3 Yesu kwa səm sərsuma hi Baitanya ku ki vanya ndəu njo nga Shiman nda bibi tə ɗaka səya. Ngə vanya malakə tə səgwa ana təkə mal nda kwa shi'uni kwitkwitəu, nja ɗəl ana kwaba 'ualəu, nja mər na nardi tsa'amunyi. Cha mbəɗiya təkə nda ga pəu nyi mal nda ku kəra Yesu ga cha hətə nyi səli.

4 Alenya nji'inda kwa səmə kə'i Yesu inda mər huɗətla ga na nə kərnənda, “Ka mi njo ɗahurnda mal nja ɗəl na kwaba 'ual əna? 5 Kwa kina nji ɗəlnda təkəra kwaba nda ndə kwa uya ku tlər nyi nə fa zhang, nja nənyi nə njir ɗali.” Nda tsə mala nda gagaɗa.

6 Yesu tə ɓəlakə nda ga na, “Ngyar ma mala ngə tsəka'a. Ka mi hyo tsənya? Sə mənakə gagaɗə ngə cha mər na'a. 7 Tangnə nji ɗaliɗali kə'i hi, hyo nau vala nda dəhə bəji nda hyo i ti. Kəl nda naya, a da yo ngya wa'atanyi kə'i hi wa. 8 Sənda cho nau ngə mər cha, cha pəu ɗa mal ka cha ɓatliya dzaya ka haɗa təvi bəji ɗa. 9 Jiri yo nar hi, dəhə mbwa nda njo bəzə Mafakə Mənakə tə aku dəhə dunəya, njo ɗənghatə na səngə mala na mər nga njo ɓwanya təkəri.”

10 Ngə Yahuda Iskərayoti zhang ku huɗa shawa kwabəmətlə inda təra yada ka wawa'ar fərist ka nda yi ɓwanya təkəra ənda cho tləɗanda nda Yesu. 11 Nda nda ngatə ənga, nda mər hirgyaɗi ga mər alkawal ənda ndo nənyi kwaba. Ngə Yahuda Iskərayoti tə ghəya gwa'a lakur tləɗanda Yesu.

12 Pəshir tangərmar pəchi nə Ladər gwazhilakə kəla tləlam, pəchir hatəmachi na kətəng ladər Dləgəlnda, shawa Yesu tə jau nyi, “Tangman ko i ea ɓatliya mən sərsum Ladər Dləgəlnda?”

13 Ngə Yesu tə sə nji mətlə ku huɗa shawa nyi cha nar nda, “Ma hya gu ta mələm Urshalima, hyo ɓə na vanya ndə kwa hə giɗa ɓiti. Hya nəu nyi. 14 Ma ki nda cha gwa kwa, hya nar nyi nə tlakər ki nda, ‘Maləm kwa jau ya, tangman ngə vi mihiɓi nda yo səm sərsum Ladər Dləgəlnda naya ka shawa ɗa kwa?’ 15 Cho təra na hi gyo vanya vi bang da kyatə kəra vanyi, madami ɓatləɓatlənyi kwa. A tangnda hyo ɓatliya mən sərsuma.” 16 Ngə shawa mətlə inda təra gu ta mələm ga həya madami tang wi nda Yesu tə na, ngə nda ɓatliya sərsum Ladər Dləgəlnda hinda.

17 A ba akəu, Yesu tə shili ka shawa nyi kwabəmətləu. 18 Nda nda kwa səm sərsuma, Yesu tə na, “Jiri yo nar hi, ndə zhang ku pama hi nda kwa səmə naya tangna, kwa tləɗanda ɗa.”

19 Aku huɗətla gagaɗa, madawa ku pama nda kwa jawa, “A da naya ngə ko na nganə ya?”

20 Cha ɓəlakə nda, “Zhang ku pama hi kwabəmətləu ina, nahi inda kwa səma ku shala nənnə na ya. 21 Tuku Zər Ndə kwa tə wi nda cha tsəfətsəfə nyi ɗəɗəməu. Kəl ja, cho ɗa sər tiwi nə ndər tləɗa nyi. Bəliya a nja nda ya nyi wa!”

22 Nda nda kwa səm sərsuma, Yesu tə hətə gwazhilakəu, cha səkər papa'akur. Cha pəpasəu ga nənyi nə shawa inda cho na, “Dləutsə ma, nənna, dzaya na.”

23 Ngə cha hətə ɗeɗika ɓitir anap, cha usaku Hyel təkəri. Cha nənda, ngə dəhə nda sa ku ɗeɗika nda. 24 Cha nar nda, “Nənna, mashi ɗa na, nda kwa nyabiya alkawal nda ku pama Hyel ana nənyi na nji. Nja pənda wi sər hatəmachi aka nji ɗanghəu. 25 Jiri yo nar hi, a tsə'u yo sa ɓitir anap səkə wa, kəl pəshinda yo sa taɗənyi aku təlkur Hyel.”

26 Ahir nda na miya, ngə nda biya təra gyatə Dəgəl Zaitun.

27 Aku laku Yesu tə na nə shawa nyi, “Dəhə hi kwa ngya ɗa. Aka ɓwanya Hyel tə na, ‘Hyel kwa tsəya ndər ɓəla, kətəng tsə'u kwa wiɗa.’ 28 Kəl ja, ma ya hya'atə ku hwa, yo təra manə hi yi Galili, yo həya hi hinda.”

29 Bitrus tə nar nyi, “Mada na dəhə nji ngya ngha, a da ya kwa ngya nghə na'a wa.”

30 Yesu tə ɓəlakə nyi, “Jiri yo nar nghə Bitrus, əvu'i na, təvi mətləkunya tiwir vəgəm, ko kəpal zəndə ɗa zhaka makərəu.”

31 Ngə Bitrus tə na kumə kuma, “A da wa! Mada nacha ɗa ka yo tə naka, a da ya kwa kəpal zəndə nghə pa'a wa!” Ngə alenya shawa inda na əngə tsə'u.

32 Ngə nda təra ya tə vanya mbwa njo nga Getsemani, ngə Yesu tə nar nyi nə alenya shawa nyi, “Ngya ma tangna, naya tsəu yo ki pətlənya.” 33 Cha təra ka Bitrus, Yakubu ba'a Yohana, ɗufwa cha ghəya gwa ku ɓwaɓwatə gagaɗa. 34 Cha nar nda, “Ɗufwa ya nyi tə na ɓwaɓwatəu, wi yo tah. Səkətə ɗa ma tangna hya ɓəla ana ya.”

35 Cha tsaɗar dzə biyama ga dla hu'i, cha pətlənya ga na, macha kwa ɗa cha nja hənda nyi ɓwaɓwatə nə kwa səkə nyi nga. 36 Cha na, “Abba^b, Ada, kwa nau kə mər dəhə səu. Maki, hənda ɗa ɗeɗika ɓwaɓwatə na. Əja, mər sənda ko i, a da sənda yo i wa.”

37 Cha shili həya nda nda kwa njihanyi, ngə cha nar nyi nə Bitrus, “Shiman, jan ko njihanyi! A da ko nau ngya lili'u mada nə saka zhang wa ya? 38 Ngya ma na ɓəla, hya pətlənya, hya da ba'a gwa ku sərmbukəu. Ɗufəu kwa i, kəl ja, dzə təutə ti.”

39 Ngə Yesu tə ɓəla ngya nda ga təra ki pətlənya wi nda cha mər tangərma nda. 40 Cha shili dzən nda səkəu, ga həya nda nda kwa njihanyi, aka a da nda kwa nau ngya lili'u wa, ya a da nda zəndə sənda nda kwa nar nyi wa.

41 Cha ɓəla ki pətlənya ga shili həya nda səkəu makərkunya bəji, cha nar nda, “Tsə'u ta hi kwa njihanyi hyo ɓəlsar ya? A njitə ənga! Bəji ɗati, jan nja tləɗanda tə Zər Ndəu anə njir mər səpəla'a. 42 Hya'atə ma mən təra. Jan ndər tləɗa ɗa kwa shili!”

43 Tsə'u tanyi Yesu kwa ɓwanya, kəl Yahuda Iskərayoti, zhang ku huɗa shawa kwabəmətlə inda tə shili ka dlama nji ana katsakər ka zəwa i ku cha nda. Wawa'ar fərist ka maləm gadlagadla Musa ka njirawawa'a ingə tə sə nda. 44 Yahuda ndər tləɗa wurtə nar nda, “Ndə nda ya usar na gaɓə ngə ndə nda hyo gwa'a. Hya səya nyi, nja təra nacha njo ɓəla nyi.” 45 Tərkus nda shili, ngə Yahuda təra biyama ga na, “Usi Maləm!” Ngə cha gaɓətə nyi.

46 Ngə alenya nji'inda səya Yesu. 47 Ngə zhang ku huɗa nji'inda ka Yesu inda tə tsəbiya katsakər nyi, cha gəga mava gau fərist ga katsənda himya cha.

48 Ngə Yesu tə jau nda, “Ndər fa'avi ngə ya ɗa kari nə hya shili na katsakər ka zəwa ka hya səya ɗa ya? 49 Mya katə hi tsa səya ɗa aku Mbwa'alə Hyella? Hi nda taɗa ku pama hi yo dlədləɓə nə nji kala bəji. Kəl ja, dəhə sə'ingə kwa ɗa ka nja nyabiya sənda likatəkatə tə na təkəra ya.”

50 Ngə dəhə shawa nyi inda ngya nyi ga hwi tanda. 51 Vanya tlakala da kwa nəu Yesu hi kəl ləkutə lilin tanyi dzə nyi, ngə nji'inda gwa'a nda səya nyi, 52 kəl ja, ngə cha səɗəbiya kərnyi ku ləkutə nda ga hwi tanyi dura'a.

53 Nda təra na Yesu yo ki gau fərist, hi nda dəhə wawa'ar fərist, gau i ka maləm gadlagadla Musa tə daɓa. 54 Bitrus tsəu kwa nəu hin nda naɗəu, tsa'a ku ki gau fərist nda. Cha ngya kə'i ləvaləva nda kwa tlər hu'u.

55 Wawa'ar fərist ana dəhə nji'inda ku patla njirawawa'a Yahuda, tə gwa'a sənda nda kwa uya Yesu na bikə təkəri, ka nda tsəya nyi, kəl ja, a da nda uya mada zhang wa. 56 Ɗang tanyi nji'inda pə ɓwanya gəzhi təkəra cha, kəl ja, anya nda da shili zhang wa. 57 Alenya nji tə hya'ati ga pə ɓwanya gəzhi nənnə təkəra cha, bəra; 58 “A ngatə nyi tə ea cha na, ‘Yo huɓənda Mbwa'alə Hyel nə nja həriya na chi na, ba'a həriya vanyi nda pa'a nja hər na chi ku hanyi makərəu.’ ” 59 Ba'aka sakana, anya nda da shili zhang wa.

60 Ngə gau fərist tə hya'atə biyamar madawa ga jau Yesu, “A ɓwanya da ko wum nə ma? Mi ko na ana sə'inə njo pə təkəra kə ina?” 61 Kəl ja, da'atanyi. Ngə gau fərist nda ɓəla jau nyi, “Nakə ngə Kəristi Zər Hyel Ndə Papa'a ya?” 62 Ngə Yesu tə na, “Naya na, ya hyo la'a zər ndə tə ngya tə chisəma Hyel ndə nda na gyalkur dəhəu, ana ənda cho səya ku ləmbəkəu kya huɗamələm.”

63 Ngə gau fərist nda tau ləkutə nyi ka cha char huɗətla nyi, ga na, “Mi ɓwanya nda məno gwa'a səka? 64 A ngatə tə mən ɓwanya həyatə Hyel nda cha pəa. Mi sə nda hya na?”

Ngə dəhə nda na, “Ndər bikə cha, kwa kina cha tah!”

65 Ngə alenya nji tə ghəya təfəndzə nyi tuli, ga mbiya lya cha, ga dəgənyi. Nda kwa na nənyi, “Pə ɓwanya mətakər, ka par ea ndə nda dəgə ngha.” Ngə njir ɓəla inda dəgə nyi ga təra nacha.

66 Aku bəji nda, Bitrus ku ta ki gau fərist nda, ngə zhang ku huɗa kwatəra inda kwa mər tlər nə gau fərist nda shili, 67 nda cha la'a Bitrus kwa tlər hu'u, ngə cha ndzamtə nyi ga na, “Nakə ma'a nahi ka Yesu ndər Nazarat ka.”

68 Kəl ngə Bitrus tə kəpal ga na, “A da yo zəndə səngə ko ɓwanya təkər ngə wa,” nda cha na ənga, cha təra yo nyaki. Təma vəgəm tə tiwi.

69 Nda kwatəra nda la'a nyi ta'i hinda ngə cha ghəya na nə nji'inda tə ta'i tangnda, “Kəpal da wa, zhang kənda nə ndə na!” 70 Kəl ja, Bitrus tə kəpal səkəu.

Səkardzə kushəu, nji'inda tə ta'i nda nar nyi nə Bitrus, “Təkəɗəu, zhang kənda ka, aka ndər Galili ka.”

71 Bitrus tə səmnda fəla ga na, “Macha gəzhi ya, ya ɗa ka ndə shu'ushu'ua, a da yo zəndə ndə ngə hyo ɓwanya təkər ngə wa!” 72 Təma vəgəm tə tiwi mətləkunyi.

Ngə Bitrus tə ɗənghatə na ɓwanya Yesu nda; “Vu'i na, təvi mətləkunya tiwir vəgəm, ko kəpal zəndə ɗa zhaka makərəu.” Ngə cha tiwi gagaɗa.