Jonatán Davidjai chicham umikmau
18
David Saúljai chichas inagnakmatai, Jonatán Davidtan shir amikri jasuiti. Turak Davidtan nina iyashin anemaina numamtuk ane jakuiti. 2 Tuma asa Saúl nu tsawanta nuig wina takartin atii tusa apujsauwaiti. Tura asa nina apari jeenka awaigkichuiti. 3 Jonatán Davidtan nina iyashin anemaina imatikas anea asa nijai tuke wina amikur atá tusa chichaman umikaruiti. 4 Tura nuiyasha Jonatán nina nugkutairi jaanchin, kuchiin, nagkimtain, tura akachumtaincha Davidtan susauwaiti.5 Davidka filisteo ainajai maaniak nepetma jaku asamtai, suntara apuri amajas Saúl Davidtan apujsauwaiti. Turamtai ashi suntar aina, tura chikich suntara apuri ainasha shir anentsaruiti.
Saúl Davidtan kajerkamu
6 David Goliatan maamtai suntar aina waketar wininakai tuke tumau asar, Israel nuwa aina apu Saúlan igkugkartasa ashi jiinturaruiti. Tumainak shir aneasar kantamainak, jiistamainak pandero ainan, platillo ainan awataina. 7 Imatainak Saúlka mil shuaran maayi, antsu Davidka diez mil shuaran maayi, tusar tiaruiti. 8 Nu tusa kantamram Saúlan shir amajkachuiti. Tuma senchi kajek chichaak: “Davidtan diez mil shuaran maayi tusar shir anentainawai. Turasha winaka mil shuarnak maayi tusa turutainawai. Ima apu anaitanak amajainawai” tusa tinaiti. 9 Nui nagkamas Saúl Davidtan kajerujakuiti. 10 Tuma kashin tsawak Yuus akupkamu Saúlan wakan pegkerchau jeari waitka. Turamu asa waurujai metek nina inamtairin pujau. Tumakai wakan pegkerchaun awemattsa David tuke turin asa, arpan awatuk pujau. Turasha Saúlka nagkin takus eketu. 11 Tuma eketu Davidtan tanishjai iruran ijutjai tusa nagkijai eketak tsuntsumun jimara awajiruiti.
12 Nu tsawanta nuigka Davidtan Yuus yayá asamtai, Saúl Davidtan ashama jakuiti. 13 Tura asa ninii pujaun jiiknaiti. Tura mil suntara nuna apuri atii tusa anaikauwaiti. Turamu asa Davidka nina shuarijai maaniak waketujakuiti. 14 Turasha Yuus yayámu asa nina shuari ainan nepetak waketujakuiti. 15 David Yuus yayasam shir taká asamtai Saúl ashamajakuiti. 16 Turasha Israel shuar aina, tura Judá weantu aina David chichakmatai wear nita shuari ainajai maania nepetmaina asar shir wakerujakaruiti.
17 Chikich tsawantin Saúl Davidtan chicharuk: Wina nawantur Merab iwairi puja nujai nuwenata tusan amastajme. Nu jukitaj takumka Yuus, filisteo ainajai maaniam nepetkata tusa yainmakti tinaiti. Nunaka nigka maamainchau nekapu asa filisteo aina maawarti, tusa tinaiti. 18 Turasha David ayak: Wika imanchauwaitjai, tura wina pataar Israel shuar aina nusha imanchau ainawai. Tumau asan ame apuitam nuna nawantrinka jumaitsujai.
19 David nuwenatin tsawan jeamtai, Saúl nawantri susatjai tinu ayat chikich shuaran Adrielan yaakat Meholánmaya ajakua nuna susauwaiti. 20 Turasha Saúla nawantri chikich Mical Davidtan wakerukuiti. Nuna Saúl nekaa shir aneasuiti. 21 Nunaka nigka enentaimas: Auna susatjai, turamtai filisteo shuar aina maawarti tusa nunaka tinaiti. Tura ataksha Davidtan chicharuk: Yamaika nekas wina nawantur jukita, tusa tinaiti.
22 Tusa Saúl nina inatairi ainan chicharuk: David werirum ima nigki chicharkurum: Apu wina nawantrun nuatkati tusa shir senchi wakerutmawai. Tura ii nina suntaari ainatisha eme enentaimtajme tusarum titarma, tusa tinaiti. 23 Takai Saúla inatairi aina shiakar ni timaunka turusag ujakaruiti. Turam ni ayak: ¿Atumsha enentaimsa iistarma chikichik shuar imanchausha apu nawantrincha nuatmainkait? ni tau asamtai nawantrinka nuatkatjai, tusa tinaiti. 24 Takai inatai aina waketkiar David timaunka apu Saúlan turusag ujakaruiti. 25 Nuna antuk Saúl, Davidtan tsanuamtai filisteo aina maawarti tu enentaimu asa inatairi ainan chicharuk: David nina shuari ainan cien shuaran maagka, wina nawantrun nuatkattawai tusa apu turamui tusarum ujaktarma, tusa tinaiti.
26 Timau asar inatai aina Davidtan ujakaruiti. Turam David Saúlan nawantrin nuatkattsa wakera asa, tsawan jeatsu aig turan apu nawantrin jukitjai tusa shir aneasuiti. 27 David nina suntaari ainan yaruak we filisteo ainan doscientos shuaran maa waketki jeaa, Saúlan nawantrin nuatkauwaiti. 28 Tumamtaisha Yuus Davidtan yayá asamtai, Saúla nawantri Micalsha anea asamtai Saúl senchi ashamkauwaiti. 29 Tuma asamtai Saúl Davidtan yaunchuk ashamajakua nu nagkas nu senchi ashama, tuma nina tuke kajerujakuiti.
30 Filisteo ainajai maaniamunam Saúla suntaari apuri aina nuna inagkas David maaniamunam nepetma jakuiti. Tuma asamtai israelita aina arantus iijakaruiti.