Ŋic ʒâŋe tiŋtuŋ moc ere dâŋ
9
Jesu e hata rahuc ŋic moc neŋgoc bumaŋkonec tiŋtuŋ fuakicne e bâfuawec.* 2 Eme motecfâcne jaŋe wiocnerâ mumbiŋ, “Qaqazu, more kiŋte tiŋtuŋ fuawec, e jahacne me neŋgoc mamac jahere?”* 3 Mupie Jesuzi ʒiŋuc jazawec: “Irec aricne, e jahacne kiŋte me neŋgoc mamac jahere kiŋte mâcne, Anutu tâpiri‐ticnere fuŋne erao taniŋkeocte iŋuc fuawec.* 4 Nâŋâc sorecnuwec ere gie ʒoaŋkoa bahuc junʒepeneŋ, ŋafe fuame gie bapane arictac eocmu.* 5 No mâreŋko jupemu sâc ʒoctamac‐nanezi âke tamae‐ŋareocmu.”* 6 Iŋuc murâ mâreŋko tâfeckerâ afe jârickerâ ŋic tiŋtuŋ ʒâŋene ruacnerâ* 7 ʒiŋuc muhuc sorewec: “Go rarâ Siloam riqicko wânâŋge ʒurec.” (Siloam i nâŋâcne dâŋko sorekicne.) Eme ŋic e rarâ sahac‐ticne ʒurehuc ʒâŋe fitâcnewec. 8 Iŋuc erâ risieme âgofâc‐ticne jaŋe, â nânâre numu‐jarehuc juwec ŋic i jaŋe mâmâc honerâ wiwioc erâ mumbiŋ: “Nânâre numu‐nârehuc ŋeŋerâ juekac e hâcne me?” 9 Eme tucnezi mumbiŋ, “Ine hâcne.” Â tucnezi mumbiŋ, “Aricne, e tinac moc.” Iŋuc mupie e jahac muwec, “No hâcne ʒi.” 10 Eme wiocnerâ mumbiŋ, “Weniŋuc erâ ʒâŋe fitâcnekomec?” 11 Eme jazawec, “Ŋic moc ʒâŋene Jesu eki afe jârickerâ ʒâŋe‐nane ruacnerâ ʒiŋuc nazajec: ‘Go Siloam riqicko rarâ sahacge ʒurec.’ Eme no rarâ sahac‐nane ʒurerâ ʒâŋe fifi epac.” 12 Iŋuc mume wiocnerâ mumbiŋ, “Ŋic e wena jukac?” Eme muwec, “No mi manakopac.” Farisaio ŋic jaŋe ŋic tiŋtuŋ ere dâŋ mumbiŋ
13 Eme ŋic tiŋtuŋ ecnewec e farisaio jaŋerao jowa rambiŋ. 14 Eme Jesuzi afe jârickerâ ʒâŋene bâtâcnewec i sabata hombaŋko ewec.* 15 Eme farisaio ŋic jaŋe iŋuc jaha wiocnerâ mumbiŋ, “Go weniŋuc erâ ʒâŋe fifi emec?” Mupie ʒiŋuc jazawec: “E ʒâŋe‐nane afe ruacneme no ra sahac‐nane ʒurerâ ʒâŋe fifi epac.” 16 Eme farisaio jaŋeraonec gâcnezi mumbiŋ, “Ŋic e Anuturaonec aricne, e hombaŋ‐nâŋec qâsuakac.” Gâcnezi ine mumbiŋ, “E hehesic juhuc muzac mâsi iŋucne wemocko bazac.” Iŋuc muhuc qaqatarac embiŋ.* 17 Ehuc ŋic tiŋtuŋ ecnewec e indiŋkerâ mumbiŋ, “Ʒâŋege bâtâcnejec, gahac ere weniŋuc mukic?” Eme muwec, “E porofete.”*
18 Eme Judaŋic jaŋe ŋic e jâmbomac ʒâŋe tiŋtuŋ juku ʒâŋe fifi ejec, iŋuc muhuc maŋjahec erâ neŋgoc mamac jahec‐ticne hefârec‐jofarâ 19 wio‐jacterâ mumbiŋ: “Ŋokâ‐ŋekic tiŋtuŋ fuawec mukopirec ʒine hâcne? E weniŋuc erâ ʒâŋe fifi ejec?” 20 Eme neŋgoc mamac jahecne ʒiŋuc mupic: “E ŋokâ‐nâhec, i manakoperec, â tiŋtuŋ fuawec, i wâc manakoperec. 21 Erâ weniŋuc erâ ʒâŋe fifi ejec, me mozi ʒâŋene bâtâcnejec, ine mi manakoperec. Wiac e soka‐fârekicne, irec e jahacne wiocnepie fuŋne‐ticne ŋazaoc.” 22 I Judaŋic jaŋere hâwic‐jofame iŋuc mupic. Jaŋe dâŋ ʒiŋuc mujomirembiŋ: “Moc e Jesure Kristo mume miti sakarecnenʒepeneŋ.”* 23 Irec hâcne neŋgoc mamac jahec‐ticne hâwic‐jofame ʒiŋuc mupic: “E soka tarakicnere e jahacne wiocneniŋ.”
24 Eme ŋic ʒâŋe tiŋtuŋ ecnewec e mocwâc hefârerâ ʒiŋuc âzâcnembiŋ: “Go Anutu muteŋkehuc dâŋenʒaŋ, nâŋe ŋic ere fuŋne manaŋgopeneŋ, e hehesicne.”* 25 Mupie ʒiŋuc jazawec: “E ŋic hehesicne me mâcne, i mi manakopac. Â tiŋtuŋ jupozi ʒâŋe fifi epac, ine mana‐jâmbâŋkekopac.” 26 Mume harierâ wiocnembiŋ, “Weniŋuc egarejec, weniŋuc erâ ʒâŋege bâtâcnejec?” 27 Mupie ʒiŋuc jazawec: “No ŋazapac i, ŋoŋe ine mi manambieŋ; wemocte hâsine ŋazape mananiŋte muŋgopieŋ? Ŋoŋe motecfâcne ezo muŋgopieŋ me?” 28 Iŋuc mume haneckerâ mumbiŋ, “Go hâcne motec‐ticne, nâŋe ine Mosere motecfâc. 29 Mose e Anutuzi dâŋ âzâcnewec, i manaŋgopeneŋ, â ŋic e irec me irec fuarâ warewec ine mi manaŋgopeneŋ.” 30 Mupie ŋiczi dâŋ ʒiŋuc bâtikie‐jarewec: “Ʒâŋe‐nane bâtâcnejec ere fufuare kâuc bapie warec‐ŋopakopac. 31 Nâŋâc kecʒiŋuc manaeŋgopeneŋ: Anutu e ŋic hehesicne mi bafic‐jopaekac, moc e araŋ bacnehuc micne reŋkeme bafickeocmu.* 32 Â ŋic moczi tiŋtuŋ fuakicne moc ʒâŋe fifi bawec, biŋe iŋucne mâreŋ fufuaonecteaŋ moc mi mana wefukicne. 33 Irec ŋic e Anuturaonec mi waharâ muzac, gie iŋucne wemocko bazac.”* 34 Mume ʒiŋuc âzâcnembiŋ: “Sâqoc qaqocne fuakicne go iŋucnezi miti qazu‐nârekomec me?” Iŋuc murâ tuŋkembiŋ.*
Jesu mi manasiŋkehuc maŋ tiŋtuŋ juzo
35 Tuŋkepie Jesuzi manawec. Erâ bâfuarâ wiocnerâ muwec, “Go Ŋic Fâri Wâtuŋne e manasiŋkekomec?” 36 Eme ŋiczi muwec, “Wofuŋ go mukomec e mo? Nowatutec hone tararâ manasiŋkepe.” 37 Mume Jesuzi ʒiŋuc âzâcnewec: “Â go honemec, dâŋ gazakopac no hâcne ine.”* 38 Eme ŋiczi muwec, “Wofuŋ, no manasiŋgukopac”, iŋuc murâ kikefuŋnao fodapewec. 39 Eme Jesuzi muwec, “No ŋic fuŋne‐ŋeŋic bajaŋgeŋkepemurâ mâreŋko wahapo. Eme irec tiŋtuŋzi ʒâŋe fifi enʒepieŋ â ʒâŋe fifizi tiŋtuŋ enʒepieŋ.”* 40 Iŋuc mume farisaio ŋic mâmâc domambiŋ jaŋe manarâ mumbiŋ, “Â nâŋe tiŋtuŋ me?”* 41 Mupie Jesuzi jazawec: “Ŋoŋe tiŋtuŋ jurâ muzac kiŋ tâmiric enʒapiŋ. Ŋaŋac mueŋgopieŋ, ‘Nâŋe ʒâŋe fifi’, irec kiŋ foŋareocmu.”*