“Nənnə ngə mafakə nda tsa ndə nda na shanguɗə məɗəfə nə Hyel ana sasəlga məɗəfa, kwa zəndə ya sənda ko məra, ma njo la'a wi ana pi ka ya tətənyi ka. 2 Hya'ati! Hya'abiya sənda tə həyadza, nda kwa gwa'a tah, aka a da ya uya tlər nghə tə nyabiyadzə huɗə Hyel ɗa wa. 3 Ɓəl ya tə sənda ka ngatə ga nənyi jiri tangərma, ka gəziya ɓaɓaləu, ngyar səpəla'a ka sha shili da ya səkəu, ma'a ka hya'atə wa, yo ghahəya nghə wi ndər həl. 4 Madangə alenya nji da tsaɗə ku Sardisu nda pa'a tə dyaɓəndə kərnənda na səpəla'a. Nda kwa ma'i ka ya ku chamkur, aka a kitə nda ni. 5 Ndə nda kura njo handzə nyi dzaki pərtəu wi nəkənda. Ya a da yo zhazhibiya tləm nyi ku likatəkatə nə pi pa'a wa, yo bəzəya huɗə Ada ɗa ana chama nyi ənda na'a cha. 6 Ndə nda na himi cha ngatə sənda Shanguɗə kwa dəkə nə njir nəuwa.”

“Jan mafakə hya'atə tsa ndə karti ana jiri, nacha nda na sər mbəɗə nyavi Dauda. Sənda cha mbəɗiya a ndər haɗiya da wa, ya sənda cha haɗiya a ndər mbəɗiya da wa. 8 Kwa zəndə ya sənda ko məra. La'a, a ngya nghə təya ana nyavi bang nda a ndər haɗiya da wa. A zəndətə ya kushi tanyi dunama ngha. Dəhə ka ənga a ɓəlatə təkə ɓwanya ɗa, ya a da ka kəpaliya tləm ɗa wa. 9 Yo mərtə njir həsəli ku vi Shantan, nji'inda kwa na ənda njir Yahuda nda, ya a da nda əngə wa, kəl ja, njir tla gəzhi nda, yo mərtə nda ndo shili piya huɗə ngha, ətsəu, nda kwa ngabiya ənda kwa nyida nghə ya. 10 Mangə a səsə'utə təkə tsa'anyata wi nda ya tsau nghə bar, yo ɓəlatə nghə tsəu tsa'a tə bəjir dzə ngə kwa shili təkəra dəhə dunəya nga. 11 Janə yo shili kuskusəu. Ka gəzəya jiri nghə ɓaɓaləu, tsa vanya ndə da dləuya wazəba ngha. 12 Dəhə ndə nda kura yo fiya nyi ka shimbal Mbwa'alə Hyel ɗa. A tsə'u cho ɓəla ngyar mbwa nda wa. Yo tsəfətə tləmər Hyel ɗa tə cha ana tləmər mələm dəgal nə Hyel ɗa, nacha ngə taɗər Urshalima, nda kwa səya kya huɗamələm hya'atə tsa Hyel ɗa. Yo tsəfətə taɗər tləm ɗa tə cha tsəu. 13 Dəhə ndə nda na himi cha ngatə sənda Shanguɗə kwa na nə njir nəuwa.”

“Janə ɓwanya ndə nda njo na nə Aɗəmja. Nacha ngə jiri ana ndə nda njo dləukəri, ndə nda Hyel tə mər dəhə sə təwari. 15 Kwa zəndə ya tlər ngha, a da kə kwakwaɗə wa ya a da kə shishi'u wa. A i təya ka nda ɗa kwakwaɗə ndara shishi'u! 16 Kəl ja, manda gatsə ɓakɓakə ka, a da kə kwakwaɗə ndara shishi'u wa, yo təfənda nghə ku nya ya. 17 Aka ko na, ndər gəna ya, a tsəmtə təya gəna, a səda ya tar wa. Kəl ja, a da ka zəndə ənda ndə butəbutəu, təhuɗətəhuɗəu, ndə ɗaliɗali, wuləfəu ya dura'a kə wa. 18 Yo dəkətə nghə dəma, ka ɗəlbiya bəjingha nda nja fətəbiya tsa ya, ka ga ka ɗa na gəna, ana ka uya dzaki pərtə ka pəndzi, ka ɗəwanda dura'akur ngha tsa ka da ngatə kuzhi. Ana tsəu ka ɗəlbiya mal tsa ya ka ɓəsəu ku lya ka, ga ka la'a səu.

19 “Nji nda yo nyida ngə ya kwa guhi ana ɓwa. Aka ənga kəl ka mbadzə tsa'anyata ka tubi. 20 Janə ya ta'i nya nyavi ya kwa tsa nyavi. Dəhə ndə nda ngatə kuraka ya ga mbəɗiya ɗa nyavi, yo gwa səm sərsum na cha, nacha tsəu tsa'a naya.

21 “Dəhə ndə nda kura, yo nənyi lakur ngya tsa'a naya ku dzəga təlkur, tang wi nda ya kura ga ngya tsa'a na Ada ɗa ku dzəga təlkur nyi. 22 Dəhə ndə nda na himi cha ngatə sənda Shanguɗə kwa na nə njir nəuwa.”