Hachan entsanam ajugmaun Eliseo jiikmau
6
Chikichik tsawantin Yuusa chichamen etserin aina Eliseon chicharainak: “Ii ainati amijaimak iruuntrar pujaj juka shikapchiti. 2 Tuma asamtai ii ainati entsa Jordánnum weri númi aina agkan agkan tsupirar ikankar ii pujustin jeamkami”, tusa tinaiti. Tusa takai: “Ayu wetarum”, tusa tinaiti. 3 Tusa takai nu ainanmaya Eliseon chikichik chicharuk: “Wait aneasam uyunkartusta”, tusa tinaiti. Tusa takai ayu uyuntsatjarme, tusa tinaiti. 4 Nuna tusa Eliseo nitajaimak wuwaiti, tuma entsa Jordánnum jeawaiti. Tuma nui jeawar númi tsupitan nagkamawaruiti. 5 Nu ainanmaya numin ajak pujus hacharin ukuinak entsanam ajugkuiti. Tura Eliseon senchi untsuak chicharuk: “¡Jintinkartina ju hachaka winauchauwayi ikattsarmayi!” tusa tinaiti. 6 Tusa takai Eliseo chichaak: “¿Tui iyagma?” tusa tinaiti. Tusa takai jui iyagmayi tusa inaktusuiti. Nu turam Eliseo numin tsupik entsanam ajugkuiti turamtai hacha wampu jinnaiti. 7 Tumamtai Eliseo chichaak: “Achikam jukita”, tusa tinaiti. Tusa tama achik jusauwaiti.Sirianmaya suntar ainan Eliseo achir yaruakmau
8 Nu tsawantin Sirianmaya apu Israel shuar ainajai maania asa, tu nugkanmag nina suntaari ainajaisha iruuntrat nuna pachis nina suntaari apuri ainajai iruunar chichasuiti. 9 Yuus, Sirianmaya apu nina suntaari apuri ainajai chicham juamun Eliseon tuke nekamtiku jakuiti. Turin asa nekamtikawaiti, turam Sirianmaya apu nu nugkanam nita weartatui, tumawartin asamtai Israel shuar ainan apuri nu nugkanam nina suntarin akuptsuk chikich nugkanmani akupkati, tusam ujakta tusa chichaman etsernun akuptukuiti. 10 Eliseo chichaman akuptuk ujamu asa, Israel shuar ainan apuri nina suntarin chikich nugkanmani akupu jakuiti, nuna turak nina suntarinka nukapea uwemtikrauwaiti.
11 Nuna tumaina asamtai, Sirianmaya apu senchi kajek nina suntaari apuri ainan untsuk irumar chicharuk: “¡Ii chichamuncha Israel shuar ainan apurincha ya uja nu ujatkatarma!” tusa tinaiti. 12 Nuna tusa takai nuiya chikichik chichaak: “Apu ika pegkesha etsertsuji. Antsu Yuusa chichamen etserin Eliseo Israel shuar ainan nugkeen puja nu, jeashat pujayat ame kanutairmin pujusa chichamuncha ashi nekau asa, israelita ainan apurinka ujawai”, tusa tinaiti. 13 Tusa tama Sirianmaya apu chichaak: “Tuig Eliseo puja nu werum nekatarma, turarum ujatkatarma. Turutawakrumin achikarti tusan suntar ainan akupkartajai”, tusa tinaiti. Tusa takai suntara apuri aina wear Eliseo pujamun nekawar, Eliseoka Dotánnum pujawai tusar apun ujakaru ainawai.
14 Nu turam apu nekaa suntar caballonam wekas maanin ainan, carretenam wekas maanin ainan, nuiya nugka wekas maanin ainancha ishitkauwaiti. Turam wear káshi jeawar yaakat Dotánkan tentakaru ainawai. 15 Tsawarmatai Eliseo inatairi Guehazí káshikmas nantaknaiti. Tuma aa jiniajkama Sirianmaya suntar aina caballo maaniaku wekatai ainajai tura carro maaniaku wekatai ainajaimak yaaktan tentakar atatmaun wainkauwaiti. Tura wainak Eliseon iniastasa jea wuwaiti. Tuma Eliseon jeari chicharuk: “¿Apuru, isha urukattajia?” tusa tinaiti. 16 Tusa tama Eliseo ayak: “Ashamkaipa, ijai pujuinaka nita ainan nagkasau shir nukap ainawai”, tusa tinaiti. 17 Takai Eliseo Yuusan aujeak: “Yuusa, wina inatair ijai pujuinanka waintsujai tusa ta nu wainmamtikata”, tusa tinaiti. Tusa tama Eliseo inatairin nayaimpinmaya suntar caballonam wekas maanin aina, tura carro jiya numamtin keeku aina nainnum piak Eliseonka tentea irunun Yuus wainmamtikkauwaiti. 18 Tuma ai Sirianmaya suntar aina nijai maaniattsa wininakai, Eliseo Yuusan ataksha aujeak: “Yamaika Sirianmaya suntar aina winina auka wainmachu amajsarta”, tusa tinaiti. Tusa tama Sirianmaya suntar ainanka Yuus wainmachu amajsauwaiti.
19 Tumawarmatai Sirianmaya suntar ainan apurijai chichastasa Eliseo jiintuknaiti. Tuma chicharuk: “Jintaka juchauwaiti, atumka antrarum yujarme tura atum yaakat earum nusha juchauwaiti. Atum shuar earum nui ejétjarme, wii weakai pataturkatarma”, tusa tinaiti. Nuna tusa yaruak wea weakua yaakat Samarianam ejénaiti.
20 Tura nui ejé Eliseo Yuusan aujeak: “Yamaika ju shuar aina ataksha paan iimtikiarta”, tusa tinaiti. Tusa tama Yuus ataksha nitan iimtiknaiti. Turam yaakat Samarianam ajapeen wajainamun wainmamkaruiti. 21 Sirianmaya suntar aina nui wajainan Israel shuar ainan apuri wainak, Eliseon chicharuk: “¿Apaachi, wina suntarun ju shuar aina ijinatarma tusan titatjak?” tusa tinaiti. 22 Tusa tama Eliseo chicharuk: “Atsaa, ameka maaniamunam shuar aina achiram yaruakmaurmeka maichuitme, yurumak ayurkam nita apuri pujamunam awakearta”, tusa tinaiti. 23 Tusa tama jiistamainak yurumkan tura umutaincha ajamsarmatai apu nitan aujas nita apuri pujamunam awakearuiti. Nui nagkamas Sirianmaya ainaka israelita ainajaigka pegkesha maaniacharu ainawai.*
Samarianmaya aina tsukai waittsamu
24 Chikich tsawantin Sirianmaya apu, Ben-hadad, nina suntaari ainan irumar israelita ainajai maaniattsa yaakat Samarian tentakuiti. 25 Nuna turawaru asarmatai, Samarianmaya shuar ainaka nukap tsawan yaakta aarin jiintsuk pujuina asar tsukai waitaina. Tuma asamtai chikichik burro muuke akikigka ochenta jiru plata ajakuiti. Tura pauma iji medio litro tumain juamu akikigka cinco jiru plata ajakuiti.
26 Chikichik tsawantin Israel shuar ainan apuri iimiak yaakat pegmarmau ukurin weká. Tumattamaun chikichik nuwa chicharuk: “¡Apu yainkata!” tusa tinaiti. 27 Tusa tama apu nuwan chicharuk: “Yuus, amina yainmachu asamtai, wisha aminka trigoncha tura vinonkesha sumaitsujme”, tusa tinaiti. 28 “¿Urukamtai tusha wekame?” tusa tinaiti. Tusa tama nuwa chichaak: “Ju nuwa chichartak, amina uchiram yamai yuami, tura wina uchir kashin yuami”, tusa turutmayi. 29 Tusa turutin asamtai wina uchirun maan guisaman inarkan nijai yuamjai, tura kashin tsawakun nuna nuwan chicharkun uchiram surusta maatjai tusan timajai. Turasha nina uchirinka uukmayi, tusa tinaiti. 30 Tusa takai nuna antuk, apu kajek nina jaanchrin jaakuiti. Nigka yaki yaakat pegkramunam weká asamtai, shuar aina iikma jaanchin pegkerchaun nugkur wajaun wainkaruiti. 31 Apu senchi chichaak: “¡Yamaiya juik Safatan uchiri Eliseo muuken tsupirkan maattajai! Wii nuna turachkaigka Yuus wina waittan nu senchi surustatui”, tusa tinaiti.
32 Eliseoka Israel shuar ainan apuri ainajai nina jeen iruunar pujau. Tuma pujai chichaman etsernun chikichkinak apu akupkauwaiti. Turasha nuka eke jeatsaig israelita apuri ainan Eliseo chicharuk: “Apu magkartina nu, winaka mukrun tsupirtuk mantuattsa chikichik shuaran emtik akupak nigka nuna ukurin taatin asa winawai. Tuma asamtai nu shuar taakaigka, wayawai tusarum waiti epettarma”, tusa tinaiti. 33 Nuna tusa eke chichaak pujai apu akupkamu Eliseo jeen taawaiti. Tuma ai apusha taawaiti. Tuma apu chichaak: “Ii waitaj junaka Yuus waittsarti tusa turamin asamtai waitainaji. ¡Nuna turutma asamtai ni yainmakti tusanka nakaa pujurmaitsujai!” tusa tinaiti.