4 Dâŋ irec sâcko Johane Miti Opâ fufuŋkezi mâreŋ burocnao fua tâcnerâ, maŋjeŋic bârisierâ Miti Opâ ruapie sâqocne‐jeŋic tâmireocte jazawec. 5 Eme Judaia mâreŋko â Jerusalem haeo ŋic jumbiŋ jaŋe hegarackerâ erao rarâ sâqocne‐jeŋic mufuapie Jordaŋko opâ rua‐jarewec. 6 Johane eki ine ŋaqi moc kamele kanʒaŋnezi bakicne i rojuwec erâ becsahac moc ombâŋnao jomawec. Nânâ‐ticne ine ɋâuc bisirec â baŋac nâhuc juwec.^* 7 Miti ine kecʒiŋuc muwec: “Râpefuŋ‐naneo warehuc jukac, e tâpiri sâc moc focnekac, e sâko no iŋucnezi mafahe decnepe mi sâckeocmu.^* 8 No opâ rua‐ŋareekopac, eki ine Tiri Mâro rua‐ŋareocmu.”

9 Eme dameŋ ira wiac kecʒiŋuc fuawec: Jesu Nazarete haeonec Galilaia mâreŋkonec ware fisime Johanezi Jordaŋko opâ ruacnewec.^* 10 Eme opâonec wefu wefuhuc mi wiac kecʒiŋuc honezejec i: Sambâŋ aŋkeme Mâro e hapâ iŋucne Jesurao wahawec. 11 Ehame sambâŋkonec dâŋ moc ʒiŋuc fuawec: “Go joroc Ŋokâ biaŋ‐nane, go hone aŋac egareekopac.”^* 12 Eme izia Mârozi ecneme mâreŋ burocnao rawec. 13 Rarâ ira ŋafe ʒoaŋ 40 juhame Sataŋzi esâickewec. E kâte qowi jaŋere ŋondeŋko juhame aŋelo jaŋe kime dopec ecnembiŋ.^*

14 Eme Johane kâpâcwâru ficko râepie fohame Jesu e Galilaia mâreŋko fisirâ Anuture uucmaŋ irec Biŋebiaŋ mufuahuc kecʒiŋuc jazawec: 15 “Dameŋ maickekac, Anuture uucmaŋzi iqic‐ŋopakac. Irec maŋŋeŋic bârisierâ Biŋebiaŋ i ro maŋ enʒepieŋ.”^*

16 Juku Jesuzi Galilaia riqic qacne rahuc Simoŋ â ɋaticne Anderea honec‐jofawec. Jahe riqicko wasaŋ‐jekic behehuc domapic. Jahe qowi gie bapa ŋic hâcne. 17 Eme Jesuzi ʒiŋuc jasawec: “Ware no bâjâpecnunic, eme ŋicko gie bapa bacŋofapemu.”^* 18 Mume izia wasaŋ‐jekic beherâ e bâjâpepic. 19 Eme Jesuzi piticne rarâ Jakobo, Ʒebedaiore ŋokâ, â ɋaticne Johane bâfuac‐jofawec. Jahe wokeo ŋehuc wasaŋ‐jekic ʒâficke bâpiaŋ ehapire honec‐jofarâ izia 20 wira‐jacteme manarâ mamac‐jekic Ʒebedaio â gieŋic wokeo ŋehapie behec‐joparâ bâjâpepic.

21 Eme jaŋe Kafanaum haeo rambiŋ. Eme sabata hombaŋ maickeme Jesuzi mitificko ferâ miti jazawec.^* 22 Jazame ŋic jaŋe miti mumu‐ticnere manapie fefene jâmbâŋ ewec. E runezi miti bâutuckehuc jazawec, miti qaqazu jaŋere mumu i mi muwec.^* 23 Eme dameŋ ijaha mitific‐jeŋicko ŋic demoŋnehec moc ŋewec, eki owackerâ ʒiŋuc muwec: 24 “Jesu Nazarete haeonec, go nâŋere jujuo wemocte warekic? Go sipiric‐nâpocmurâ warekomec me? No ʒâŋitacgukopac, go Anuture Tiriŋic.”^* 25 Eme Jesuzi dâŋ mucnerâ muwec, “Go niniŋkerâ ŋickonec wefu rac.” 26 Mume demoŋzi ŋic ba bâsuec ecnehuc owa kâcɋene owackerâ wefu rawec.^* 27 Eme ŋic jaŋe bipic‐jeŋic tarame nazaŋ gazaŋ erâ mumbiŋ, “Hâc, i wemo wiac, i miti fuŋmoc, tâpiri sâkohec. Demoŋ dâŋ jazame iŋucnezi wâc micne reŋkeŋgopieŋ.” 28 Eme biŋe‐ticne biac jaha haŋ barâ Galilaia mâreŋ sâcke‐fârewec.

29 Eme izia mitifickonec waharâ Jakobo â Johane jahehec Simoŋ â Anderea jahere ficko fembiŋ. 30 Eme ira Simoŋ safeŋ‐ticne huc ʒocnehec bame fowec. Eme Jesu ficko feme biac âzâcnembiŋ. 31 Âzâcnepie erao rarâ menao rorâ bafaharewec. Iŋuc ecneme izia hucticne beheme nânâ rike gumec ejarewec. 32 Eme ʒoaŋ hume owâeme ŋic huc ʒâichec â demoŋhec ʒeŋgoma erao bacjopa warembiŋ. 33 Erâ hae rune mâmâc sasawa ficmotâckopec tumaŋne‐fârembiŋ. 34 Eme eki ŋic bocjaha huc fuŋne fuŋnehec ɋiɋic bacjopawec, erâ demoŋ bocjaha jâpe‐jarewec. Ehuc demoŋ jaŋe fuŋne‐ticne manambiŋzi mutaniŋkenʒipiŋte mic muac ejarewec.^*

35 Eme hae mi fureha furic dadapâcte faharerâ hae beherâ mâreŋ râricne mocko rarâ numuwec. 36 Eme Simoŋ â âgofâcne jaŋe bâjâpe raku 37 bâfuarâ âzâcnembiŋ, “Ŋic jaŋe basacgu‐fâreŋgopieŋ.” 38 Mupie ʒiŋuc jazawec: “Nâŋâc hae rârec rârec ŋerakac sâc ranʒepeneŋ wâc. Ehuc miti jazazepac. No gie i hâcne bapemurâ warepac.” 39 Eme Galilaia mâreŋ fotâcne rac warec ehuc mitificne ficne mita jazahuc juwec â demoŋ jâpe‐jarehuc juwec.

40 Eme ŋic wicsanaŋhec moczi erao rarâ dieŋzi hecnerâ wâsickehuc muwec, “Go bâsomiecnuzo murâ sâcne bâsomiecnucmu.” 41 Mume Jesuzi ere bune sâqoreme meticne sicnerâ ŋic bâuahuc âzâcnewec, “Mana‐garekopacte fâsâec.” 42 Iŋuc âzâcneme izia wicticne somieme sahacne biaŋkewec. 43 Eme Jesuzi ŋic acmâc sorerâ dâŋ fâfâcnehec ecnehuc ʒiŋuc muwec:^* 44 “Manakic, go irec dâŋ binaŋ ŋic moc mi jazazemec. Go ʒiŋuczia taha baparao rarâ sahacge jâutuzemec, erâ fâsâekomec irec bâzi Mosere micdâŋte sâc riketec fuŋne mana taranʒepieŋ.”^* 45 Eme ŋic e rarâ dâŋ mume mi qareŋko razejec. Eme irec Jesu e hae kâcɋenao tâtâc raocte maname quŋkewecte hae herâricnao sawa juwec. Eme ira sifu ŋic rârec rârec qiŋ qururuŋko fisihuc domambiŋ.