Yuusak nekaspapita tusam enentaimtita timau
David kantamamu
37
Shuar tunaun takau aina nu kajerkaipa,tura Yuusan nekaspapita tuinatsu nusha kajerkaipa.
2 Nu shuar aina nuka chirichiri tsupikam,
wári kaak megkaina numamtuk ainawai.
3 Antsu Yuusak nekaspapita tusam umirkata.
Tumakum pegkera nuke takasta,
tura Yuus yainmasmatai
ju nugkanam pujusam takaakum,
shir yuam pujusta.
4 Amina apuram umirkum aneta.
Turamka ame wari ima wakeram nunaka suramsattawai.
5 Amina pujuttrumka Yuus inaitusta,
tura niinig nekaspapita tusam enentaimsam pujakminka
ni yainmaktatui.
6 Ame shir pujamurmea nu
tura amina takatrum pegkera nusha,
etsa tutupin jak shir etsanna iman atinaiti.
7 Yuusa emtin nagkamsa chichaa wekaatsuk
takamtak pujusta,
tura yainkati tusam umamkesam nakasta.
Tura shuar pegkerchau aina atsumtsuk pujuina,
nu kajerkaipa.
8 Tura kajeta nuka inaisata,
kajeka jianaita nusha inaisata,
kajeta nuka iturchatan itauwaiti.*
9 Shuar tunaun takau ainaka
nita nugkeniagka jiira utsam artinaiti.
Antsu Yuusan umirkaru ainaka,
Yuus nugkan anajmatawa nuna jukiartinaiti.*
10 Shuar tunaun takau ainaka
nukap tsawan atsuk megkaarattawai.
Tumawarmatai eakrumsha
chikichkiksha wainkashtin ainarme.
11 Antsu eme anenmamchau aina nuka
nugka anajmamunam pujusar,
iturchat atsamunam shir pujusartin ainawai.*
12 Shuar pegkerchauka,
shuar pegkeran kajerak pegkerchau amajkattsa iturchatan eateawai.
13 Turasha shuar tunaun takau ainaka wári
megkaaratin asamtai, nitanka Yuus wishikiawai.
14 Shuar pegkerchau aina nu
shuar kuitrinchau ainan,
shuar eme anenchatai ainan,
shuar pujuti pegker ainancha kuchiijai,
tura nagkijai maawartasa wakeruinawai.
15 Turasha nita kuchiirijaig enentainam ijuam artatui.
Tura nita nagkiri aina nuka kupirkar utsantam artatui.
16 Shuar pegkerchau nukap warírtin aina nuna nagkasau,
shuar pegker aina nuka waríri nukap achakaisha nitaka shir pujuinawai.
17 Shuar pegkerchau ainan Yuus ijinattawai,
antsu shuar pegker ainanka kuitamkattawai.
18 Yuuska shuar tunaun takachu ainan kuitameawai.
Tura nita jukiartin aina nuka tuke atinaiti.
19 Tsawan waitamu akaisha
nitaka waittsachartinaiti,
tura tsuka tepeamtaisha
nita yuatnuka nukap ariartinaiti.
20 Shuar pegkerchaun takau aina nuka
nupa kaarua numamtuk keekartinaiti.
Tura Yuusan kajerin ainasha,
ji mukuintuk megkaina numamtuk
megkaaratin ainawai.
21 Shuar pegkerchauwa nuka
atsumak seameakai ikasmasha awakechuiti.
Antsu shuar pegker ainaka
atsumakai ikasmasha shir aneas awakenaiti.
22 Yuus pegkernum chicharkamu ainaka,
nugka anajmamua nui pujusartin ainawai.
Antsu Yuus pegkerchaunam
chicharkamu ainaka ijinam artinaiti.
23 Yuuska shuaran pujutin iiras
ni wakeramua tumasag pujakaigka,
shir pujusti tusa pegkernum yayáwai.
24 Nu shuar tunaun takasmataisha tunaunak takaak megkakai tau asa,
Yuus ninka yayáwai.
25 Wii yaunchuk natsa ayaj nuisha,
tura yamai untach jasan pujaj juisha,
shuar pegker aina Yuus inaisam waitainanka waintsujai.
Tura nita uchiri aina atsumainak
yutain seamainancha pegke waintsujai.
26 Shuar pegker ainaka
tuke wait anenkartin ainawai.
Tura ikattsata tuinancha suwaiti.
Turin asarmatai nita uchiri ainasha
pegkernum chichartai ainawai.
27 Pegkerchau takata nuka inaisata,
tura pegkera nuke takasta,
tumakmeka ame pujustinan Yuus
anajmatramawa nui
tuke pujustinaitme.
28 Yuuska pegker takamua nunak wakerawai.
Tura nina umirainanka inaiyatsui.
Antsu shuar pegkerchau ainanka
nita uchiri ainancha ashi ijiniawai.
29 Shuar Yuusan umirin ainaka
nugkan ni anajmatawa nui tuke pujusartin ainawai.
30 Shuar pegkerka ni yachamarmaurinak shir enentaimas chichauwaiti,
tumak pegkera nunak chichauwaiti.
31 Tura nita enentaimtairincha Yuus jintinmau asar,
ni nemartanka pegke inaisachartin ainawai.
32 Shuar pegkerchauwa nuka
shuar pegkeran maattsa anumru wekatawai.
33 Turasha Yuus nunaka shuar pegkerchau aina nu
maawarti tusagka inaisashtinaiti.
Tura nuiyasha waitkasarti tusagka inaisashtinaiti.
34 Tura ameka Yuus shir enentaimtusam pujusta,
tura nina chichame umirkata.
Ni aminka chikich ainan nagkasau amajtamas
nugkan anajmawa nuna suramsatnaiti.
¡Turutmamtai nui pujusam
shuar pegkerchau aina jinuina wainkattame!
35 Shuar pegkerchauwa nu
númi uun wajauwa numamtuk
shir ememas wajaun wainkamiajai.
36 Turasha tutsuk weya, megkaakamai,
wainkattsan eaknasha wainkachmiajai.
37 Shuar shir enentaimkau tunaun takachua nu
enentaimtusam iista.
Nu shuarka
chicham atsaunam agkan pujustinaiti.
38 Antsu shuar tunaun takau aina nuka
ashi ijinam artinaiti.
Shuar tunaun takau aina nuka atakea nuigka waittsartin ainawai.
39 Shuar tunaun takachu ainanka
Yuus yaig uwemtiknaiti.
Tura iturchatnum pujuinakaisha,
ni ayamruk kuitamui.
40 Yuus shuar ninii nekaspapita
tusa enentaimainanka
shuar tunau aina nuiyan
ni ayamruk agkanmamtikui.