JONÁS
Na Jonás in leꞌnaꞌ kin chinkʼontsi na Dios
1
Káwin an Okʼóxláb ani in utsaꞌ enchéꞌ na Jonás xu chakámláb kʼal na Amitai:
2 ―Ki kʼale ban pulek bitsow xin bij Nínibe,
ani ka utsaꞌ an atiklábtsik xi tajaꞌ,
ke neꞌech ku kʼibdhaꞌtsik abal yanenekich tʼajat nin walabtsik ani in bajúmalich asta techéꞌ xon tin kʼwajat.
3 Por na Jonás kʼale ban bitsow six bij Jope abal in leꞌnaꞌ kin chinkʼontsi na Dios;
tajaꞌ Jope,
in elaꞌ jun i tan xi neꞌchich Tarsis.
In jalbiy xatʼwaꞌ ti neꞌech ka júná ani balin ban tan abal ka kʼale Tarsis kʼal jajáꞌtsik.
Anchanꞌ tin tʼajaꞌ abal in chalpay ke ówich ani yabich neꞌech ka chuꞌtat kʼal an Okʼóxláb.
4 Por an Okʼóxláb in tʼajaꞌ ka waꞌun jun i chapik ikʼ ban pujal,
ani chʼakay jun i pulek ikʼladh áb,
chapik tʼajat ke asta in chalpaytsik ke neꞌech ka pokʼtsin an ti tan xonti balidhtsik.
5 Ani xu tʼojnaltsik tajaꞌ ban tan u jikʼélichtsik,
ani juntsik ti éb in tawnáltsik nin diosil.
In petʼnaꞌtsik al an jaꞌ ejtal an kitálábtsik xi taꞌ tin tsiꞌdhál ban tan,
abal kin ikʼowmédhaꞌ an tan.
Por na Jonás paꞌinek asta más alkʼidh ban tan,
ani tajaꞌ ti waykakanék.
6 An inik xu okʼlek ba jachanꞌ an tan utey xonti kʼwajat na Jonás ani in utsaꞌ enchéꞌ:
―¿Jantʼéy a tʼajál tachanꞌ,
waymaꞌ?
Ki chʼakay,
ani ka tawnaꞌ na Diosil;
yab telab max jajáꞌ tu kóꞌontsi ti yajnantsixtaláb,
ani yab ku chemech.
7 Ani útsáxintsik jajáꞌkʼitsik enchéꞌ:
―Jalaꞌ,
wana ku ubátʼin abal ki chuꞌu kʼal xitaꞌ tin walab ti exom i tamwal jechéꞌ an telomtaláb.
Ubátʼintsik tám ani in chuꞌutsik abal kʼal tin walab na Jonás ti exom in tamwal jachanꞌ an telomtaláb.
8 Utsan tám enchéꞌ kʼal jajáꞌtsik:
―Ti ku utsaꞌ xantʼókʼi ti exom i tamwal jechéꞌ an telomtaláb.
¿Jantʼom tʼojláb a tʼajál ani jón ta tál?
¿Jan tin bij na chabálil ani jan tin bij na bitsówil?
9 Na Jonás tókʼon enchéꞌ:
―Nanáꞌ in ebreo,
ani u jikʼnál an Okʼóxláb.
Jechéꞌ an Okʼóxláb jaꞌich na Dios xi kʼwajat walkʼiꞌ,
xin tʼajámal an chabál ani an pujal.
10 Jachanꞌ an iniktsik jikʼeytsik tʼajat,
ani in ulutsik enchéꞌ:
―¿Jantʼókʼi ta tʼajámal jechéꞌ?
In ulutsik anchanꞌ kom in choꞌóbnámalich ke na Jonás xeꞌech in chinkʼontsal an Okʼóxláb,
kʼal tin kwenta xowaꞌ tʼiltsintsik kʼal na Jonás.
11 Kom an jaꞌ más chapikich tu múlákʼ ani in óntsal más,
utsan enchéꞌ na Jonas:
―¿Jantʼéy alwaꞌ ki tʼajaꞌ kʼal tatáꞌ abal ka kublan ti múlákʼ an jaꞌ?
12 Tókʼoyattsik enchéꞌ k'al na Jonás:
―Tikin petʼnaꞌtsik ban pujal ani an jaꞌ neꞌech ka kublan ti múlákʼ;
pos u choꞌób ke kʼal nanáꞌ tu walab ti exom a watʼnáltsik jechéꞌ an pulek ikʼladh áb.
13 Ani jachanꞌ an iniktsik in tʼajaꞌ i chápláb abal kin witsbaꞌ an tan bin wál an jaꞌ;
por yab in ejtotsik,
kom an jaꞌ más chapikich tʼajat tu múlákʼ.
14 In tawnaꞌtsik tám chapik an Okʼóxláb ani in utsaꞌtsik enchéꞌ:
―Okʼóxláb,
i konyal abal yab tiku kʼibdhaꞌ kʼal tin kwentakʼi nin walab jechéꞌ an inik,
nibal ku walbin kʼal nin chemtal;
abal Tatáꞌ,
a tʼajámal xan ta leꞌnámal.
15 Petʼná tám na Jonás ban pujal,
ani an jaꞌ kublan ti múlákʼ.
16 Jachanꞌ an iniktsik in jikʼnaꞌtsik tʼajat an Okʼóxláb,
in kʼwajbantsitsik ti pikbantsixtaláb ani in utsaꞌtsik abal neꞌech kin belaꞌ.
17 Por an Okʼóxláb táꞌich tin tʼojojoyámal jun i yejcheꞌ toꞌol abal ka kʼutʼwat kʼál na Jonás;
ani kʼwajay na Jonás alkʼidh bin tsukul an toꞌol,
óx a kʼítsá ani óx i akal.