2 Kəl Istifanus tə wuma, “Kə'i zama ka ada, ngatə ɗa ma! Təvi jival kəmən Ibrahim tə təra ga yi ngya vu Haran, Hyel nda na səli ngə tə shili da cha avu Mesopotamiya, 3 ga nar nyi, ‘Ngyar hə'i kəhi ana njikə hi ka təra kyatə hə'i nda ya kwa char ngha.’

4 “Kəl ngə cha ngyar hə'i njir Kaldiya ga yi ngya vu Haran. Ahir nda Adanya Ibrahim tə tah, ngə Hyel tə hənda nyi shili tə hə'i nə təhi ti nəchana. 5 Kəl ja, a Hyel da tlatsə hə'i nda nə Ibrahim mada kushiu, cha ɗa ka sər fa'aki nyi wa, kəl ja, Hyel tə mərtə nyi alkawal ənda cho nə nyi, kwa ɗa ka nənyi ana nyandəla cha, madangə aku bəji nda a zər da tsa cha wa. 6 Janə sənda Hyel tə nar nyi, ‘Nyandəla ka kwa ki ngya tə hə'i kəndəu, mbwa nda nda kwa mər tlər mavakur ti, nji'inda kwa nənda ɓwaɓwatəu fa gharəu fwaɗəu.’ 7 Hyel tə na, ‘Ya kwa shili mərtə nyi nəuma nə nji'inda tə mər mavakur, ahir ngə jival nghə kwa biya ku hə'i nda nda kwa shili həsəli na'a tangna.’ 8 Ngə cha nənyi tsaubar nə tla bədzang ga cha nyabiya alkawal nyi. Təma ngə Ibrahim tə yiya Ishaku ga tlanda nyi bədzang ahir nda cha hanyi chisəu. Ngə Ishaku tsəu tə tlanda nyi bədzang nə zər nyi Jakop, əngə tanyi tsəu Jakop tə tlanda nyi bədzang nə ngulisha'a nyi kwabəmətləu, nanda ngə tə ɗa ga jival kəmən.

9 “Nguli Jakop inda tə ɗa shishi na zamən nda Yusufu, ngə nda ɗəlnda nyi ka mava ya tə hə'i Masar. Kəl ja, Hyel tsa'a na cha, 10 ngə cha dləuya nyi ku dəhə ɓwaɓwatə inda tə ɗa na cha. Ku sakanda Yusufu tə ghahəna kərnyi a mar Fir'auna, Hyel tə nənyi papa'akur ana dəma, ngə Təl nda tə fiya nyi ka dəgal təkəra hə'i Masar ana patla nyi. 11 Təma ngə huɓə tə tlə tə dəhə hə'i Masar ana Kan'ana, nda tə shili na ɓwaɓwatə nə nji, ya a sərsum da tsa ka ajin mən wa.

12 “Nda Jakop tə ngatə ənda uhi da vu Masar, ngə cha sə ngulisha'a nyi, ajin mən i'i, ya tangərmar ma'i kənda yi nda nga. 13 Aku ma'i kənda mətləkunyi, ngə Yusufu tə chabiya kərnyi nə ka zamə nyi inda, əngə Fir'auna tə nda zəndəbiya sə təkəra nyandəla Yusufu. 14 Ngə Yusufu tə sətə nyi mafakə nə Ada nyi Jakop, cha nar nyi ana dəhə njir ki kənda, nji məɗəfəkumnyi parnya tufu ənda nda ɗəu shili Masar. 15 Kəl Jakop tə təra yi Masar, a hinda cha tah, nanda ka nguli dəhəu. 16 Manda nda kuɗa, ngə nja fa'atə nda ga yi haɗiya nda hi Shekem ku hu nda Ibrahim tə ɗaka ɗəlbiya tsa nyandəla Hamor.

17 “Nda bəji tə ɗa ləhə nda Hyel kwa nyabiya alkawal nda cha mər nə Ibrahim, ɗangkura nji kəmən kwa tsakə 'ual'ual vu Masar. 18 Aku nda na bəji vanya təl nda pa'a kwa zəndə ndara wa ngə Yusufu tə ghəya səm təlkur vu Masar. 19 Ngə cha gwa ku ɗa məndza'u na kə'i jival kəmən ga ɗa dza'u təkəra nda gagaɗa, cha fəu nda tuku nda ki pənda nguli dizə kənda ka nda kuɗa. 20 Aku bəji nda ngə ja, nja yah Musa, zər gumaguma gagaɗa a mar Hyel. Ngə nja ngya na cha ku ki ada nyi nə hya makərəu. 21 Nda nja da həbiya nyi ku ki ga ɗəwanda nyi, ngə kwar Fir'auna tə hətə nyi ga handə ka zər nyi. 22 Nja dlədləɓətə nyi dəhə dəma nə njir Masar, ngə cha ɗa ka ndə dəgal ku ɓwanya nyi ana tlər nyi dəhəu.

23 “Nda Musa tə fa fwaɗəkumənyi, ngə cha jigadəma ənda cha yi da kə'i zamə nyi njir Isra'ila ka cha usa nda. 24 Ngə cha yi həya ənda vanya ndər Masar kwa ɗa məndza'u na vanya ndə kənda, cho dəgə nyi, kəl ngə cha yi ga halə təkəra ndə kənda nda, ga tsəya ndər Masar nda. 25 Aku jigadəma nyi, ndə cha ndara njikə nda ngabiya tə ənda təwa nyi ngə Hyel kwa dləuya nda ku ndana ɓwaɓwatəu, kəl ja, a da nda ngabiya wa. 26 Vanya zəkə cha la'a njir Isra'ila tsa'a mətləu kwa pa kərnənda, ngə cha gwa'a ka na cha ɓatliya nda. Cha na, ‘Ngatə ma, nahi nji zhang hi, mya gwa'atə hya kwa pa kərnəhya?’ 27 Kəl ja, ndə nda kwa ɗa məndza'u na kuvanyi nda tə mbəlanda Musa ga na, ‘Wa ngə tə fiya nghə dəgal a təkəra ea ga ka mərtə ea nəuma? 28 Aa ko gwa'a ka tsəya ɗa tang wi nda ka tsəya ndər Masar ənə nda ya?’ 29 Manda Musa tə ngatə ənga, ngə cha ngyar Masar ga hwi tanyi ga yi ngyata nyi tə hə'i Midiya. A hinda cha ya nguli shili mətləu.

30 “Ahir fa fwaɗəkumənyi, ngə Chama Hyel tə chabiya nyi kərnyi nə Musa ku kyara hu'u tə dadil takəu ku gədləla ləha dza mə Sinai. 31 Musa tə mər məngəl nda cha la'a sənda, ngə cha əzar dzə ləhə ya dzər gədləla nda ga cha ndzamtə mənakəu. Kəl ngə cha ngatə kurakər Tlakəu. 32 ‘Naya ngə Hyel nə ka jival ngha, Hyel nə Ibrahim, Ishaku ana Jakop.’ Ngə ləvər tə səya Musa daɓə cha kwa dzədzi, ya a da cha zhaka nau har kər ka cha ling wa.

33 “Ngə Tlakə tə nar nyi, ‘Səɗəbiya ɓiɓi ku hya ka, aka mbwa ngə kə ta'i tə nga mbwa karti nga. 34 Jiri a la'a təya chul ɓwaɓwatə nda na'a wa nji kwa avu Masar. A ngatə ya ngi'i kənda, na cha ngə ya səya ka ga ya dləuya nda. Sakan ja, andə yo sə nghə yi Masar.’ 35 Ya Musa nga, nacha ngə ndə nda njir Isra'ila tə ngyari, nda kwa na, ‘Wa ngə tə fiya nghə dəgal ana ndər tla nəuma kəea?’ Na cha ngə ndə nda Hyel tə səa ka ga cha ɗa dəgal təkəra nji ana cha dləuya nda tsa'a na vala Chama Hyel nda tə char kərnyi ku gədləla nda hu'u kwa gəɗə kwa nda. 36 Musa tə ma'i na nji'inda hya'atə vu Masar, cha mər səshinshin ana sər məngəl i avu Masar ana a tə Dəl Meditereniya ana aku dadil takəu fa fwaɗəkumənyi.

37 “Musa təkərnyi nga nar nyi nə njir Isra'ila, ‘Hyel kwa sətə hi ndər mətakər nyi, wi naya, ya ku njikə hi ndə ndənyi kwa biya.’ 38 Nacha nda ku daɓədzər njir Isra'ila ku dadil takəu; na cha ka jival kəmən, ku bəji nda Chama Hyel tə ndər nənyi kyo kəra Mə Sinai, ngə cha dləutsə ɓwanyar pi ka ga cha nə mən.

39 “Kəl ja, kə'i ajin mən tə ngyar ngatə nya cha, nda mbəlanda nyi ya tə yimbili, kəl nda kwa chim ku ɗufwa nda ənda nda ɓəl ta nda yi Masar. 40 Aka ənga, nda nar nyi nə Haruna, ‘Ɓatlətə ea katə nda kwa nəu na ea. A da ea zəndə sənda tə ɗa na Musa ndə nda tə həbiya ea ku hə'i Masar wa.’ 41 Aku bəji nda ngə ja, nda ɓatlətə katə pabiya ɗa zər Tla, nda kwa hatəmachi nənyi, nda kwa mər hirgyaɗi aka sənda nda mərtə na cha nda. 42 Kəl ngə Hyel tə shandə nda dagəryi ga ngya nda nda həsəli nə sasəlga i'i kya huɗamələm tang wi sənda njir mətakər nə Hyel tə tsəfətə ku likatəkata.

44 “Ka ajin mən nəu tə dza ana kwapatə Hyel a tə dadil takə ɗəɗəməu. Nja latə tang wi nda Hyel tə nar nyi nə Musa nja lati, məlməl na sənda cha la'a. 45 Kwapatə Hyel nda ngə ajin mən tə fa'abiya ki nə ga shili nə bəji nda Joshua tə ɗa dəgal ti, nda nda kwasə hə'i tsa nji'inda Hyel tə gədləbiya manə nda i. Kwapatə nda ngya tangnda ba'a ti bəji nda Dauda tə ɗa təl ti. 46 Dauda tə uya ɗanghali tsa Hyel ngə cha gwa'a laku ka cha həriya nyi Mbwa'alə nə Hyel nə Jakop. 47 Kəl ja, Saloman ngə tə nda hərtə nyi Mbwa'alə nda nə Hyel.

48 “Kəl ja, Hyel nda dəgalkur nyi tə ndiyavi a da kwa ngya ku ki inda nja hər na chi wa, wi sə nda ndər mətakər Hyel tə ɗaka dəka,

51 “Nji dza'u i hi! Hya ngyar nənyi ɗufwa hi nə Hyel, ga dati himya hi tsa ngatə ɓwanya Hyel! Tang wi nə ajin hi, kala bəji hyo ɗa tsa Shanguɗə Karti! 52 Aku huɗa njir mətakər Hyel ingə ya, wa ngə pa'a ajin hi tə ɗa məndza'u na? Nanda tsəya ma'a nji'inda Hyel tə sə ga nda bəzəya ənda Ndə Tsa'atsa'a kwa shili, na cha ngə Kəristi. Na hi tsəu hya tləɗanda nyi təkərnəhi ga tsəya nyi. 53 Nahi ingə nji'inda tə dləutsə gadlagadla Hyel, nda Chama Hyel tə lətə səya nda, dəhə ka ənga a da hya ɓəlatə wa!”

54 Nda nji'inda ku tsəmdzə nda tə ngatə sə nda Istifanus tə par nda, ngə nda mər huɗətla gagaɗa, nda kwa ɗəhir təkəra cha ana huɗətla. 55 Kəl ja, Shanguɗə Karti tə nyandə Istifanus, ngə cha ndzam shi huɗamələm ga la'a səlir Hyel ana Yesu tə ta'i təwa chisəma Hyel. 56 Ngə cha nar nda, “Janə yo la'a ənda huɗamələm tə mbəɗa ana Yesu Zər Ndəu tə ta'i tə chisəma Hyel!” 57 Nda nji'inda tə ngatə ɓwanya nga, kəl ngə nda pəu chi ku himya nda ga piya kurakəu. Ngə nda hya'atə dəhə nda ga pə ya kəra cha ana jigadəma zhang, 58 ga mbəlabiya nyi biya tə ya mələm ga ghəya vakə nyi na hangu. Njir wula nyi inda tə səɗənda ləkutə kənda ga fiya nyi nə vanya tlakala ka cha ɓəlar nda, tləm nyi Shawulu. 59 Sakanda nda kwa vakə Istifanus ti, ngə cha pətlənya, “Tlakə Yesu, dləutsə pya ya.” 60 Ngə cha uzhi ga nga na kurakə dzəgam dzəgaməu “Tlakəu, ngwa ka da gəzə nəna səpəla'a təkəra nda wa.” Cha na ənga ga tah.