Miya Nji'inda tə Uya Mbəɗa
14
Nda ya ndzamar kəl janə Zər Gam ta'i tə dəgəl Sihiyona ma ɗa, ana nji 144,000 kə'i cha nda tləm nyi ana tləmər Ada nyi tsəfətsəfə nyi ku nyama nda. 2 Ngə ya ngatə kurakə kya huɗamələm wi nə dəl səyasəya ana wi nə dəradlər par. Kurakə nda ya ngatə wi kurakər zəmbəl wi nda njir zəmbəl kwa tsa. 3 Nda kwa na taɗər miya mar dzəga təlkur nda ana a mar sə pipi fwaɗə ana njirawawa'a inda. A vanya ndə da kwa nau dlədləɓətə miya nda wa, kəl nda nji 144,000 nda nja mbəɗandə tə dunəya nda. 4 Na nda ngə nji'inda a da səwandə kərnənda na kasalikur wa, aka nda ɓəlatə kərnənda ga ɗa chichinyi. Nda nəu Zər Gam nda dəhə ba nda cho ma'i ti. Na nda ingə nja pəliya ku huɗa sə ndəndəu, na nda ngə wi tangərmar sakədar fa nda njo nənyi nə Hyel ana Zər Gam. 5 A da nja ta uya gəzhi ku nya nda wa, ya a da nja səya nda na bikə wa.Mafakə Chama Hyel Makərəu
6 Kəl ngə ya la'a vanya chama Hyel kwa fəl biya huɗamələm, taɓə na Mafakə Mənakə nə pi nda ba'anawa ku cha cha, ka cha dəkə nə nji'inda na ngya tə dunəya, anə kala hə'i, jul nji, nya pampaməu ba'a nji pampaməu. 7 Cha na ana kurakə dzəgam dzəgaməu, “Ləvər ma Hyel hya hətə nyi səli, aka bəjir nəuma nyi shili ti, hətə nyi ma səli nə ndə nda tə mər huɗamələm, hə'i, fa'a dəgal ana tsədzəɗəu.”
8 Mətləkunya chama Hyel tə nəundzə nda tangərma ga na, “A dlati! Babila nda dəgal dlati! Aka cha gwa'atə hə'i dəhə tə dunəya tə wi ku kasalikur, wi ngə ndə kwa wi na mbadla.”
9 Makərkunya chama nda tə nəundzə na kurakə dzəgam dzəgaməu cho na, “Madawa tə həsəli nə sərshishi nda ana sənda nja hərtə pabiya nyi ga dləutsə lamba nyi ku nyama cha ndara tə cha cha, 10 cho ɓə na tsa'amur huɗətlar Hyel, njo nənyi ɓwaɓwatəu na hu'u ibir lyang nda pa'a kwa tah a mar chama karti i'i, ana Zər Gam.a 11 Ya ear ɓwaɓwatə kənda kwa ɗəzə ba'anawa. Vu'i ana pəchi a ɓəlsar da nə nji'inda tə həsəli nə sərshishi nda, ana sənda nja hərtə pabiya nyi nda, ndara ndə nda tə dləutsi lamba tləm nyi wa.” 12 Dəhə sə'ingə kwa char ənda njir nəu Hyel tuku nda ngya na səsə'ua, nanda ingə nji'inda tə nəubiya gadlagadla Hyel ga nəu Yesu.
13 Kəl ngə ya ngatə kurakə səya kya huɗamələm kwa na, “Tsəfəti, njir papa'akur ngə nji'inda tə kuɗə ku Tlakə sakana ana biyama.”
“Ah” ənghwandə shanguɗəu, “Nda kwa ɓəliyasar ana tlər kənda, aka tlər kənda kwa nəu nda.”
Nja Mərəya Dunəya
14 Ya ndzamari, kəl janə ləmbəkə pərtə ma ɗa, ana vanya ndə wi Zər Ndə tsatlə tə ləmbəkə nda ana pahuɗə kər nə bəjingha ku kəra cha, ana tlaku tsəltsələ ku cha cha. 15 Kəl ngə vanyi chama tə biya ku Mbwa'alə Hyel ga ɓwanya na kurakə dzəgam dzəgaməu, ga nar nyi nə ndə nda tə ngya tə ləmbəkə nda, “Hətə tlaku nghə ka tla, aka bəjir tla shili ti, sakədar dunəya ɗa ti.” 16 Kəl ndə nda tə ngya tə ləmbəkə nda tə mər tlər na tlaku nyi nda ga mərəya dunəya.
17 Vanyi chama tə biya ku Mbwa'alə Hyel kya huɗamələm, nacha ma'a tlaku tsəltsəl ku cha cha. 18 Əngə tanyi tsəu vanyi chama nda təkəra hu'u tə shili hya'atə dza dzəgana, ngə cha nga na kurakə dzəgam dzəgaməu ga nar nyi nə nacha nda na tlaku tsəltsəl ku cha cha nda, “Hətə tlaku tsəltsəl nghə ka tliya dəhə yayar anap nda ku fa anap nə dunəya, aka a nəti.” 19 Ngə chama nda tə mər tlər na tlaku nyi ga tsəmtə yayar anap nə dunəya, ga pəu gwa ku mbwar ɓəchi ɓitir anap nə huɗətlar Hyel. 20 Ngə nja ɓəchi ɓitir anap nda ku mbwar ɓəchi ɓitir anap nda biya tiya mələm, kəl mashi kwa biya ku mbwa nda wi dəl, nda kwa ɗa mel 180.