Davidtan ashi Israel shuar ainan apuri amajsamu
5
David yaakat Hebrónnum pujau asamtai, nina patai israelita aina Davidjai chichasartasa, chikichik tsawantin wearu ainawai. Tumawar jeawar Davidjai chichainak: “Ika amee weantu ainaji. 2 Saúl ina apuri pujuya nuisha tumatarma tusam ame tamauka metek umin ayaji. Nuiyasha Yuus aminka apu jasam ii Israel shuar ainatin inartinaitme tusa turamnaiti. Turamin asamtai apu jasam kuitamkartakum ayamkartukta”, tusar tiaruiti. 3-4 Tusar Israelan uchiri chiki chikichik tribu apuri aina, Davidjai yaakat Hebrónnum Yuusa emtin chichaman umikaruiti. Turawar ame ina apuri atá, tusar treinta uwí ejé pujaun muknum aceitejai ukattrar apu amajsaruiti. Turam Yuus yayámu asa David, israelita ainan apuri jas inamuk cuarenta uwí pujusuiti. 5 Hebrónnum nina patai Judá weantu ainanam David siete uwí, tura seis nantu inamrauwaiti. Nuiya Jerusalénnum pujus, ashi Israel weantu ainanam treinta y tres uwí inamrauwaiti.David nepetmak yaakat Jerusalénkan jukimu
6 David apu jas inamuk pujus nina suntaari ainajai Jebuseo shuar aina yaakat Jerusalénnum matsatu asamtai nitajai maaniattsa wuwaiti. Turasha nita yaaktarigka shir umikmau nita shuari ainaka pegkesha waimainchau ajakuiti. Iman asamtai nuiya shuar aina Davidtan chicharainak: “Ameka juigka pegkesha waimaitsume. Wekaichu aina tura wainmachu aina nu atumjai maaninaksha ina yaaktarinka ayamrumain ainawai”, tusar tiaruiti. 7 Turasha David suntaari ainajai nepetmak Sión tutai shir umikmau ajakua nui wayawaruiti. Tura nui pujusar nu yaaktan, Davidtan yaaktari tu anaikaruiti. 8 Yaakat Jerusalén shir pegmara umikmau ajakua nuna David eke juatsaig jebuseo aina, nu yaaktanam pujusar, Davidtan wishikraru aina nuu tsawantin David chichaak: “Wii nitanka senchi kajerkarjai”, tusa tinaiti. Tusa entsa akaikitin taimunmani David nina suntaari ainan ishimuk chicharuk: Nu shuar wekaichu aina, tura shutua shutua wekaichu aina maatarma, tusa tinaiti. David tusa timauwa nuna yamaiya juisha tuke chichainak: “Shuar wainmachu aina, shuar shutua shutua wekain ainasha Yuus ememattasa iruuntai jeanmagka wayachartin ainawai” tusa timauwaiti, tusa tinaiti.
9 David nina suntaari ainajai maanik nepetmak, nina nuwe, nina uchiri ainajai, tura suntara apuri ainajai yaakat Jerusalénkan kayajai pegmara shir umikmaun juki pujusuiti. Nui pujus, “Davidtan yaaktari” tu anaikauwaiti. Tura David shuar takau ainan chicharuk: “Jebuseo aina yaakta ajapeentri kayajai pegmarmau a nui nagkamarum wii pujusa inamtai jea a imanai pegmarum umiktarma”, tusa tinaiti. Tusa takai turusag umikaruiti.
Apu Hiram cedro tsupirmaun Davidtan akuptukmau
10 Yuus ashi senchirtina nu yayámu asa, Davidka kashi kashinig pegker aina nuna chikich ainan nagkasau taká. Tuma asamtai chikich shuar ainasha ninka eme anentas iiyainak kashi kashinig umiraina. 11 Tura asamtai Tiro nugkanmaya apu, Hiram naartin Davidtan jeen jeamkattsa wakera asa, shuar nijai takau ainan akupeak cedro tsupirmau ainancha akupkauwaiti. Tablajai takau ainan, tura kayajai takau ainancha akupkauwaiti. Nu ainanka Davidtan jeen jeamkarti tusa akupkauwaiti. 12 Nu turamun David wainkauwaiti. Tuma Yuus wina apu atii tusa anaituku asampa shir enentaimua tusa nekawaiti. Nuiyasha Yuus Israel shuar ainan anea asampa, chikich shuar ainasha kashi kashinig eme anentas iiyainak umirkarti tusampa turutnaita, tusa nekawaiti.
David uchi aishmag ainan nuwa ainajai akigmau
13 David yaakat Hebrónkan ikuki yaakat Jerusalénnum pujusua nuigka, nuiya nuwa ainancha nukap nuatkauwaiti. Nuiyasha nuwa inatai ainancha nuatrauwaiti. Imatrua asa uchi aishmag ainan, tura nuwa ainajaimak nukap akigkuiti. 14 David yaakat Jerusalénnum pujus uchi akigmau ainaka, ju ainawai: Samúa, Sobab, Natán, Salomón, 15 Ibhar, Elisúa, Nefég, Jafía, 16 Elisamá, Eliadá, tura Elifelet, nu ajakaruiti.
David filisteo ainan nepetkamu
17 Filisteo ainan apuri aina, Davidtan Israel shuar aina apu amajsaru tusa tamaun antukaru ainawai. Tumawar filisteo aina ashi iruuntrar Davidtan maawartasa eaina. Turasha David filisteo aina eamun nekamawaiti. Tuma asa shuar aina nijai pujuinan ashi yaruak muchig wa pegker umikmau irunmaunam nui uumak uwemrattsa wuwaiti. 18 Filisteo ainaka nain Refaiman pakarin jeawaruiti. Tumawar nui pujusaru ainawai. 19 Nu tumawarmatai David, Yuusan aujeak: ¿Filisteo ainajai maaniktatjak? ¿Nitajai maniakaisha nepetmakti tusam yainkattamek?
Tusa tama Yuus Davidtan chicharuk:
“Ee, filisteo ainan nepetkati tusan yaigtatjame. Tuma asamtai suntaarum aina yaruakam weme, filisteo ainajai maanikta”, tusa tinaiti.
20 Timau asa David, nina suntaari ainan yaruak wuwaiti. Tuma Baal-perasin tutainam jeawaiti. Tuma nui filisteo ainajai maaniak nitan nepetkauwaiti. Tura chichaak: “Entsa chichiram tsuat tuak atatmaun nagkamamain amajna numamtuk, Yuus ina shuari aina ijai maaniattsa tuak atatmaun ijina agkan amajsayi”, tusa tinaiti. Tusa nu nugka naarin Baal-perasin tu anaikauwaiti.a 21 Filisteo ainaka tsekenak nita yuusrimtairi ainanka jutsuk ikukiaru ainawai. Nu turamu ainan David, tura nina suntaari ainajai jukiaru ainawai. 22 Turasha filisteo aina tsekeararu ainaka nain Refaiman pakari amaunam ataksha waketrar pujusaru ainawai. 23 Nuna tumawarmatai David maaniktatjak, tusa Yuusan iniasuiti. Tusa takai Yuus Davidtan chicharuk: “Ju tamauwaikka maaniawaipa. Antsu tentakta, tumam númi bálsamo tutai iruna nunii werim nitajai maaniata. 24 Tumam suntar aina shimak tuturtina numamtuk, númi bálsamo tutainam yaki tuturtamu antakmeka, suntaarum aina wári werum filisteo ainajai maaniatarma tusam tiarta. Númi balsamonam yaki tuturtiartata nunaka atum maaniktasa wetinnum wii Yuusaitaj nuna emkan weakun ijinatarma tusan turattajai”, tusa tinaiti. 25 Yuus turata tusa timaunka David metek umikuiti. Tura nina suntaari aina filisteo suntaari ainan yaakat Gabaónnum nagkama maa maaniakua yaakat Gueba Guézer tutainam ejénaiti.