25 Tumawar cuarenta tsawan yujasar nugkan nekaawar, 26 Cadés-barnea tutainam waketki tawaruiti. Tuma nui aya nugkanmag Paránnum Moisés, Aarónjai pujamunam jeawar ashi israelita aina antuinamunam nita wainkamuri ainan etseraruiti. Turuinak araka nere itamuri ainancha inakmasaruiti. 27 Tuma Moisésan chicharainak: Ame nugka nekata tusam akupkartukmam nuigka, nu nugkaka pegkerayi, árak ainasha iruunmayi. Ju árak ainaka, nu nugkanmaya itaji. 28 Antsu nuiya shuar ainaka kakaram, nita yaaktari ainasha uun shir pegmarmau armayi tura nayau armayi. 29 Négueb nugkanmagka amalecita aina, hitita aina, jebuseo aina, tura amorreo aina matsatainawai. Antsu nayants yantamka, Jordánnum nugka paka amaunam, cananeo aina matsamiarmayi, tusa tuina. 30 Tuinakai Caleb, Moisésan emtin israelita ainan chicharuk: Ii shiakar nu nugkaka akinkarmi, ii ima kakaram ainaji, tusa tinaiti. 31 Takai nijai wearu aina nuiyag chichainak, atsaa nu shuar aina nujaigka maanimain ainatsji, nita ima kakaram asarmatai maaniakrisha nepetmain ainatsji, tusar tiaruiti. 32 Tusar nugka nekattsa wearu aina nuiyag ujumak shuar chichainak: “Nuiya shuar ainaka tuke maanisarke iruunin ainawai. Tura nuiyasha kakaram ainawai. 33 Nuiyasha nitaka shuar nayau asarmatai, ika nitajai apatkamka yunchia numamtin shikapchich ainaji”, tusar tiaruiti.