‐ticnere fârine fua sawec ekacte maŋzi ʒâfic‐ŋopahuc ŋoŋere erâ Anutu numucneniŋmu. 15 Anutu buafec‐ticne i wemocko sâcne mutaniŋkezo, irec mâc wareckehuc daŋge âzâcnenaŋ.