Paulo â Banaba jahe dâŋte Jerusalem haeo fepic
15
Judaia mâreŋkonec opâ ruac gâcne Antiokia haeo rarâ kikefuŋte ŋic ʒiŋuc jazambiŋ: “Ŋoŋe Mosere dâŋ sâcko sahac‐ŋeŋicko ma mi bahuc Wofuŋte biŋe sâcne mi eniŋmu.”* 2 Iŋuc muhuc Paulo â Banaba jahehec mufec muwahac ehuc qaqatarac sâko embiŋ. Eku ʒiŋuc mumockembiŋ: “Paulo â Banaba erâ opâ ruac jaŋeraonec ŋic tucne jaŋe dâŋ i aposolo â mitire micne Jerusalem haeo juŋgopieŋ jaŋerao baranʒepieŋ.”* 3 Iŋuc murâ kikefuŋzi sorec‐jopahuc mâzoc‐jopapie rambiŋ. Rahuc Foinike â Samaria mâreŋ fotâcnehuctecne opâ ruac ʒiŋuc jaza rambiŋ: “Qâpuc bocjahazi mitio raʒiŋgopieŋ.” Jazapie manarâ jaŋerao bubiaŋ kâcɋene fuawec. 4 Eme raku Jerusalem haeo fisipie opâ ruac kikefuŋ â aposolo â mitire micne jaŋe mu ʒeri ejarehapie, Anutuzi neŋgoc ŋesiŋ ŋejarehame miti gie bapie fârinehec ewec, irec dâŋ binaŋ ejarembiŋ.* 5 Dâŋ binaŋ etara‐jarepie opâ ruac gâcne farisaio jaŋere guruoneczi ʒiŋuc mumbiŋ: “Ŋic qâpuc sahac‐jeŋicko ma bazo â Mosere sâcmutâc dâŋ reŋkeniŋte mu hezuc ejarezo. I tâmiric mitio rocjopapie mi sâckeocmu.” Petorozi dâŋ jazawec
6 Eme aposolo â mitire micne jaŋe dâŋ i muniŋte buc tumaŋnembiŋ. 7 Tumaŋnerâ dâŋ hec hetikic eku Petorozi faharerâ ʒiŋuc jazawec: “Qomâfâc‐nane, ŋic qâpuc Biŋebiaŋ bâtâcnerâ jajaza ine Anutuzi mârâcko âgo‐ŋeŋic no bâwosâecnume jazape manarâ Jesure kikefuŋ embiŋ i ŋoŋe manaŋgopieŋ.* 8 Eme Anutu e maŋ hohonezi Judaŋic nâŋâc Tiri Mâro nârewec iŋuc jaha ŋic qâpuc jarehuc fuŋne nâwotuwec. 9 Jaŋe e manasiŋkepie maŋjeŋic ʒure bâpiaŋ ejarehuc nâŋâc enârewec sâc ijaha jaŋe ejarewec.* 10 Irec ŋoŋe wemocte Anuture sâc jâuruhuc tagi ŋemâcne sâko, kâcɋenefâc‐nâŋec â nâŋâc deipiembeŋ ijaha qâpuckonec opâ ruac jaŋere faio râezo muŋgopieŋ?* 11 Iŋuc misac, nâŋâc ʒiŋuc manaeŋgopeneŋ, bibiaŋke i Judaŋic â qâpuc mâmâc Wofuŋ Jesu anonoc‐ticnere erâ biaŋkeeŋgopeneŋ.”* 12 Eme tumaŋnekicne sasawa jaŋe mâc fâsâerâ ŋefârembiŋ. Ŋehapie Paulo â Banaba jahe Anutuzi gieŋic jucnehapire qâpuc jaŋerao mâsi fuŋne fuŋne bawec irec mu binaŋ ehuc jazapic.
Jakobozi dâŋ jazawec
13 Jazaku jaza‐fârepire Jakobozi dâŋ ʒiŋuc jazawec: “Âgo bureŋ, dâŋ mupe mananiŋ.* 14 Anutu e qâpuc guruonec ŋic rocjopame biŋefâc‐ticne eniŋte hata bâfuawec, irec dâŋ binaŋ Simoŋzi mume manambeneŋ.* 15 Eme ere dâŋzi findaŋdâŋko iticnekac. Porofete jaŋere dâŋqâreŋ moc kecʒiŋuc hâcne fokac:*
16 ‘Noni juku risierânec
Dawidire boze ʒaŋkekicne heɋârepemu
â sesucne qâʒurerâ ʒumururuckepemu.*
17 Eme ŋic ʒanʒaŋne Wofuŋ wira basac ecnenʒepieŋ,
â ŋic qâpuc biŋefâc‐nane erâ iŋuc jaha enʒepieŋ.
18 Wofuŋ e dâŋ iŋucne mufua wefuhuc juweczi mukac hâcne.’*
19 Irec no mana wosâerâ ʒiŋuc mukopac: Qâpuc guruoneczi Anutu maickeŋgopieŋ jaŋe tagi sâko mi râe‐jarenʒepeneŋ. 20 Jaŋe nemuɋâŋte wiac mamakâcne â sasec boe sau â qowi bituakicne â qowisoc, wiac i bâec baniŋte mupaŋkerâ papia qâreŋke‐jarenʒepeneŋ.* 21 I ʒiŋucte enʒepeneŋ: Mosere dâŋ i mimiŋzi ɋâric mârâc jaha fuŋkerâ hae sâc wose warehuc jukicne, â ʒiŋuczia wâc iŋuc jaha sabata hombaŋ sâc mitificne ficne wose manac eeŋgopeneŋ.”*
Jerusalem haeonec mitiŋic jaŋe qâpuc guruonec jaŋere papia qâreŋkembiŋ
22 Eme aposolo â micne jaŋe kikefuŋte ŋic sasawa jazapie manapie sâckeme jaŋeraonec ŋic jajahec bâwosâec‐jofambiŋ. Moc ʒâŋene Juda, ʒâŋe‐ticne moc Basaba, erâ Sila, mitire micne bapa jahe hâcne bâwosâec‐jofarâ Paulo â Banaba jahehec mâmâc Antiokia haeo raniŋte sorec‐jopambiŋ. 23 Ehuc papia moc ʒiŋuc muhuc qâreŋkerâ jarepie barambiŋ: “Qomâfâc‐ŋeŋic aposolo â mitire micne nâŋe qomâfâc‐nâŋec qâpuc guruonec Antiokia haeo â Siria â Kilikia mâreŋko juŋgopieŋ ŋoŋe mu ʒeri eŋarehuc papia ʒi râe‐ŋareŋgopeneŋ. 24 Nâŋe mi manahapene ʒirec ŋic gâcne ŋoŋerao fârâ dâŋ ŋazahuc maŋ bâsifuc eŋarepie ŋoŋerao dâŋ fâfâuc fuawec.* 25 Eme nâŋe i manarâ tumaŋne‐fârehuc ŋic jajahec bâwosâec‐jofarâ qomâ jahec‐naŋec Banaba â Paulo jahehec sorec‐jopapene fâŋgopieŋ. 26 Ŋic jahe hâcne Wofuŋ‐nâŋec Jesu Kristo ere erâ juju‐jekic qikiŋnepic. 27 Eme ŋic bâwosâec‐jofambeneŋ Juda â Sila, jahe fârâ dâŋ i miczi wâc ŋazapire mananʒepieŋ. 28 Tiri Mâro â nâŋe tagi gâcne moc mi ʒuhuckehuc wiac kecʒiŋuc sawa ine râe‐ŋarenaŋte mumockembeneŋ:* 29 Ŋoŋe nemuɋâŋte taha bâzi â qowisoc â qowi bituakicne â sasec boe sau i râpecke sanaŋkenʒepieŋ. Biaŋne junʒepieŋ.”
Juda â Sila risiepic
30 Eme kikefuŋ jaŋe ŋic i hâcne jaza mâzoc ejarepie rambiŋ. Raku Antiokia haeo fisirâ opâ ruac guru hetumaŋ‐joparâ papia jarembiŋ. 31 Jarepie wose manac erâ âgodâŋ qâreŋke‐jarembiŋ irec bujeŋic biaŋkewec. 32 Eme Juda â Sila jahe porofete jupiczi dâŋ bocjaha muhuc mu âkeriŋ ejarerâ mitio dopec‐jopapic.* 33 Eme jaŋehec juju dameŋ i tarame neŋgocfâc‐jekic jaŋerao risienicte bubiaŋko râe mâzoc ejactembiŋ. [ 34 Sila e ine jaŋerao juocte muwec.]
Paulo miti kiŋaŋ mocwâc rame jajahec ewec
Paulo e Sila jowame mâmâc rapic
35 Paulo â Banaba jahe Antiokia haeo ʒuhuckerâ jupic. Ehuc mitiŋic gâcne jaŋehec babafic erâ Wofuŋte dâŋ ŋic jaza qazuc embiŋ. 36 Juku Paulozi Banaba ʒiŋuc âzâcnewec: “Nâhâc miti kiŋaŋ rahuc Wofuŋte dâŋ mupere hae sâc âgofâc‐nâhec fuambiŋ jaŋe weniŋuc juŋgopieŋ i ra hone manac ejarezeperec.”* 37 Iŋuc mume Banaba e Johane Mareko mâmâc raniŋte muwec.* 38 Eme Mareko e mârâcko jahehec raku Pamfilia mâreŋko gie furunao fisirâ behec‐jofarâ risiewecte Paulozi ehec raniŋte maname mi sâckewec.* 39 Ehuc Banabahec mu qaqatarac sanaŋne eku râwiŋnepic. Râwiŋnehuc Banabazi Mareko jowame ra wokeo ferâ Kipiro nucko rapic.* 40 Paulo e ine Sila rowosâeme opâ ruac jaŋe Wofuŋte jauŋko râec‐jofahuc mâzoc‐jofapie rapic. 41 Rahuc Siria â Kilikia mâreŋ fotâcnehuc Jesure kikefuŋ mu basanaŋ ejarepic.