3 Jonatán nina suntaari ainajai filisteo aina yaakat Gabaanam matsatun nina suntarijai ijinawaiti. Tura ijinawarai tamaun chikich filisteo ainasha nekawaruiti. Tura Saúlsha nekaa ashi israelita ainan nugkeen trompeta umpuitarma tusa tinaiti, nuna antukar maaniamunam umintsarti, tusa turawaiti. 4 Tura Gabaanam suntar aina matsatun Saúl ijinayi, tura asamtai filisteo aina antukar kajekarai tamaun ashi israelita aina nekawaruiti. Tuma suntar aina yaakat Guilgal Saúljai iruuntraruiti.

5 Tumainai filisteo aina, israelita ainajai maaniattsa iruuntrauwaiti. Tura filisteo aina treinta mil carro maanitai ainajai, seis mil suntar aina maanitan yacha aina, nawenam yujas maanitan yacha aina nu ainaka nayantsa yaikmiriya imanik iruuntrar shiakar yaakat Bet-avén jeawar yaakat Micmás amaunam jeamkar matsamsaruiti.

6 Imanik tuakaru asarmatai israelita aina sapijmainak wa amaunam, nugka wa ainanam, kaya wa pagkaku amaunam yumirmatai taimu ainanam nui utsanawar umraruiti. 7 Tumainai chikich ainaka Jordán amain katigkar Gattan nugkeen, tura Galaad nugkanmasha shiakaru ainawai. Turasha Saúlka nijai yujainajaimak yaakat Guilgalnum juakuiti. Tura ujumak suntar nijai yujainaka senchi ashamkartuina asar shiakaru ainawai. 8 Saúlan Samuel siete tsawan nakarsattame timau asa nakasuiti. Turasha Samuel Guilgalnum siete tsawanta nuisha taachu asamtai shuar ainaka wakettan nagkamawaruiti. 9 Tumainakai Saúl chichaak: “Yuus tunaun tsagkurtamratji tusan tagkun maa epeakun ninu atii tusa anajmatamu aina nuna susattajai tagku itatarma”, tusa tinaiti. Tusa takai tagku ainan itarmatai, nuna maa Yuusan emematuk epea umik,

10 yama inagnak pujamunam Samuel taawaiti, tumamtai Saúl igkug amikmattsa jiintuknaiti. 11 Turasha Samuel eke amikmatsuk chicharuk: “¡Ameka aitkamainchau tagku maa epeame!” tusa tinaiti. Takai Saúl ayak: Ame taatin tsawan nagkamakmatai shuar aina waketaina asarmatai tura nuiyasha filisteo aina yaakat Micmásnum jutijai maaniattsa iruuntrarmatai, 12 wiki enentaimsan chichakun: “Tagkun maan Yuusan eme anentsa iiyakun epeatsaigkiapi filisteo aina Guilgal tawar mantamawartatjia tusan jutikajai”, tusa tinaiti.

13 Takai Samuel chicharuk: Ame aitkam nuka enentaimkachua numamtuk takasume. Amina Yuusrum tu takasta tusa amina turammauwa nu metek umiakminka, amee weantu artina nunasha Israel shuar ainan apuri atin arti tusa Yuus turammain amajtamkaume. 14 Tuma asam yamaika ameka apuka achattame. Tura ame weantu artina nusha apuka achartinaiti. Yuus ni turammau metek umikchau asaakmin, Yuus ni wakeramu takaun chikichik shuaran israelita ainan apuri atii tusa etegkattawai.

15 Nuna tusa Samuel Guilgal pujau jinki wuwaiti. Tumamtai Saúl suntar aina nui matsatainajai filisteo ainajai maaniattsa shiakaruiti. Guilgalnumia jiintrar shiakar Benjamínka nugkeen yaakat Gabaanam jeawaruiti. Tuma nui Saúl seiscientos suntara iman iruumrauwaiti. 16 Saúl, nina uchiri Jonatán, tura nita suntaari ainajai yaakat Gabaanam Benjamínka nugkeen juakaruiti. Antsu filisteo ainaka yaakat Micmásnum matsataina. 17 Nuiya matsataina filisteo aina tres irumramua nuiya chikichik irumramu kanaki, yaakat Ofránmani Suala nugkeen shiakuiti. 18 Turasha chikich irumramu ainaka yaakat Bet-horón tutainam shiakuiti. Tura chikich tresa nuka Seboíma naintrin wearuiti. 19 Filisteo aina chichainak maaniamunam ijitmawaij tuina asar, kuchi ainan, nagki ainan najanacharti, tusa tinaiti. Timau asar israelita ainaka chikichkiksha hierro tutain najanujakcharuiti. 20 Tuma asamtai israelita aina kuchi aina, hacha aina, azadón aina, pico aina atsakmain atsurmau asar filisteo ainan ishiintukar seajakaru ainawai. 21 Tura seami, nu aina atsakeamunam filisteo aina kuitan seajakaruiti. 22 Maaniamunam Saúlan, Jonatánkan suntar aina uyunu jaku aina nuka kuchiirtinchau nagkirtinchau ajakaruiti. Turasha ima Saúlak, tura Jonatánjai takaku ajakaruiti. 23 Filisteo aina yaakat Micmásnumani israelita ainan ishintukaruiti.