Dlədləɓa təkəra Sər Jival
15
Kəl ngə alenya njir Farisi ana ka maləm gadlagadla tə hya'atə vu Urshalima, ga shili jau Yesu, 2 “Mya gwa'atə shawa nghə kwa ɓəlnda sənda jival kəmən tə dlədləɓətə məna? Jan a da nda kwa chinda chi təvi nda səm sə wa!” 3 Ngə Yesu tə ɓəlakə nda, “Mya gwa'atə hya kwa ɓəlnda gadlagadla Hyel, anyar dlədləɓə kəhya? 4 Aka Hyel tə na, ‘Ka hətə nyi səli nə ada ngha ana ama ngha, dəhə ndə nda ngəliya ada nyi ndara ama nyi, tuku nja tsəya nyi.’ 5 Kəl ja, nahi, hyo na tsa'atsa'a tanyi ma ndə tə nar nyi nə njir yah nyi, ‘A da ya kwa nau vala hi wa. Aka a wurtə ya mbatə ndəra ənda yo nənyi dəhə sənda hyo kina uya tsa ya nə Hyel.’ 6 Mada a da cha zhaka hətə nyi səli nə njir ya nyi wa. Aka sər jival kəhi hya fiya ɓwanya Hyel ka sə ɓwa'atanyi. 7 Nahi nji dəmən, tsa'atsa'a tanyi Ishaya ndər mətakər tə tsəfətə təkəra hi ənda Hyel tə na,8 ‘Nji'ina atə chimər nya nda tanyi nə nda kwa fal ɗa,
kəl ja, ɗufwa nda naɗə tsa ya.
9 Ɓwa'atanyi nə
nda kwa həsəli na'a,
aka tsaubar nji ngə nda kwa dlədləɓə
nə nji bəra ɓwanya Hyel!’ ”
Sənda kwa Mərtə Ndə Hiɗahiɗa
10 Kəl ngə Yesu tə nga dlama nji ga nar nda, “Səya ma himi hya ngabiya! 11 A da sənda tə gwa təwa nya ndə ngə kwa mərtə nyi hiɗahiɗa mar Hyel wa, kəl nda sənda kwa biya ku nya cha.”
12 Kəl ngə shawa inda tə shili da cha ga na, “A zəndətə kə ənda huɗa njir Farisi ingə tlatə tsa ɓwanya nga?”
13 Ngə Yesu tə wum ga na, “Dəhə wu nda a da Ada ɗa nda kya huɗamələm ngə tə chiya wa njo təsənda. 14 Ngwa hya ɗəngha na nda wa! Njir wuləfə ingə kwa təɗə kuvanda njir wuləfəu. Ma ndər wuləfə tə təɗə kuvanyi, tsa'a kya'a nda kwa pəpə gu ka'u.”
15 Kəl ngə Bitrus tə na, “Dəkəbiya ea sənda ba'ada ngə təkəri.”
16 Ngə Yesu tə jau nda, “Ma'a nahi ba'aka sakana a da hya ngabiya wa? 17 A da hya ngabiya ma? Dəhə sənda tə gwa təwa nya ndəu, kwa səya ku ta cha, ya cho təbiya. 18 Kəl ja, sə'inda ndə kwa pəa hya'ati ku ɗufwa cha ndani, sə wi ingə ngə kwa mərtə ndə hiɗahiɗa. 19 Aka ku ɗufwa ndə ngə jigadəma ɗimi kwa hya'ati, wi ka tsa ndəu, kasalikur, shi'ushi'ukur, həl, tla gəzhi, ana pə ɓwanya ɗimi təkəra alenya nji. 20 Sə ingə ngə kwa mərtə ndə hiɗahiɗa. Kəl ja, səm sərsum na chi kəla chi da kwa mərtə ndə hiɗahiɗa wa.”
Jirikur Vanya Mala Kan'ana
21 Ngə Yesu tə ngyar mbwa nda ga təra yatə hə'i Taya ana Sidon. 22 Kəl janə vanya mala Kan'ana nda na ngya tangnda tə shili da cha, cha har kuraka cha, ga na, “Tlakəu, Zər Dauda ngatə təhuɗə ɗa! Kwa ɗa da na məlləm ku kəra cha, kwa nənyi ɓwaɓwatə gagaɗa.”
23 Kəl ja, Yesu da shau nyi wa. Ngə shawa nyi tə shili da cha ga gədi nyi, “Gədlənda nyi! Aka cho wendə mən na kurakəu!”
24 Kəl ngə Yesu tə wum ga na, “Nja sə ɗa kəl ka kətəng sasa nə njir Isra'ila.”
25 Ngə mala nda tə shili dzən nda ga uzhi huɗə nyi, ga na, “Tlakəu vala ɗa.”
26 Ngə Yesu tə na, “A da tsa'atsa'a nja hətə sərsum ngulisha'a nja sətə nyi nə həya wa.”
27 Ngə mala nda ɓəlakə nyi, “Jiri ngə Tlakəu, kəl ja, həya kwa səm sərsum nda kwa pəpə ku nya tlakən nda.”
28 Kəl ngə Yesu tə wum ga nar nyi, “Malakəu, jirikur nghə 'ualəu! Sənda ko i cha ɗa nənghə ənga.” Aku ndana bəji kwar mala nda tə mbəa.
Yesu tə Mbandə Nji Ɗanghəu
29 Yesu tə ngyar mbwa nda, cha nəu nya Fa'a Galili. Ngə cha gi ngyata nyi tə dəgəl. 30 Dlama nji ɗang gagaɗa tə shili na njir gadal, njir wuləfəu, nji'inda hya nda sanyadza, nji kəla nau ndəra ana alenya njir shiləkə ɗanghəu. Nda shili na nda mar Yesu, ngə cha mbandə nda. 31 Dlama nji tə mər məngəl ənda nda la'a nji'inda pa'a kwa nau ndəra kwa ndəra, nji'inda hya nda sanyadza, tə uya mbəa, njir gadal kwa ma'i, njir wuləfə tsəu kwa la'a səu, nda kwa fal Hyel njir Isra'ila.
Yesu tə Nyandə Nji Dəbu Fwaɗəu
32 Yesu tə nga shawa nyi shili da cha ga na, “Yo ngatə təhuɗə nji'ina aka hanyi makər nə ea kə'i nda tangna, janə a da nda uya madami ga səm wa. Ya a da yo i ya wiɗənda nda na huɓə wa, tsa nda da dla ku laku.”
33 Shawa nyi inda tə wuma, “Ama məno uya sərsum nda kwa nji dlama nji'ina, ya a nji da na ngya tangnə wa?”
34 Ngə Yesu tə jau nda, “Takwara yiɗawa ngə tsa hya?”
Ngə nda ɓəlakə nyi, “Məɗəfa ana nguli kalfi yiɗau.”
35 Ngə cha nar nyi nə dlama nji'inda nda uya vir ngya hu'i. 36 Ngə cha hətə takwara məɗəfə inda ana kalfi inda, ga mərtə nyi usaku nə Hyel, ga pəpasəu ga nənyi nə shawa nyi inda, ngə nda tətəkəya nda. 37 Dəhə nda tə səma ga nyi. Ngə shawa inda tə tsəmtə sənda həyadza, tsəla məɗəfa. 38 Ba nji'inda tangnda shili dəbu fwaɗəu, a da nja jiga mahi'i ka ngulisha'a wa. 39 Kəl ngə Yesu tə wiɗənda dlama nji, ngə cha gwa ku param ga təra yatə hə'i Magadan.