José shikika umutairin Benjamínkan egketawaru
44
Tura José nina inatairin chicharuk: Nita sacori ainanam trigo aina aimrata. Turakum kuitcha egketawarta. 2 Antsu nita yachi ekeuwa nuna sacorinka, wii shikika umutai pegker najanamua nu jukim kuitjai apatkam egketata, tusa tinaiti.Tama inataisha imatiksag umikuiti. 3 Tura tsawaar José nina yachi ainan wetaarma tusa tama nita burrorin aentskar shiakaruiti. 4-5 Tumawar yaaktan ikukiar jeashat weenatsaig José nina inatairin chicharuk: Shuar shiakarma nu patatukam amaigkam chicharainakum: ¿Wina apur nekamattsa shikika umutairi pegker najanamua nusha urukamtai kasarkarmesha jukintrume? Atumka pegker amajkamaitiattrum, pegkerchau amajkartukurme. ¡Atumka shir pegkerchau ankaurme! titá, tusa tinaiti.
6 Tama inataisha patatuk amaigki José timaurinka turusag tinaiti. 7 Takai nita chichainak: ¿Urukamtai incha antramsha tukartame? ¡Ika pegkesha kasamchau ainaji! 8 Tumau asar Canaánnum jear, ina sacorin kuit egketu wainkar awaigkimi tusar itaamji. ¿Turayatkursha apu jeeniasha urukamtaig kuitcha tura ororisha kasamkatjia? Ika pegkesha kasammaitsuji. 9 Turasha eakmi, yana sacorinig apu shikika umutai pegker najanamu tame nusha egkemit, nuka mantamnati. Antsu chikich ainatika apu inatai jasartatji, tusa tiaruiti.
10 Tuinakai inatai chichaak: Atum tarum nuka nunis atii. Yana sacorinig apu shikika umutairi pegker najanamu egketu wainnakat nuka wina inatair atii, antsu chikich ainatirmeka tumashtatrume, tusa tinaiti. 11 Takai wári nita sacori ainan nugka apujsar atiraruiti. 12 Turawarmatai inataisha emkaunam nagkama ea eakua Benjamínkan sacorin, apu shikika umutairi pegker najanamu egkemtatmaun wainkauwaiti. 13 Turamtai wake mesemar nekapenak nita nugkuarmaurin jaakaruiti. Tumawar burrorin ekentrar José pujamunam wakettraruiti. 14 Judá nina yachi ainajai José pujamunam jeawar tikishmatraruiti. 15 Tumainakai José nitan chicharuk: ¿Urukamtai wii shikika umutaisha kasamkarmesha jukinurme? ¿Wii nekamnaitaj nuka nekartsurmek? tusa tinaiti.
16 Takai Judá chichaak: ¿Apu, isha wari titajik? Yuus ina tunaurin nekau asamtai, kasamkachmaji tumaitsuji. Ame shikika umutairmin jukinjaimak yamaika amina inatairam jastatji, tusa tinaiti. 17 Takai José chichaak: Atsaa, nuka tumamaitsurme. Antsu wina shikika umutairun egkea wea wainnaka nu wina inatairka atatui. Tura chikich ainatirmeka agkan atumi apari pujamunam shiaktattrume, tusa tinaiti.
Judá Benjamínkan chichamrukmau
18 Takai Judá Josén jeari chicharuk: Apuru titajme, wii takaisha wait aneasam kajertukaipa, ameka faraónka numamtinaitme. 19 Ame chichaakum atumi aparisha pujawak, tura atumi yachi chikichka pujatsuak: 20 Takumin ii chichaakur: Apuru ina apari shir untach jas pujawai. Tura ina yachi, ina apari untach jas akiamu pujawai. Nunaka shir yachi jakau asamtai, ima senchi anenayi, tusar timajme. 21 Takurin ame chicharkartakum: Nu uchi jukirum itaatarma, wisha wainkatjai tusam timame.
22 Takumin ii chichaakur: Uchika aparin ikumaitsui ju ikurkaigka jamainaitjai, tusa tinayi tusar timaji. 23 Takurin ame chichaakum: Atumin yachi ekeu juki itachkurmeka juigka taawairpa tusam timame. 24 Tinu asaakmin waketkir ame timam nuka ina apari ashi ujakmaji. 25 Tura chikich tsawantai ina apari chichartamuk: Ataksha werum yutai sumakkrum utitarma tusa turammaji. 26 Turamkurin ii chichaakur: Ina yachi ekeu winachkaigka wechattaji, tusar timaji.
27 Tama ina apari chichartamuk: Wina nuwar Raquel uchin jimaran jurerua nuka atumka nekarme. 28 Chikichka megkaakauwaiti. Nuka wantintsui tuma asamtai yajasmautsuk yuawaitti tu enentaimjai. 29 Tura chikicha jusha atum jukimu megkakamtaigka wii untach asan útin jakamtaigka, atum makumattarme, tusa turammaji. 30-31 Ina aparigka ju uchin anen asa, jutsuk jeawakrinka ina apari untach jas puja nu senchi ene enentaimkua jakamtai ii makumamain ainaji. 32 Tura wii chicharkun: Yatsurnaka wii kuitamatjai, tura ataksha jui itachmataigka ame pegkerchau chicharam atajai, tusan timajai.