Elías tsekegki nain Orebnum wemau
19
Acab jeen waketki jeaa, Elías turamu ainan pachis Baalan pachisar etserin ainanka ashi ijinawarmayi, tusa nina nuwen Jezabelan ashi ujakuiti. 2 Turam nuna antuk Acabpan nuwe Jezabel chichaman etsernun chikichkinak Elíasan akuptak: “¡Ame Baalan pachisar etserin aina ijinam turusnak, yamai etsa a juni ai kashin mantamnattame! ¡Antsu wii amina mashmataigka yuus aina wina wait anentrutsuk waittan surusarti!”, timayi tusam ujakta tusa tinaiti.3 Nu turamu jeaa Jezabel timaun turusag ujakuiti. Turam nuna antuk Elías sapijmakuiti. Tuma mantuawarai tusa tsekegki Judá weantu ainan yaaktari Beerseba tutainam jeawaiti. Tuma nu yaaktanam nina inatairin ikuknaiti. 4 Tuma we, aya nugkanmag chikichik tsawan weka wekakua númi wajamunam jeawaiti. Tuma pimpikin asa ayamrattsa nuna wakenmarin ekemsauwaiti. Tuma Yuusan aujeak: “Yuusa, iwáku pujaknasha wina untur aina imanuchu asan senchi waitu pujajai. Tuma asan Yamaika jakattsan wakerajai, tuma asamtai jakati tusam turutta”, tusa tinaiti. 5 Nuna tina umik tepes kanaruiti. Tuma tepaun nayaimpinmaya shuar tari Elíasan antiak chicharuk: “Nantakim yurumak yuata”, tusa tinaiti.
6 Tutai Elías nantaki pankan tura entsancha muitsnum ni mukmasa tepamunmani atatmaun wainkauwaiti. Tura yua entsan umar ataksha tepes kanaruiti. 7 Tumattamaun nayaimpinmaya shuar ataksha tari antiak chicharuk: “Shir jeashat wetatme, tumatin asam nantakim pan ataksha yuata”, tusa tinaiti.
8 Tama nantaknaiti, tuma pankan yuawaiti, tura entsancha umaruiti. Tuma ichichmamrau asa cuarenta tsawan, tura cuarenta káshi weka wekakua Yuusa naintri Horeb tutainam jeawaiti. 9 Elías Horebpan naintrin jeaa kanartasa wa amaunam wayaawaiti. Tuma kanar tsawaruiti. Tuma nui pujaun Yuus chicharuk: “¿Elíasa juisha wari pujurme?”, tusa tinaiti.
10 Tusa tama ni ayak: “Wika amina akasmatkun shir senchi takasjai Yuus ashi senchirtin, Yuus israelita aina chicham umiktarma tusam tinaitam nuna umirtamainachu asar, amina chichamrumin etserin ainan ashi maawarai. Tura tagku maa patasa epetai aina nunasha tsaikarai. Tura amina chichamrumin etsernunka wiki juakjai. Tura winasha mantuawartasa wakerutainawai”, tusa tinaiti.
11 Tusa takai Yuus chicharuk: “Yamaika wanmayagka jinkim wii pujamunam muranam wakata”, tusa tinaiti.
Nuna tusa inagnamuik, Yuus nainnum nagkamaknaiti. Tumamtai nase shir senchi nasenkauwaiti. Imatma asa naintan puukuiti, tura muchig ainaka jimapetuk nakarau ainawai. Turasha Yuuska nasenmagka pujuschauwaiti. Nu nagkamaig nugka senchi urkauwaiti. Turasha Yuuska urmaunmagsha pujuschauwaiti. 12 Tura urak nagkankamtai ji keancha akupkauwaiti. Turasha Yuuska ji keamunmagsha pujuschauwaiti. Tura nu nagkamakmatai Elías wanam ataksha wayaa pujusuiti. Tuma nui pujai yaitas chichakuiti. 13 Tuman antuk muuken jaanchjai nukuk waanmaya jiinki nuig ayaamas wajasuiti. Tuma wajas: “¿Elíasa, juisha wari pujurme?” tusa tamaun antukuiti.
14 Tutai ni ayak: “Wika amina akasmatkun shir senchi takasjai, Yuus tuke pujuwa ashi senchirtina, israelita aina ame chicham umikmauwa nuna umirtamainachu asar, amina chichamrumin etserin ainan ashi mainak, tura tagku aina maa patasa epetai aina nunasha yumpuararai. Amina chichamrumin etsernunka wiki juakjai. Tura winasha mantuawartasa wakerutainawai”, tusa tinaiti.
15 Tusa takai Yuus chicharuk: “Ame tamam nu jintanmag, yaakat Damasco aya nugkanmag a nunii waketkita”. Nunika jeam Hazael Siria apuri atii tusam anaikata. 16 Tura Nimsí uchiri Jehú naartin puja nu, israelita ainan apuri atii tusam anaikata. Nu turam yaakat Abel-meholanmaya shuar Safatan uchiri chichaman etserin atii tusam Eliseo ame etegkata. 17 Nu turakmin Hazael ashi shuar aina mainam tsekeararmatai, Jehú nitanka maawartatui. Tura chikich aina tsekearar uwemraru ainanka Eliseo nitanka maawartatui. 18 Turasha Israel shuar aina siete mil shuar Baalan tikishmatracharu, tura kugkuascharu ainanka wii kuitamjai, tusa tinaiti.*
Yuus Eliseon wina chichamur etserin atá tusa etegkamu
19 Elías nui pujau waketkinaiti, tuma Eliseo Safatan uchiri ajakua nuna arakan araktasa nugkan tsayak pujaun wainkauwaiti. Doce vaca aishmag ainan nugka tsaitai jigkatamu aina emkar nugkan tsaiki wenakai, nisha nuna ukurin chikichkinak japis nugkan tsaiki wea. Tumattamaun Elías nuke nagkamak jaanch uku nugkuarmaurin awiik Eliseon yakainum awagtusuiti. (Nunaka wii weakai winita tusa turawaiti). 20 Turam Eliseo vaca aishmag nugka tsaitai neturmau asa, nugkan tsayak yujanka ikuak tsekegki Elíasan jeari chicharuk:
“Aparun tura nukurnasha nu weajai tusan kugkuasan ikuktajai, nuna turan ame weakmin winitjai”, tusa tinaiti.
“Tusa takai nuka turata, turasha wii amijai chichasaj nu kajinmatkipa”, tusa tinaiti.
21 Eliseo Elíasjai chichas ikuak waketkinaiti. Tuma vaca aishmag nugka tsain ainan jimaran juki maawaiti. Tura nugkan tsaikti tusa númi wiyanta jigkamu ainan nunak juki ikapar inarawaiti. Tura shuar ainan ayurkauwaiti, nuna tura ikuak Elías weakai nina uyuntsattsa wuwaiti.