“Jimar kaya tablaya numamtin yama nagkamchak ajakua nujai metek tsupikam umikta. Nuiyasha nu aina egkeatin arca najanata. Nu kaya aina nu jukim nain wakata. 2 Tumawakmin wii nu kaya tablaya numamtinnum chicham umiktin ainan, yama nagkamchakun aarmau ame nagkimam kupirmiam nuu chichamnak ataksha aartajai. Nuna turamtai arca najanamunam egkeam kuitamkattame”, tusa Yuus Moisésan tinaiti.

3 “Tusa turutin asamtai, arcan númi acacia tutaijai najanamiajai. Turan kaya tablaya numamtinan jimaran jukin nain wemiajai. 4 Tuman nain wakamtai Yuus kaya tablaya numamtinnum chicham umiktin ainan diez aarmaun surusuiti. Nu kayanmagka wii eke nainnum wetsuk atumjai nain taritkamunam pujai ji keamunam aujtamsamiaj nuna ima nigki aarmaun surusuiti. 5 Turutamtai nainnumia akaikimiajai, Yuus turutmaun turusnak umiakun arcanam kaya tablaya numamtinan egkeamiajai. Nuka yamaikisha nuig awai”, tusa Moisés tinaiti.

6 Nuna tusa Moisés timatai ina uuntri aina Beerot-bene-jaacán tutainam pujuina Moserá nugkanam pujusartasa wearu ainawai. Tuma nui pujuinai, Aarón jakauwaiti. Tumamtai nuig ikusu ainawai. Eleazar apari jakamtai sacerdote ainan apuri jasuiti. 7 Tuma Moserá nugkanam jeawaitrume. Tumarum nuiya shiakrum Gudgoda nugkanam jeawaitrume. Tura nuiya shiakrum ashints aina nukap irunmaunam Jotbata nugkanam pujusuitrume. 8 Nu tsawantin Yuus, Leví weantu ajakarua nuna, chicham umikmau egkeamun arcan jukiartin ainan etegkrauwaiti. Turamu asa nita aina Yuus ememattasa iruuntai aaknum nina eme anentas iiyainak takaraina. Nitaka shuar ainan pegkernum Yuusa naarin pachisar yamaiya juisha chicharainawai. Tura nuiyasha Yuus turata tusa tama nuna metek uminak shuar ainan pegkernum chicharainawai. Nunaka yamaiya juisha turusag takainawai. 9 Leví weantu ainaka, ina uuntri chikich tribu aina nugkentin ajakaru tumauka ainatsui. Tumau asarmatai Yuus nita atsumamunka sujakuiti.

10 Wii yama nagkamchakun pujusmiaj tumasnak nain wakan cuarenta tsawan, tura cuarenta káshi pujusmiajai. Nui pujusan atumin pachisan Yuusa ijinawaipa tusan aujsamiajai. Turamu asa yaunchuk anturtuk umirtukua tumasag nuisha anturtuku asa ijitmachuitrume. 11 Nunaka turutmatsuk wina chichartak: “Wári waketkita. Tumam wii atumi uuntri ainan nugkan nekas susartinaitjai tusan anajmatawaitaj nuna jukiar pujusarti tusam, israelita aina yaruakam wetá” turutmayi, tusa Moisés tinaiti.

12 Moisés ni shuar ainan wina pataar ainata: “Ina apuri Yuus turata tusa wakera nuka juwaiti: Ima nigki eme anentsa iistarma. Ni wakeramua nuke takákrum pujustarma. Yuus wakeramua nuke pegker enentaimsarum takastarma”.^* 13 Chicham umiktarma tusan wii tinaitaj nuna metek uminak pegker pujusarti, tusa Yuus wakerawai. 14 Tura nayaim aina nuka, nayaimpinam iruna nusha, tura nugkasha, nugkanam iruna nusha ashi Yuusnauwa ainawa tusarum nekatarma.^* 15 Turasha nu ainanka etegtsuk, ina uuntri aina ajakarua nuna ane jaku asa ii nu weantu ainatin winau arti tusa Yuus etegtamawaitji. Nuiyasha chikich shuar aina yamai pujuina nuna etegtsuk, ii ainatin yamaika winau arti tusa etegtamawaitji.

16 “Pegkerchau enentaimat aina nuka inaisatarma. Tumarum iturchat enentaimtsuk chicham umiktarma tusa timauwa nuka kajinmattsuk umiktin ataarma”. 17 Ina Yuusriya nuka chikich aina yuusrimtairi aina nuna nagkasau Yuusaiti, tura chikich apu aina nuna nagkasau apuiti. Nigka Yuus uuntaiti, ashi senchirtinaiti, tura ashammainaiti, nigka shuar ainancha ashi metek kuitamnaiti, tura nigka pegkerchaunka pegke takachuiti, tura nigka akiamkesha pegkerchaunka pegke takachuiti. 18 Nigka mitaik ainan, waje ainan, chikich nugkanmaya shuar ainan, atum pujamunam pujuina nunasha waitaina asarmatai wait anentak yayáwai, tura asa nita yuatnuncha tura nugkurtintrincha jaanchin suawai. 19 Atumsha chikich shuar ainayatrum, Egipto nugkanam pujujaku asarum, chikich shuar aina atumjai pujuinaka anetarma.

20 “Atumi apuri Yuus ima nigki eme anentsa iiyakrum ememattarma, chikich aina antuinamunam atum umiktin pachisrum chichakrumka, Yuusa naari pachisan tajai tusarum titarma. 21 Atumin ayamrutmaktasa wainchatai ainan nina senchirijai iwainamu atumsha wainkau ainarme, tura asarum atumka nigki tuke ememattarma. 22 Ina uuntri aina Egipto nugkanam pujusartasa jeawarua nuigka setenta shuar ajakaruiti. Turasha Yuus yamaika nayaimpinam ya aina nekapmamainchau iruna imau nukap napamtamkaji”, tusa Moisés ni shuar ainan tinaiti.