Yuus filisteo ainan waittan akuptukmau
5
Filisteo aina Yuusa arcarin jukiar, mura Eben-ezer tutainmani akaikiar nita yaaktarin Asdod ejéniaruiti. 2 Turawar nita yuusrimtai najanamu Dagón tutai emematkur iruuntai jeanam, Yuusa arcarin jukiar awayaa ayanas apujsaruiti. 3 Turawaru asar kashin tsawaarar wayaa iiyajkama nita yuusrimtairi nugka iyaan Yuusa arcari pujamunam ayaamas tepettamaun wainkaruiti. Turawar inankiar nina wajatairinig ataksha awajsar ikukiaruiti. 4 Turawaru asar, kashin tsawaarar ataksha wayaa iiyajkama, nita yuusrimtairi iyaan muuke kupinak, tura uwejesha mai kupinak Yuusa arcari pujamunam ayaamas waitinam tepaun wainkaruiti. Antsu iyashigka imanisag tepaun wainkaruiti.5 Sacerdote aina Dagónkan takarin ainaka, Dagónka muuke kupinak waitinam tepesu asamtai yamaikisha nu waitinam wayainakka chikarkiar nagkain ainawai. 6 Nuiyasha Yuus, filisteo ainan yaakat Asdodnum matsamin ainan waittsarti tusa jata tumoran akuptukuiti. Tura yaaktanam ayaamas matsatainasha senchi waitaina. 7 Imanik senchi waitaina asar chichainak: Israel shuar ainan Yuusri arcarigka juigka pujumaitsui. Jui pujakai, ina yuusri Dagónjai waittsarti tusa waittan akupturmaji, tusar tuina. 8 Tuina asar filisteo apuri ainan untsukar ininak: ¿Israel shuar aina Yuusri arcariya nusha iturkattajia? tusa tuina. Tuinakai nita aimainak: Yaakat Gatnum jukirum apujutarma, tusa tuina. Tuinam jukiar ejéniaruiti. 9 Tura ejéniarmatai filisteo shuar ainan Gatnum matsatun Yuus waittan shir ashammainan akuptukuiti. Turamu asar uun aina, tura uchi ainasha jainak waitaina.
10 Tumainakai Gatnumian filisteo aina jukiar yaakat Ecrónnum Yuusa arcarin juki ejéyainakai, Ecrónnumia shuar aina untsumainak: ¡Jinawarti tusa Israel shuar ainan Yuusri arcarin jui itartamawarji! tusar tuina. 11 Ashi yaaktanam shuar aina Yuus waitat suam jinuinawai tamaun antuina asar ashamainak, filisteo apuri ainan untsuk chicharainak: Yuusa arcari itawaitrum nu tuiya itaawaitrum nui wári awaigkitarma, tusa tuina. 12 Jatajai waitainak nita yuusrimtairi ainan yainkata tusar seaina. Turasha jata tumoran achiimak eke jainatsu nu waitainak untsumainamusha nayaimpinam antukauwaiti.