2 Chicham umiktarma tusan tajarum nu metek umiakrumka,

atumin ji kuitamrum numamtuk kuitammamsarum pujakrumka,

nukap tsawan pujustinaitrume.

3 Patakemtain uwejnum patakemawar yujau aina numamtuk,

ju chicham shir unuimarum aneakuk pujustarma.

4 Unuimata nuka

amina umaimia numamtuk enentaimtitarma.

Tura nekata nusha wina amikrua numamtinaiti tusarum titarma.

5 Nuwa chikich shuarjai takamin tsanurmak

chicham pegkerjai aujtamkaisha nu ayamrutmaktinaitrume.

6 Chikich tsawantin Salomón nina jeen pujus,

chikichik shuaran pegkerchaun enentaimnun wainkauwaiti.

8-10 Nu shuarka etsa akaiki káshi jasmatai,

nuwa ni takatairi pujamunam wuwaiti.

Tumattamaun nuwa jaanchin pegkeran nugkur jiintuknaiti.

11 Nu nuwaka natsaamtsuk chichau,

jeanam jasa pujutnasha nakitin,

12 tura shuaran wainak tsanirmattsa jintanam nakamin ajakuiti.

13 Tumau asa shuaran igkug achik kugkuas chicharuk: 14 “Wika tagku ainan maa epeakun namagke ampintrau ainan jukin 15 asan, amina wakerusan eaktasan winin

yamai amina wainkaujme.

16 Jaanch kapantun Egiptonmaya itaamujai peakruin ainkan, 17 kugkuin mirra tutaijai,

áleo tutaijai,

tura canela tutaijai ukatkan ikukmajai.

18 Tura asamtai wemii,

tumar ii aneniamu umiakur pagkunaisar tepesar

tsawakai ikunaikmi.

19-20 Wina aishruka yaja weak kuitan nukap juki wemayi.

Tuma asa wári tatsuk catorce tsawan asa taattawai”.

21 Tusa chicham pegkerjai au aujeakua wakerumtikauwaiti. 22-23 Tura vaca aishmag suki jiirkimu maatainam maattsa juki umau aina numamtuk,

tura kuntin yaragnum achimkati tusa nenamunam jápa achimkamtai flechajai iju maamaina numamtuk

tura chigki yarag nenamunam,

pachiashmau achimak jamaina numamtuk,

aishmagkun juki nuwa nina jeen awayawaiti.

24 Tumaina asarmatai uchir ainata wii titatjarum nu metek umirtuktarma.

25 Atumin nuwenchuka takastasrum wakerirpa.

Wii tajarum ju metek umiachkurmeka

waitat jukitin ainarme.

26 Nu nuwaka nukap shuaran tunaun takamtiksauwaiti.

Tura nukap shuar nu nuwan takasaru ainaka jinawaru ainawai.

27 Chikich nuwa ainan takau aina nuka

waitat tuke atinnum weartin ainawai.