Maŋnâŋec bârisiepene Anutuzi akic‐nâpoocmu
13
Dameŋ ijaha ŋic gâcne fisirâ juhuc Jesu dâŋ binaŋ ʒiŋuc ecnembiŋ: “Pilatozi mume momorifâcne jaŋe Galilaia mâreŋkonec ŋic â bâzi ririkere lama bulimakaofâc‐jeŋic mâmâc joparâ socjeŋic bâsifuckembiŋ.”* 2 Dâŋ binaŋ iŋuc ecnepie ʒiŋuc jazawec: “Ŋoŋe wiac ŋemâcne i ejarekicnere ʒiŋuc moc mupie: ‘Kiŋjeŋic Galilaia ŋic gâcne jaŋere kiŋ sirickewec.’* 3 Iŋuc mâcne, gâcne ŋoŋere kiŋ fokac jaha, irec maŋŋeŋic mi bârisieniŋmuo iŋuc jaha sipricke‐fâreniŋmu.* 4 Me Jerusalemnec ŋic 18 Siloam hârâczi ŋemac‐jopawec jaŋere wâc ʒiŋuc mi munʒepieŋ: ‘Kiŋjeŋic Jerusalem haeonec ŋic gâcne jaŋere kiŋ sirickewec.’ 5 Iŋuc mâcne, gâcne ŋoŋere kiŋ fokac jaha, irec maŋŋeŋic mi bârisieniŋmuo iŋuc jaha sipiricke‐fâreniŋmu.”6 Dâŋ i mutararâ Jesuzi kesaic dâŋ moc kecʒiŋuc muwec: “Ŋic moczi jufu‐ticnao hâmeŋ moc sarame sokawec. Eme rune e fârine wasaocte ra basa jujec.* 7 Eku jufu soŋaŋ‐ticne âzâcnerâ muwec: ‘No jâc kecʒirec fârine basahuc juhape jara jahec â moc ekac. Jâc e maŋgâŋ wemocte boc domaocmu, qafaratec qaoc.’ 8 Mume soŋaŋzi ʒiŋuc âzâcnewec: ‘Bomboŋ, go behehaŋ jara ʒi domaoc, ehame noni fuŋne kinoŋzi herâ jawa sânʒâŋ hepe* 9 dameŋ mocte fârine fuaocmu me aricne i honezeperec. Aricne eme ʒâhec mutec hefarazo.’”
Jesuzi sabata hombaŋko ŋokac moc bâpiaŋkewec
10 Jesu e sabata hombaŋ mocte mitificko ferâ miti jazawec. 11 Eme mitific ira ŋokac moc ŋewec, e demoŋ moczi ecneme jara 18 ruruhuc jaha ŋeŋe juju ewec, ehuc wemocko moc fâretiŋnezac. 12 Eme Jesuzi ŋokac e honerâ hefârerâ muwec: “Ŋokac go fâretiŋnecmurâ mukopac.” 13 Iŋuc murâ meticne qizecnao râeha izia fâretiŋnerâ Anutu muteŋkewec.* 14 Jesu e ŋokac i sabata hombaŋko bâpiaŋkewecte mitific soŋaŋzi maname sâqoreme ŋic ŋokac jaza muwec: “Gie bapa 6 fokac ira warepie bâpiaŋ‐ŋopazejec, hombaŋko ine misac.”* 15 Mume Jesuzi dâŋ ʒiŋuc bâtikiecnewec: “Oi burecŋic ŋoŋe, hombaŋko doŋgi bulimakaofâc‐ŋeŋic mi fickonec firuec‐joparâ opâo bacjopa raeŋgopieŋ me?* 16 Ŋokac kecʒi e Abrahamte ɋâric, eme Sataŋzi niŋgiŋkeme jara 18 sâko ŋehuc juwec. Eme noni hombaŋko firuepe mi sâckekac me?”* 17 Iŋuc mume kisâ ecnembiŋzi mimiembiŋ. Â ŋic ŋokac guru sâkozi ine mâsi biaŋ‐ticnere ʒeri embiŋ.
Miti e nemuja hândâŋ â hâmu goreŋne iŋucne
18 Jesu e dâŋ moc kecʒiŋuc ʒuhuckerâ muwec: “Anuture uucmaŋ e wemo wiac iŋucne, wemohec sâc hepe? 19 E nemuja hândâŋ iŋucne. Ŋic moczi i jufu‐ticnao râeme âkeʒurâ jâc ewec. Eme sawa wipe jaŋe fisirâ tieŋnao herâ ŋeeŋgopieŋ.”*
20 Eme moc ʒuhuckerâ muwec: “Anuture uucmaŋ i wemohec sâc hepe? 21 E hâmu goreŋne iŋucne. Ŋokac moczi hâmu goreŋne nânâhec bâsifuckeme aŋac‐ticnezi nânâ isiricke‐fârewec.”
Sambâŋko fezore samariezo
(Mat 7:13-14, 21-23)
22 Jesu e Jerusalem haeo raocte hae sâko hae pitic rahuc miti jaza qazuc ewec. 23 Ehame ŋic moczi wiocnerâ muwec: “Wofuŋ, ŋic afecnezi mecne sambâŋko feniŋmu, me weniŋuc?” Eme Jesuzi ʒiŋuc âzâcnewec: 24 “Motâc fâŋfâŋnao raʒiniŋte sama qamariehuc raʒinʒepieŋ. No ŋazape mananiŋ: Ŋic bocjahazi raraʒire muniŋmu, murâ sifu mi raʒiniŋmu.* 25 Fic rune e motâc herâ ki bame ŋoŋe fisirâ râpenao domahuc heickerâ ʒiŋuc muniŋmu: ‘Wofuŋ, motâc ronârec.’ Mupie ʒiŋuc ŋazaocmu: ‘No ŋoŋere kâuc bakopac, ŋoŋe wenirec?’* 26 Wio‐ŋareme okacne ʒiŋuc âzâcneniŋmu: ‘Nâŋe gohec juhuc nânâ opâ nâmbeŋ â hae‐nâŋecko miti mutec manambeŋ.’* 27 Mupie ʒiŋuc ŋazaocmu: ‘Ŋazakopac i, ŋoŋe wenirec, no mi manac‐ŋopakopac, sâqocne bapa ŋoŋe behecnu‐fâreniŋ.’* 28 Eme Abraham, Isaka, Jakobo â porofete sasawa Anuture uucmaŋko juhapie honec‐jopaniŋmu. Â ŋaŋacne ine qikiŋ‐ŋopakicnere râpenao mic kikiaric kihuc ki oowa ehuc juniŋmu. 29 Ehame mâreŋ ŋifec â ŋifec, faic â juwic, irec ŋic fisirâ Anuture uucmaŋko raʒirâ tiwâ nâ ʒeri eniŋmu.* 30 Manaŋgopieŋ, ʒâhecne jaŋeraonec gâcnezi bâbâni eniŋmu, â bâbâni jaŋeraonec gâcnezi ʒâhecne eniŋmu.”*
Herodere dâŋ
31 Dameŋ ijaha farisaio ŋic tucne fisirâ ʒiŋuc muhuc âzâcnembiŋ: “Herodezi guocte mukac irec mâreŋ ʒi beherâ biac rac.” 32 Mupie ʒiŋuc jazawec: “Ŋoŋe risie rarâ qâqâto e nore ʒiŋuc âzâcneniŋ: ‘Manakic, no miŋecgac â tomâcko ŋic demoŋ jâpe‐jarepemu â ɋiɋicne bacjopapemu, fureme batarapemu. 33 Miŋecgac â tomâc fureme hata rahuc juzepac. Porofete moc e Jerusalem haeo mi fisihame qaqane mi fokac.’”
Jerusalem haeonec uŋdâŋ jazawec
34 Iŋuc murâ muwec, “O Jerusalem rune, go hâcne porofete ʒikazi jopahuc mitiŋic gorao sorec‐jopakicne qânâzi hehâmoc‐jopaekic. Qâqâczi motecfâcne qânusuc‐joparâ fakecnezi ɋoroc‐jopaekac, iŋuc jaha noni kikefuŋfâcge wemo afecne maŋfuŋ‐naneo qânusuc‐jopazo mupe qikiŋne warehuc jumbiŋ. 35 Irec fic hae‐ŋeŋic behepe tuhune fuazokac. Mupe mananiŋ: Ŋoŋe mocwâc mi hohonecnu juraku ʒiŋuc muhuc honecnunʒoŋgopieŋ: ‘Wofuŋte micte warekac e mumbiaŋkenaŋ.’”*