Jesuzi motecfâcne kike ʒure‐jarewec
13
Aakic hombaŋ maickehame Jesuzi e jahacnere ʒiŋuc manawec: No mâreŋ beherâ Mamactao risie fepemurâ dameŋ bembeŋkekac. Iŋuc manarâ mâreŋko wiacfâc‐ticne maŋjauŋ ejarewec, i ejare tarahuc hâmoocte muwec.* 2 Eme ŋafere nânâ nâniŋte tumaŋnehapie wiac kecʒiŋuc fuawec: Simoŋ ŋokâ‐ticne Juda, Karioto haeonec, e Jesu doc baocte Sataŋzi maŋticnao qafeŋ râewec.* 3 Â Jesu e ʒiŋuc manawec: Mamac e wiac sasawa furu qârârie‐narekac, eme no Anuturaonec wahapozi mocwâc Anuturao risie fepemu.* 4 Fuŋne iŋuc manahuc nânâ nâhuc ŋembiŋkonec faharerâ ŋaqi ʒora faine i hetararâ gie qoruc jomawec.* 5 Erâ opâ râqâcko qame hume fuŋkerâ motecfâcne kike ʒure‐jarewec. Ehuc gie qoruczi bâkereŋke‐jarewec. 6 Ejare raku Simoŋ Petororao fisime ʒiŋuc âzâcnewec: “Go Wofuŋzi kike‐nane ʒurezo mukic me?”* 7 Mume Jesuzi ʒiŋuc âzâcnewec: “Wiac ekopac irec fuŋne ʒiŋuczia mi manakomec, juku ʒâhecko manacmu.” 8 Eme Petorozi ʒiŋuc muwec: “Aricne, go kike‐nane mi ʒure‐jâmbâŋkecmu.” Mume Jesuzi ʒiŋuc âzâcnewec: “Noni mi ʒurecgupe nohec maŋ ʒuʒuhuc mi jucmu.”* 9 Eme Petorozi ʒiŋuc muwec: “Wofuŋ, murâ kike‐nane sawa mâcne, me qizec‐nane mâmâc ʒurec.” 10 Mume Jesuzi ʒiŋuc âzâcnewec: “Moc e opâ ruarâ ʒâhec kike‐ticne sawa ʒureme sahacne ɋaɋacne fofâreocmu, eme ŋoŋe iŋuc jaha ɋaɋackembiŋ, erâ ɋaɋacnea mi jufâreŋgopieŋ.”* 11 E doc bapa‐ticne mana tarahuc ʒiŋuc jazawec: “Ŋoŋe ɋaɋacnea mi jufâreŋgopieŋ.”* Kike ʒuʒurere fuŋne jazawec
12 Kike‐jeŋic ʒure‐fârerâ ŋaqi ʒora‐ticne mocwâc heme hume waha ŋehuc ʒiŋuc jazawec: “No wiac eŋarepac irec fuŋne manaŋgopieŋ me? 13 Ŋoŋe Qaqazu â Wofuŋ munareeŋgopieŋ, erâ iŋeŋic jukopacte sâcne munareeŋgopieŋ.* 14 Eme no Wofuŋ â Qaqazu‐ŋeŋiczi kike‐ŋeŋic ʒure‐ŋarepacte ŋaŋaczia iŋuc jaha kike ʒuʒurec erahuc jupie sâckezejec.* 15 Mâsi eŋarepac izi juju bapare ma qâreŋ‐ŋeŋic eme i honehuc, eŋarepac irec sâc ehuc junʒepieŋ.* 16 No jâmbomac jâmbâŋ mupe mananiŋ: Kiŋaŋ moteczi bomboŋ‐ticnere sâc sirickerâ jujune i mi fokac, â sorekicnezi sorewec ere sâc sirickerâ jujune i wâc mi fokac.* 17 Eme dâŋ i manapaŋkerâ irec sâcko jupie no ŋoŋere manape ʒerine eocmu.* 18 No dâŋ mupe mâmâc sasawa mi rocŋopakac. No wenimoi rowosâec‐ŋopapo i manakopac. Dâŋqâreŋ moc kecʒiŋuc fokac, i sanaŋkeocmu hâcne: Nânâ bâfâuc ecneekopac eki wâc bunaneo bakac.* 19 Wiac i mi fuahame qanaŋ ŋazakopac, eme ʒâhec fuame, e Wofuŋzi qanaŋ manahuc muwec, nore iŋuc munʒepieŋ.* 20 No jâmbomac jâmbâŋ ŋazape, moc e gie muŋarekicne ŋoŋe hezu hewâneŋ eŋareocmuzi gie rune no hezu hewâneŋ enareocmu, â moc e no enareocmuzi sorecnuwec e hezu hewâneŋ ecneocmu.”*
Jesuzi Juda mutaniŋkewec
21 Jesu e dâŋ iŋuc murâ bu ʒaʒamaŋne fâuckezo eme mutaniŋkerâ ʒiŋuc jazawec: “No jâmbomac jâmbâŋ mupe mananiŋ, ŋoŋeraonec moczi no doc bacnuocmu.”* 22 Iŋuc mume motec jaŋe hohonec efârerâ, i more mukac, muhuc kâuc bambiŋ. 23 Eme motec moc Jesure maŋfuŋko ŋewec, e bufuŋ jâmbâŋ‐ticne,* 24 e hâcne Simoŋ Petorozi mezi sâsâc ecnerâ muwec, “Wiocnetec gazaoc, more mukac?” 25 Eme motec eki hâcne qizec‐ticne Jesure amecko fohorerâ muwec, “Wofuŋ go more mukic?” 26 Eme Jesuzi muwec, “Poroŋ sicko âke uruckerâ râcnepe nâocmu ere hâcne mukopac.” Iŋuc murâ poroŋ sicko âke uruckerâ Simoŋ ŋokâ‐ticne Juda, Karioto haeonec, e râcneme nâwec. 27 Nâme Sataŋzi maŋne sakioŋkewec. Eme Jesuzi ʒiŋuc âzâcnewec: “Wiac ezo mukomec, i biac jaha ezemec.”* 28 Dâŋ iŋuc âzâcneme gâcne mâmâc ŋembiŋzi mi mana‐hâmombiŋ. 29 Ehuc tucnezi ʒiŋuc mumbiŋ: “Juda e moneŋ kânoŋ wirec‐nâŋec bajukacte hombaŋte wiac moc furine baocte sorekac, me ŋic hapetac moneŋ jareocte mukac.”* 30 Eme Juda e poroŋ nârâ izia ŋafe fuaha rawec.
Jesu e huriri qâreŋ‐ticnere muwec
31 Juda rame Jesuzi motec gâcne ʒiŋuc jazawec: “Ʒi Ŋic Fâri Wâtuŋne e huriri qâreŋ‐ticne fuakac, eme ere erâ Anuture huriri qâreŋ mâmâc fuakac. 32 Ŋic Fâri Wâtuŋnezi Anuture huriri qâreŋ bâfuawecte Anutu e jahac Ŋic Fâri Wâtuŋne ere huriri qâreŋ iŋuc jaha bâfuaocmu, dameŋ mi ʒorahame biac bâfuaocmu.* 33 Motecfâc‐nane, no dameŋ bembeŋne mac moc ŋoŋehec jupemu. Eme ʒâhec basacnuniŋmu. Eme Judaŋic jazapo ijaha ŋoŋe ŋazape: No rapemu ijaha sâcne mi fâniŋmu.* 34 Eme ʒi sâcmutâc dâŋ ɋâricne ŋazape: Maŋjauŋ eec enʒepieŋ, noni maŋjauŋ eŋare warehuc jupo iŋuc jaha ŋaŋackoaŋ maŋjauŋ eec enʒepieŋ.* 35 Maŋjauŋ eec epie ŋic jaŋe honec‐ŋopapie motecfâc‐nane juŋgopieŋ ezejec.”
Jesuzi Petoro findaŋdâŋ âzâcnewec
36 Eme Simoŋ Petorozi wiocnerâ muwec, “Wofuŋ, go wena racmu?” Eme Jesuzi muwec, “No rapemu ijaha ʒiŋuczia sâcne mi fâcmu, juku ʒâhec ine fâzemec.”* 37 Eme Petorozi ʒiŋuc muwec: “Wofuŋ, no wemocte ʒiŋuczia sâcne mi fâpemu? No gore erâ juju‐nane sâcne qikiŋnepemu.” 38 Mume Jesuzi ʒiŋuc âzâcnewec: “Go nore erâ jujuge qikiŋnezo mukomec me? No jâmbomac jâmbâŋ gazape: Qâqâczi mi dâŋehame goki jahec â moc mic bacnucmu.