5 “Ʒi ine sorecnuwec erao fezo ehape ŋoŋeraonec moczi moc ʒiŋuc mi wio‐narekac: ‘Go wena racmu?’^* 6 Dâŋ iŋucne ŋazakopacte mâc busâqoczi maŋŋeŋic fusucmakac. 7 No dâŋ jâmbomac mupe mananiŋ: Risie fepemu i ŋoŋerao fârine fuaocte fepemu. Mi fezapo muzac, neŋgoc ŋesiŋzi mi wahazac. Ferâ ine sorepe wahaocmu.^* 8 Waharâ ŋic fuŋne bataniŋke‐jareme ʒiŋuc mananiŋmu: Kiŋ fokac â tiŋke biaŋ fokac â okacne dâŋ mumutara fokac.^* 9 Kiŋte fuŋne ʒiŋucko mananiŋmu: Jaŋe no mi manasiŋnueŋgopieŋ.^* 10 Tiŋke biaŋte fuŋne ʒiŋucko mananiŋmu: No Mamactao risie fepe mocwâc mi honecnuniŋmu.^* 11 Okacne dâŋ mumutara irec fuŋne ʒiŋucko mananiŋmu: Mâreŋ ʒirec ŋicbomboŋ okacne dâŋ biac mutaracnekicne.^*

12 “Dâŋ ŋaŋazane bocjaha fokac, erâ dameŋ ʒiŋuczia ŋazape wemocko amecke‐fâreniŋmu.^* 13 Dâŋ fâri qizecnere Mâro eki ine waharâ dâŋ fâri qizecnere ʒâkâŋko bâutuc‐ŋopaocmu. E jahacne maŋte dâŋ mi ŋazaocmu, mutâcnecnekicne sâc ŋazaocmu, erâ juku wiac fuaocmu i wâc mufua‐ŋareocmu.^* 14 Dâŋ i no nahacne rowaŋkonec rorâ mujaŋgeŋke‐ŋareme nore huriri qâreŋ fuaocmu. 15 Mamactao wiac fokac irec rune no. Irec hâcne mupac, ‘Nore rowaŋkonec rorâ mujaŋgeŋke‐ŋareocmu.’^*

16 “Dameŋ bembeŋne fokac, i tarame rape basacnuniŋmu. Erâ irec faicnao dameŋ bembeŋne jaha wâc fokac, i tarame warepe honecnuniŋmu.”^* 17 Iŋuc mume motec jaŋe nazaŋ gazaŋ erâ ʒiŋuc mumbiŋ: “Weniŋucte dâŋ kecʒiŋuc mukac? ‘Dameŋ bembeŋne fokac, i tarame rape basacnuniŋmu, erâ irec faicnao dameŋ bembeŋne jaha wâc fokac, i tarame warepe honecnuniŋmu.’ Â moc ʒiŋuc mukac: ‘Mamactao fepemu.’” 18 Iŋuc murâ harierâ mumbiŋ: “‘Dameŋ bembeŋne fokac,’ iŋuc wemocte mukac, nâŋe kâuc baŋgopeneŋ.” 19 Wiocnezo epie Jesuzi hone tarac‐joparâ ʒiŋuc jazawec: “Dâŋ kecʒiŋuc ŋazapacte muc manac eŋgopieŋ, ‘Dameŋ bembeŋne fokac, i tarame rape basacnuniŋmu, erâ irec faicnao dameŋ bembeŋne fokac, i tarame warepe honecnuniŋmu.’ 20 No jâmbomac jâmbâŋ ŋazape: Ŋoŋe ki mamakuc ehapie miti tâmiriczi ʒeri eniŋmu. Ŋoŋe busâqocko juniŋmu, ehame busâqoc‐ŋeŋiczi ŋerisieme bubiaŋ fuaocmu. 21 Ŋokac moc e motec roocte dameŋne maickeme ʒâic manaocmu. Izi motec rome ʒâic omaeme, ɋâric fuajec irec bubiaŋ manaocmu.^* 22 Eme ŋoŋe iŋuc jaha dameŋ ʒiŋuczia buʒâichec juniŋmu. Juhapie mocwâc risierâ honec‐ŋopape bubiaŋ bâfuaniŋmu. Eme bubiaŋ i moczi mi qâsua‐ŋareocmu.^* 23 Eme dameŋ ira wiac mocte mi kâuc barâ wio‐nareniŋmu. No jâmbomac jâmbâŋ ŋazape: Ŋoŋe Mamac wiac mocte numucnepie ʒâŋe‐nanere erâ ŋareocmu.^* 24 Juwarembiŋ ira nore ʒâŋe bajuhuc mi numu jumbieŋ. Ʒi ine numurâ ropie bubiaŋ‐ŋeŋiczi fua sawec erâ fufuse fozejec.^*

25 “Dâŋ ŋaza warehuc jupo i suŋsuŋne qahuc ŋazapo. Juku dameŋ moc maickeocmu ira ine dâŋ suŋsuŋne mi muhuc, Mamacte fuŋne mâc mutaniŋkerâ ŋazapemu.^* 26 Dameŋ ira ʒâŋe‐nane bajuhuc numupie noni ŋoŋe bâsâoc‐ŋopahuc Mamac ââzâcne i mi epemu. 27 No Mamactaonec wahapo, dâŋ i mana ʒakiehuc maŋjauŋ enareeŋgopieŋte Mamac e jahac wâc iŋuc jaha maŋjauŋ eŋareekac.^* 28 No Mamac beherâ mâreŋko wahapo, eme ʒi mâreŋ beherâ Mamactao mocwâc fekopac.” 29 Iŋuc mume motec jaŋe ʒiŋuc âzâcnembiŋ: “Ʒi dâŋ suŋsuŋne mi muhuc mâc mutaniŋkerâ nâzâkomec hâcne.^* 30 Irec gore ʒiŋuc manaŋgopeneŋ: Ŋic jaŋe mu wioc mi egarehapie go gahaczia wiac sasawa mana‐fâreekic, go Anuturaonec wahameŋ i mana ʒakieeŋgopeneŋ.”^* 31 Mupie Jesuzi ʒiŋuc jazawec: “Ŋoŋe miŋecne mana ʒakieŋgopieŋ me? 32 Dameŋ moc fokac, i biac maickeme no behecnurâ siŋsaŋ qarâ ficŋeŋic sâc rafâreniŋmu. Erâ behecnupie buc mi jupemu, Mamaczi nohec jukacte buc jâmbâŋ mi jupemu.^* 33 Nore wamazi ŋoŋerao foocte dâŋ iŋucne ŋazakopac. Ŋoŋe mâreŋko ʒârâ hâriŋ faio jueŋgopieŋ, eme noni mâreŋte micne momori fozukopacte ŋoŋe hâbi‐ŋeŋichec junʒepieŋ.”^*