Dzətə ma Shanguɗəu
4
Ka bazhi nda yo nyida, ngwa hya da dləukər na kala shanguɗə wa, kəl nda hya dzətə shanguɗə i'i, hya la'a ndara nə Hyel nda, aka njir mətakər gəzhi biyatə ɗang ku dunəya. 2 Jan ənda hyo ɗana ngabiya Shanguɗə nə Hyel; kala shanguɗə nda dləukər ənda Yesu Kəristi tə shili ku dza, nə Hyel nda. 3 Kəl ja, kala shanguɗə nda pa'a dləukər na Yesu, a da nə Hyel nda wa, shanguɗə njir dawa na Kəristi nda; nda hya ngatə kwa shili nda, ya sakana ma'a ku dunəya nda.4 Nahi ngulisha'a nə Hyel hi, ya wurtə hya kura nda, aka ndə nda ku hi, dəgal cha matsa ndə nda ku dunəya. 5 Na nda nə dunəya nda, ya nda kwa ɓwanya təkəra sər dunəya, ya dunəya kwa səhimi da nda, 6 kəl nda namən nə Hyel mən. Dəhə ndə nda zəndə Hyel kwa səhimi da mən, kəl ja, dəhə ndə nda pa'a da nə Hyel, a da kwa səhimi da mən wa. Əngə ngə məno ngabiya Shanguɗə jirijiri ana shanguɗə gəzhigəzhi.
Hyel Ndər Nyida Cha
7 Ka bazhi nda yo nyida, a mən nyida kərnəmən, aka nyida kwa hya'atə tsa Hyel. Kala ndə nda kwa nyida Zər Hyel cha, ya kwa zəndə cha Hyel. 8 Kala ndə nda pa'a kwa nyida, a da cho zəndə Hyel wa, aka Hyel nyida cha. 9 Janə ənda Hyel kwa char mən nyida nyi, cha sətə zər nyi yayanyi zhang shili ku dunəya, tsa'aka məno ɗa na pi təwa nyi. 10 Nənnə ngə nyida jirijiri, a da bəra məna nyidatə Hyel wa, kəl nda cha nyidatə mən ga sətə Zər nyi wi sər hatəmachi ka səpəla'a kəmən. 11 Ka bazhi nda yo nyida, manə Hyel ngə tə nyidatə mən, namən tsəu məno kina nyida kərnəmən. 12 A ndə da ta la'a Hyel wa, kəl ja, ma məna nyida kərnəmən, Hyel ana ngya cha ku mən ya nyida nyi kwa nyabiyadzə ku mən.
13 Kwa zəndə mən ənda ku cha mən, ya nacha tsəu ku mən, aka nə mən tə cha Shanguɗə nyi. 14 Ya la'atə mən ga ɓwanya təkəri, ənda Ada tə sətə Zər nyi ga cha ɗa ka Ndər Dləuya dunəya. 15 Madawa tə dləukər ənda Yesu Zər Hyel cha, Hyel kwa ngya ku cha, ya nacha tsəu ku Hyel. 16 Aka əngə zəndətə mən ya dləukərtə mən nyida nda Hyel ni nə mən.
Hyel nyida cha ya dəhə ndə nda kwa ngya ku nyida ana ngya cha ku Hyel ya Hyel tsəu ku cha. 17 Təwa ənga nyida tə nyabiyadzə ku pama mən, ka ga mən ɗa gangkərtəyi tə bəjir nəuma; aka wi nacha mən ku dunəya na. 18 A ləvər da ku nyida wa, kəl ja, nyida jirijiri kwa hənda ləvəra. Aka ɓwaɓwatə kwa gwa'atə ləvəra, ya ndə nda kwa ləvəra a da cha ku nyida jirijiri wa.
19 Məna kwa nyida aka nacha ghəya nyida mən. 20 Ma kala ndə nda na, “Kwa nyida ya Hyel,” ya cho ɗa tsa zamə nyi, ndər tla gəzhi cha. Aka kala ndə nda a da kwa nyida zamə nyi nda cho la'a wa, a da cho nau nyidatə Hyel nda pa'a cho la'a wa. 21 Ya cha nə mən gadlagadla na: Aka dəhə ndə nda kwa nyida Hyel, tuku cha nyida zamə nyi.