Paulo e Judaŋic âgofâcne jaŋere buʒâic manawec
9
No Kristore ŋiczi burec mi ehuc dâŋ jâmbomac mupe mananiŋ. Tiri Mârozi maŋnane batamaehame mana‐jâmbâŋkehuc ŋazape: 2 No busâqoc fârine manahuc maŋnane wemo afecne fârorockeekac. 3 Judaŋic âgofâc‐nane, soctofafâc‐nane hâcne, jaŋere erâ no nahac Kristore sacmaŋkonec wawahare sâcne afeckezapo.* 4 Jaŋe hâcne Israe ŋic, eme Anutuzi fuŋfuŋfâc‐ticne bacjopawec, ehuc tâpiri tatamac‐ticne jowatuwec. Erâ jaŋehec ʒâʒâfic erâ sâcmutâc dâŋ mufua‐jarewec â mai ecnehuc juniŋte hatane jowatuwec. Erâ wâc biŋedâŋ jazawec.* 5 Â mimiŋnefâc‐jeŋic jaŋe mitire fuŋqizecne jumbiŋ. Eme Kristozi ŋicsahac rohuc fuawec i jaŋere guruo fuawec. Wiac sasawa irec Wofuŋ jukac, Anutu hâcne, e mumuteŋheczi mumuteŋhec juraʒihuc juzejec sanaŋ. Jâmbomac.* Mitihec jaŋe Anuture ŋicfâc
6 Wiac iŋuc fuawec irec Anuture dâŋ dodocne ewec mi muzo. Israeraonec fuambiŋ jaŋe Israe ŋic fârine ninic mi efârembiŋ.* 7 Â Abrahamte tofafâc jaŋe ɋâricfâc‐ticne fârine wâc mi efârembiŋ. Eme irec hâcne dâŋ ʒiŋuc âzâcnekicne: “Isakare ɋâricfâc jaŋe sawa gore biŋe eniŋmu.”* 8 Dâŋ irec fuŋne ʒiŋuc fokac: Sahaczi Abrahamtao fuambiŋ sâc Anuture ŋicfâc mi efârembiŋ, biŋedâŋko fuakicne jaŋe sawa Abrahamte ɋâricfâc fârine embiŋ.* 9 Biŋedâŋ kecʒiŋuc mukicne: “Jara moc tarame Sarazi motec rorâ bajuhame mocwâc warepemu.”* 10 Erâ i sawa mâcne, Rebekarao sâc ijaha fuawec. E mimiŋne‐nâŋec Isaka ehec juhuc motec jajahec kiwec‐jofawec.* 11 Eme motec jahe mi fuahuc wiac biaŋne me sâqocne mi ehapire Anutuzi jahere ʒiŋuc âzâcnewec: “Hahaczi ɋare kiŋaŋ qazejec.” 12 Ine Anutu mumupaŋ‐ticne sanaŋkeocte manasuhuc motec juju‐jekicte mâcne, e jahacne maŋte ro bârâwiŋ ejactehuc dâŋ i muwec.* 13 Irec dâŋ moc ʒiŋuc hâcne fokac: “No Jakobore enarewec â Esaure takicnuwec.”*
Anutu e juju bapa‐nâŋecte mâcne, buuruc‐ticnere ehâmo‐nâreekac
14 Eme irec weniŋuc muzo? Anutu erao guriŋ bapa hehesicne moc fokac me? I aric kereŋne.* 15 E Mose dâŋ ʒiŋuc âzâcnewec: “No ŋic moc akickezo murâ akickepemu â ŋic moc buuruc ecnezo murâ ecnepemu.”* 16 Irec ŋicmaŋte me ŋic eebapare mi muzo, Anutu buuruc‐ticnere sawa muzo.* 17 Anutuzi Farao dâŋ âzâcnewec, irec miti papiao ʒiŋuc qâreŋkekicne: “No gorao tâpiri‐nane bataniŋkepe ʒâŋe biŋe‐nane mâreŋ sâc raocte muhuc âkendâŋgupo hâcne.”* 18 Eme irec Anuture ʒiŋuc manazo: E ŋic moc akickezo murâ akickeocmu â moc e maŋne bâzickezo murâ bâzickeocmu.* 19 Eme ŋifecne ʒiŋuc mecne nazacmu: “Anutu e ŋic nâŋâcne wemocte maname sâqoreekac? E wiac moc ezo mume ŋiczi aka hehecne i mi fokac.” 20 Ŋic go wemogere Anuture dâŋ mucmu? Kuʒizi wemocko kuzi bapa ʒiŋuc âzâcneocmu: “Go wemocte sâc iŋucne bacnumeŋ?”* 21 Me kuʒi bapa e afe izia kuʒi gâcne ŋic jaŋere biŋe â gâcne bec qâto jaŋere biŋe bame sâqoreocmu me?*
Miti runezi râpene embiŋ
22 Eme Anutu e kuʒi kimbeŋ‐ticnere biŋe, ʒâhecko qanʒaŋ‐joparâ behec‐jopaocte maname fokac, kuʒi i jaŋerao ʒika bâfuahuc tâpiri‐ticne bataniŋkeocte sifu bumâteŋ‐ticnere erâ jâbu ejare warehuc juekac.* 23 Erâ ŋifecne kuʒi buuruc‐ticnere biŋe, juku eri tatamac‐ticnao biric‐jopaocte maname fokac, kuʒi i jaŋerao eri aŋac mâriri hejareocte bacjopa juekac.* 24 Eme Judaŋic sawa mâcne, qâpuc mâmâc kuʒi buuruc‐ticnere biŋe enaŋte hefârec‐nâpoekac. 25 Eme irec porofete Hoseare papiao dâŋticne ʒiŋuc fokac:
“Ŋicguru mi rucjopapo jaŋe ‘nore ŋicfâc’ mucjopapemu,
â biŋemâc juwec e ʒâŋene ‘joroc‐nane’ mucnepemu.”*
26 “Eme ‘ŋoŋe nore ŋicfâc aricne’ ŋazakicne,
mâreŋ ira wâc ʒâŋe‐jeŋic ‘Anutu jujunere naru motecfâc’ fuaocmu.”*
27 Erâ Jesajazi hahaŋne bahuc Israe ŋic jaŋere ʒiŋuc muwec wâc: “Israe qâricfâcne jaŋe hâwecmecko moŋgeŋ fokac irec sâc bâfuazo murâ bâfuaniŋmu, eme sifu uuc ʒanʒaŋne sawazi biaŋkeniŋmu.”* 28 Wofuŋ e mâreŋko dâŋticnere fârine ɋeŋnea bâfuame fideteŋ efâreocmu. 29 Jesajazi findaŋdâŋ moc ʒiŋuc hâcne muwec:
“Sambâŋ momori jaŋere Wofuŋ e ŋicukic
moc mi getâc‐jopa‐nâreme muzac,
ine Sodom jaŋere sâc bâfuanʒapeŋ,
â Gomora jaŋe iŋucne enʒapeŋ.”*
Judaŋic jaŋe tiŋke biaŋ eniŋte eipiembiŋ
30 Eme ʒi weniŋuc muzo? Kecʒiŋuc: Ŋic qâpuc tiŋke biaŋ eniŋte mi fotariembiŋzi tiŋke biaŋ embiŋ, mamanasiŋte tiŋke biaŋ embiŋ hâcne.* 31 Â Israe ŋic sâcmutâc dâŋ reŋkehuc tiŋke biaŋ eniŋte fotariembiŋzi sâcmutâc dâŋ bâmâmâckembiŋ.* 32 Wemocte? Ʒiŋucte: Jaŋe mamanasiŋte mâcne, mâc juju bapa‐jeŋicte tiŋke biaŋ eniŋte mumbiŋ. Ehuc hatao qânâ fowec ira kike‐jeŋic hezumbiŋ.* 33 Kecʒiŋuc hâcne qâreŋkekicne fokac:
“Manakic, no Zioŋ haeo qânâ moc râekopac
ira kike‐jeŋic hepirickeniŋmu,
â buse ŋeŋene moc hekopac ira heariweniŋmu.
Eme moczi e manasiŋkeocmu ine mi qurutuaocmu.”*