Jirikur nda ku Zər Hyel
5
Ma dəhə ndə nda nənyi jiri ənda Yesu na cha ngə Kəristi, Zər Hyel cha, ya dəhə ndə nda kwa nyida Ada, kwa nyida cha ngulisha'a tsəu. 2 Jan ənda məno zəndə ənda kwa nyida mən nguli Hyel: Təwa nyida Hyel ana ɓəlatə gadlagadla nyi. 3 Nyida kəmən nə Hyel nacha ngə məna ɓəlatə gadlagadla nyi, ya gadlagadla nyi da dzau wa, 4 aka kala Zər Hyel kwa kura dunəya. Təwa jirikur kəmən tsəu məna kura dunəya. 5 Wa ngə ndə ngə kwa kura dunəya nga? Kəl ndə nda tə nənyi jiri ənda Yesu nacha ngə Zər Hyel.6 Yesu Kəristi tə chabiyadzə ka Zər Hyel təwa baɓtisma nyi ku ɓiti ana təwa pənda mashi nyi tə taməngəla. A da təwa ɓiti tanyi wa, kəl ja, təwa ɓiti ana mashi. Ya shanguɗə ngə kwa ɓwanya təkəri, aka shanguɗə nacha ngə jiri. 7 Aka sə makər da nda kwa ɓwanya təkəri:a 8 Shanguɗəu, ɓiti, ana mashi; ya dəhə nda makər nga, kwa na sə zhang. 9 Kwa dləukər mən ɓwanya nda ndə tə pəa, kəl ja, ɓwanya Hyel ndiya tə nə ndəu, aka Hyel ngə tə ɓwanya təkəra Zər nyi. 10 Dəhə ndə nda tə nənyi jiri nə Zər Hyel ɓwanya ngə ku ɗufwa cha. Kala ndə nda a da nənyi jiri nə Hyel wa, a fiya tə cha Hyel ka ndər tla gəzhi, aka a da cha nənyi jiri nə sənda Hyel tə na təkəra Zər nyi wa. 11 Jan ɓwanya nda nja pəa: Hyel tə nə mən pi nda ba'anawa, ya pi nga ku Zər nyi cha. 12 Dəhə ndə nda na Zər nga, pi tsa cha; dəhə ndə nda pa'a da na Zər Hyel tsəu, pi da tsa cha wa.
Udiya Jwaməu
13 Ya tsəfə nə nəhi, nahi nda nənyi jiri nə tləmər Zər Hyel, aka ga hya zəndə ənda pi nda ba'anawa da tsa hi. 14 Jan ənda məno yada Hyel gangkərtəyi, ma məna gədi dəhə sə wi nda cho i cho ngatə mən. 15 Ya macha kwa zəndə mən ənda kwa ngatə mən cha, dəhə sənda məna gədi zəndətə mən məno uya. 16 Ma kala ndə tə la'a zamə nyi tə mər səpəla'a nda a da nji ka yi na cha ku tə wa, cha pətlənya, ya Hyel kwa nənyi pi. Nji nda səpəla'a kənda da nji ka yi na nda ku tə wa ngə yo na. Səpəla'a da nda kwa yi na ndə ku tah, a da ya na hya pətlənya təkəra ngə wa. 17 Dəhə sənda ndə tə zandə səpəla'a cha, ya səpəla'a da nda a da nji ka yi na ndə ku tə wa.
18 Kwa zəndə mən ənda dəhə ndə nda nə Hyel da kwa ngya ka mər səpəla'a wa, aka Zər Hyel kwa ɓəlatə nda, ya ndə ɗimi ngə da kwa takasiya nda wa.
19 Kwa zəndə mən ənda nə Hyel mən, ya dəhə dunəya ndə ɗimi ngə ngo gəla. 20 Kwa zəndə mən tsəu ənda Zər Hyel tə shili ga nə mən ngabiya, ka ga məna zəndə nyi nacha nda jiri, ya aku cha mən, nacha nda jiri, Yesu Kəristi nacha ngə Hyel nə jirijiri, ana pi nda ba'anawa.
21 Ngulisha'a nda yo nyida, gəgatə ma kərnəhi tsa katəu!