3 Ahir nda nda səmdzən ga pətlənya, ngə nda fəkə nda chi, ga səu nda ku laku.

4 Ka Barnabas na Shawulu nda Shanguɗə Karti tə sə tsəu, nda təra yi Salukiya, hinda ngə nda gwa ku param ga təra yi Kubrus hə'i nda dəl dəgal tə ɓandi. 5 Sakanda nda həya mələm Salamis ti, nda gwa dəkə ɓwanya Hyel ku vi pətlənya nə njir Yahuda. Ana Yohana nda njo nga Markus kwa vala nda.

6 Nda tahəya hə'i nda dəl dəgal tə ɓandə tsa'a vu Pafos, ngə nda ɓə na vanya ndər Yahuda hi nda, ndər mətakər gəzhi, tləm nyi Bar-Yeshuwa ndər hakəza. 7 Bazhinya ngwamna nə hə'i Kubrus cha, tləm nyi Sarjiyus Bulus, ndər dəma cha gagaɗa. Ngə cha nga ka Barnabas ana Shawulu yo ki nyi, aka cho i ka cha ngatə ɓwanya Hyel. 8 Kəl Alimas ndər hakəza (əngə tləm nyi na nya njir Heleni) nda tə kəpalnda ɓwanya kənda, cho gwa'a shandənyi kər nə ngwamna nda tsa cha da ɗana jirikur ku Yesu. 9 Kəl ngə Shawulu nda njo nga Bulus tsəu, nda nyinyinyi na Shanguɗə Karti, cha ndzam Alimas hinghəu. 10 Ga na, “Nakə zər sərtakə ɗimi! Nakə ndər dawa dəhə sənda tsa'atsa'a. Shakər ɗimi ana kwakunakur tanyi ngə nya taka, a da ko ta'ində gwa'a səuwa laku jiri nə Tlakə ma? 11 Nəchana Tlakə kwa cha nghə na chi, ko wuləfə a tsə'u ko la'a pəchi wa, kəl vanya bəji.”

Təma tanyi mazhikəndəli ana kutlə tə haɗiya lya cha, kəl ngə cho ma'i pəpəmpəpəm cho gwa'a ndə ka nja təɗətə nyi cha cha. 12 Manda ngwamna nda tə la'a sənda ɗa na ndə nda, cha mər məngəl na dlədləɓə təkəra Tlakəu ga nənyi jiri nə Yesu.

13 Bulus ka bazhi ma'i nyi tə gwa ku param vu Pafos, ga shili vu Parga tə hə'i Pamfiliya, tangnda ngə Yohana nda njo nga Markus tə ngya nda ga ɓəl yi Urshalima. 14 Ngə nda ngyar Parga ga shili vu Antakiya a tə hə'i Bisidiya. A tə Pəchir Ngyaməngya ngə nda təra yo vi pətlənya njir Yahuda ga yi ngya. 15 Ahir nja kəratsən ku gadlagadla Musa ana sənda njir mətakər nə Hyel tə tsəfəti, ngə njirawawa'a inda təkəra vi pətlənya tə sətə nda mafakəu, bəra “Kə'i zama, ma cha ɓwanya fətənyi ɗufəu nə nji da tsa hi dəkar nda ma.” 16 Ngə Bulus tə hya'atə fwatə ga har cha cha ka nji bəgəu, ngə cha na.

“Njir Isra'ila ana nahi nji'inda pa'a njir Yahuda nda tangnə kwa həsəli nə Hyel, səya ma himi da ya! 17 Hyel nə njir Isra'ila ngə tə tabiya ka jival kəmən ɗəɗəməu, cha gwa'atə nda yatəkər bəji nda nda vu Masar. Ana gyalkur gagaɗa cha həbiya nda ku hə'i nda. 18 Fa fwaɗəkumənyi cha səsə'u nda kwatə dadil takəu. 19 Cha kura jul nji məɗəfə tə hə'i Kan'ana ga nənyi hə'i kənda nə nənyi na nji ka sər fa'aki kənda. 20 Dəhə sə'ingə tə ɗa ku fa gharəu fwaɗə na tufkumnyi.

“Ahir nga Hyel tə nənda njir nəuma, tsa'a yatə bəjir Sama'ila ndər mətakər. 21 Manda nda gwa'a nja fiya nda təl, ngə Hyel tə tabiya nda Saul zər Kish ku nyandəla Banyami, cha ɗaka təl kənda fa fwaɗəkumənyi. 22 Ahir Hyel tə həbiya Saul ku təlkur, ngə cha fiya Dauda ka təl kənda. Janə sənda Hyel tə na təkəra cha, ‘Dauda zər Jesi ngə ndə nda səya tə ɗufwa ya, cha kwa mər dəhə sənda yo i cha məra.’

23 “Ku nyandəla ndə na, Hyel tə shili na Ndər Dləuya nə njir Isra'ila nacha ngə Yesu wi nda cha mər alkawal. 24 Təvi Yesu ghəya tlər nyi, Yohana bəzə tə ɓwanya Hyel nə dəhə njir Isra'ila ənda nda tubi nja mərtə nda baɓtisma. 25 Manda Yohana kaɗə wurandə tlər nyi, ngə cha na, ‘Wa hyo na naya? A da naya ngə ndə nə hyo səkə nə wa. Kəl ja, cho shili hiɗa, a da ya nji ka ya pəliya mada sər mba ɓiɓi nyi wa.’

26 “Kə'i zamə ɗa, nguli Ibrahim ana nahi nji'inda pa'a njir Yahuda nda kwa ləvər Hyel, a nə mən ngə nja sətə ɓwanya Dləuya na. 27 Njir Urshalima ana njirawawa'a kənda da zəndəbiya ndara wa ngə Yesu wa, ya a da nda ngabiya ɓwanya njir mətakər nda njo kəratsən nə nda kala Pəchir Ngyaməngya wa, dəhəka ənga nda tsəya nyi ga nyabiya sənda njir mətakər tə na. 28 Madangə a da nda uya sənda pəlakər nda kwa tsəya nyi təkər wa, nda gədi Bilatus cha tsəya nyi. 29 Ahir nda mərtə nyi dəhə sənda tsəfətsəfə nyi təkəra cha, ngə alenya nja həya nyi səya kyatə taməngəla, ga haɗiya nyi ku hwa.

30 “Kəl ja, Hyel tə hya'andənyi ku hwa. 31 Nji nda ɗaka ma'i kə'i cha hya'atə vu Galili gwa Urshalima la'a nyi ti nə hanyi ɗanghəu. Nanda ingə nji'inda kwa ɓwanya təkəra cha nə nji kəmən. 32 Hyel tə mər alkawal nə ka ajin mən, nacha nə sənda shili naea tangna, ka ea shili nahi Mafakə Mənakəu ənda 33 Hyel nyabiya tə alkawal ngə ka mən namən nda nguli kənda, təwa hya'andə Yesu ku hwa. Wi nda cha tsəfətsəfə nyi ku mətləkunya Dəla nda Karti, bəra,

36 “Aka nda Dauda tə mər tlər nə Hyel ku bəji nyi, cha tah, ngə nja haɗiya nyi dzər ka jival nyi, ya dza cha yiɗa ti. 37 Kəl ja, ndə nda Hyel tə hya'andə ku hu da ɓə na yiɗa wa. 38 Aka əngə ja ka zamə ɗa, cha ɗa na zəndəkur kəhi ənda təwa Yesu ngə nja uya farbikər səpəla'a ngə nja bəzə nə hi nga, a da təwa gadlagadla Musa wa. 39 A təwa nyi ngə kala ndə nda tə nənyi jiri, kwa ɗa tsa'atsa'a mar Hyel nacha nə sənda nəubiya gadlagadla Musa da kwa nau mərtə wa. 40 Hya gəla tsa sənda njir mətakər tə dəkə da ɗa na hi, abəra,

42 Nda ka Bulus na Barnabas kwa ngyar vi pətlənya nda, ngə nji tə gədi nda tsa'anyata ka nda ɓəla shili ɓwanya təkəra sə'ingə tə Pəchir Ngyaməngya ngo shili nga. 43 Ahir nda nja wiɗənda nji, kəl ɗang ku huɗa njir Yahuda ka nji'inda tə gwa ku lakur nəu Hyel nə njir Yahuda tə nəu ka Bulus na Barnabas, ngə ka Bulus tə ɓwanya nə nda ga gədi nda nda biyama ku ɗanghali Hyel.

44 Nda vanya Pəchir Ngyaməngya tə shili, gəɗaka dəhə njir mələm nda tə tsəmtədzə ku vi pətlənya ka nda ngatə ɓwanya Tlakəu. 45 Nda njir Yahuda tə la'a dlama nji'inda, ngə sələkəkur tə nyandə ɗufwa nda, nda kəpaliya sənda Bulus kwa na ana ɓwanya ɗimi. 46 Kəl ka Bulus na Barnabas tə wum nənda a da na ləvər wa, “Tuku ngə ea dəkə ɓwanya Hyel nə hi tangərma. Kəl ja, manda ngyar təhi, a dlanda təhi kərnəhi tsa pi nda ba'anawa, nəchana eo sha ya kəra nji'inda pa'a njir Yahuda. 47 Aka nacha nə tsaubar nda Tlakə tə tsau ea, bəra,

48 Nda nji'inda pa'a njir Yahuda tə ngatə ənga, nda mər hirgyaɗi, ga hətə nyi səli nə ɓwanya Tlakəu, ya dəhə ba nji'inda nja ɗəmtsə ka pi nda ba'anawa tə nənyi jiri. 49 Ngə ɓwanya Tlakə tə wiɗətədzə tə ɓələr hə'i nda dəhəu. 50 Kəl ja, wawa'ar njir Yahuda tə tsəkutə mahi'i inda na ləvər Hyel, nda njo la'a na səli, ana shili nda tə ɗaka wawa'ar mələm. Ngə nda gwa'atə nja ɗa məndza'u na ka Bulus na Barnabas ga gədləbiya nda ku ba hə'i kənda. 51 Ngə ka Bulus tə dəgənda bərbər nda tə hya nda ga cha ɗa ka sər ɓwanya təkəra mələm nda, ga təra yi Ikoniya. 52 Ətsəu njir nəu inda vu Antakiya tə nyi na hirgyaɗi ana Shanguɗə Karti.