Gedeón Madiánnumia apu ainan achir yaruakmau
8
Gedeón madianita ainajai maaniattsa, israelita chikich ainanka chichaman akuptuk ujayat, Efraín weantu ainanka ujakchauwaiti. Turamu asar kajekar Gedeónjai senchi jianaikaru ainawai. 2 Nuna tusa tuinakai Gedeón nitan chicharuk: “Atum ainatirmeka wii turawaitaj nu nagkasarum turawaitrum nu nekamainaitrume. Atum ainatiram ishichik turawaitrum nuka ii ainati nukap turawaitaj nuna nagkasau pegker turawaitrume. 3 Yuus atumnaka Madiánnumia ainan apurin Orebpan, Zeebjai achikarti tusa yainmau asamtai achikurme. Atum pegker turarum imanunka wika turachjai”, tusa tinaiti. Tusa takai nuna Efraín weantu aina antukar nita kajekmaurin tsagkuraru ainawai.4 Tumawarmatai Gedeónka trescientos suntarjai pimpikiaru ainayat entsa Jordánnum jeawar amain katigkaru ainawai. Turasha nita shuari ainan patatukaru ainawai. 5 Tumawar yaakat Sucotnum jeawaru ainawai, tuma Gedeón nuiya shuar ainan chicharuk: “Wait aneasrum, suntar aina wina uyuntuinak yujaina ju yumain susatarma, nitaka senchi pimpikiaru ainawai. Ika Madiánnumia apu Zeban tura Salmuna patatuinaji”, tusa tinaiti.
6 Turasha yaakat Sucotnumia apu aina chicharainak: “Suntar aina amina uyuntamainak yujaina nu Zeban tura Salmunan eke achinatsaigkika yurumkaka ajamsachartatji”, tusa tiaruiti.
7 Tusa tuinakai Gedeón nitan chicharuk: “Yuus yaintsamtai Zeban tura Salmunajai achikan waketkunka númi jagkirtin zarza ainajai aya nugkanmag iruna nuna yaruakan atumnaka asutran achiartatjarme”, tusa tinaiti.
8 Nuna tusa ikuak Gedeón wuwaiti, tuma yaakat Penielnum jeawaiti. Tuma nuiya shuar ainancha turusag seawaiti, turasha nuiya shuar ainasha Sucotnumia shuar umikcharua tumasarag umikcharu ainawai. 9 Tumaina asarmatai yaakat Penielnumia shuar ainancha Gedeón chicharuk: “Wii nepetmakan waketkunka ju torre najanamu a juna yumpugkan ikuktatjai”, tusa tinaiti.
10 Etsa watainmani pujuina wearu aina ciento veinte mil suntar aina maaniamunam jinawaru ainawai. Tumawaru asarmatai Zeban tura Zalmuna nu ainaka yaakat Carcornum quince mil suntar juakaru ainajai pujuina. 11 Nui pujuinan Gedeón nina suntaari ainajai jinta yaakat Noba tura Jogbeha nunini etsa watainmani werinaiti. Tuma yaaktan kuitamin atsuina asamtai, pachiachmau jeawar utsantuawaruiti. 12 Madiánnumia apu Zeban, Zalmunajai tsekegkiaru ainawai. Turasha Gedeón nina suntaari ainajai patatuk mai achikuiti. Madiánnumia suntar ainaka nu turamun wainkar senchi ashamkaru ainawai.
13 Joásan uchiri Gedeón maanik nepetmak nina suntaari ainajai, nugka Heres tutainmani waketkinaiti. 14 Tumak yaakat Sucotnumia shuaran natsan chikichkinak achikuiti, tura nukap iniasuiti. Turam nu yaaktanmaya setenta y siete apu ajakarua nuna naarin aakuiti. 15 Turamtai yaakat Sucotnumia shuar ainajai chichastasa Gedeón wuwaiti. Tuma nitan chicharuk: “Suntar aina pimpikiara ju nita yumain susatarma tusan takaisha, wina wishikrakrum Zeban tura Zalmuna, eke achiasrumnakka ayurachartatjai tusarum timarum nu nekarme. ¡Nu ainan yamaika achikaran jui itawarjai!” tusa tinaiti.
16 Nuna tusa Gedeón númi jagkirtin tura zarza tutai aya nugkanmaya itamu ainan juki yaakat Sucotnumia apu ainan asutkauwaiti. 17 Nuiyasha yaakat Penielnum torre tutai najanamuncha yumpuak shuar ainan ijinawaiti.
18 Nuna tura Gedeón Zeban tura Salmunajai chicharuk: “Mura Tabornum shuar aina ijinawaittrum nusha, ¿uruk iimtina armia?” tusa tinaiti.
Tusa takai nita chichainak: “Amijai metek armiayi, nita ainaka apua iman armiayi”, tusa tiaruiti.
19 Tusa tuinakai Gedeón senchi chichaak: “Nitaka wina shir nukuruin akinkaru asar wina yatsur ajakaruiti. ¡Yuusa naarin tajai, atum nita ijinachu akurminka wisha atumnaka maamaitsujrume!” tusa tinaiti.
20 Tusa inaiyak Gedeón nina uchiri iwairin Jéter naartin ajakua nuna chicharuk: “Ame maawarta”, tusa tinaiti.
Turasha Jéter imanis unchau asa ashamak maachuiti. 21 Tumakai Gedeónkan chicharainak: “Nekas kakaram akumka amek inka magkartuata”, tusa tinaiti.
Tusa tuinakai Gedeón Zeban tura Zalmunajai mai maawaiti. Tura caballori ainan suwen warí pegker anugkramu ainan yaruakuiti.
22 Turamtai israelita aina Gedeónkan chicharainak: “Ame madianita aina nepetkam ayamkartuku asam, ina apuri atá. Tura amina uchirmesha ina apuri atii tusar wakeraji”, tusa tuina.
23 Turasha Gedeón nitan chicharuk: Wikisha tura wina uchirkesha atumin apurigka achattaji. Antsu atumin apurigka Yuusa nu atatui. 24 Turasha chikichik warín seajrume: “Atum madianita aina makrum anillo orojai najanamu jukimu aina, chiki chikichik surustarma”, tusa tinaiti.
25 Tusa takai chiki chikichik israelita aina jaanchin nugkanam ainkar arete yaruakmau ainan matsasaruiti. Turawar Gedeónkan chicharainak: “Ju jukita”, tusa tiaru ainawai.
26 Arete orojai najanamu ainan Gedeón jukinaiti. Nuka ashi irumramka diecinueve kilo arujakuiti. Antsu apu ainan iwarmamtairi, nugkutairi nuiya jaanch yamakaitkau nu ainanka nekapmacharu ainawai. 27 Nu oro yaruakmau ainajai nugkutain najanawaiti, tura nina yaaktari Ofránam ejénaiti. Nuna israelita aina eme anentas iiyainak emematainak Yuus ememattan inaisau ainawai. Tura Gedeónsha ni weantu ainajaimak nuna emematujakuiti.
28 Madiánnumia aina Israel shuar aina nepetkamu asar, kakamainchau nekapujakaruiti. Tumaina asar Gedeón iwáku puju jakua nuigka, israelita aina nita shuari waitkascham agkan cuarenta uwí pujusaru ainawai.
29 Gedeón Jerobaal tutai ajakua nuka nina nugken pujustasa wuwaiti. 30 Nui pujus, nina nuwegka nukap asamtai, setenta uchin akiawaiti. 31 Nuiyasha yaakat Siquemnum pujus nina inatairin nuatak chikichik uchin akiawaiti. Tura Abimelec anaikauwaiti. 32 Joásan uchiri Gedeónka shir ashanmar jakauwaiti. Tumamtai nina apari Joás ikumajakmaunam Abiezer weantu aina matsamtai yaakat Ofránam ikusaru ainawai.
33 Gedeón jakamtai pujusar israelita aina yuus Baal ainan emematainak, nita Yuusriya nunaka ataksha inaisaru ainawai. Tura Baal-berit tutain ina yuusri atii tusar etegkawar emematujakaru ainawai. 34 Tumaina asar nita shuari waitkainakai nita Yuusri tuke pujuwa nu yaig agkanmamtikawa nuna kajinmatkiaru ainawai. 35 Nuiyasha Gedeón chikich naari Jerobaal tutai ajakua nu nitan ayamrak pegkeran turawa nuna patai ainancha wait anentracharu ainawai.