Nya nacha ngə sənda məno mər tlər nə ka ndər ku pama kərnəmən ana alenya nji aku ngya kəmən. Aka ənga, Nya kwa chabiya səu ana kwa shili na tsaka. Nya aji kwa gwa'atə ndə kwa ɗari wi ku ki cha ana kwa char təkəɗəkura ndəu, ana mbwa nda cha hya'atə ti. Nya kwa ma'i tsa'a na sər jival sər aji nə nji'inda kwa pə nya nda. Nacha ngə sər mbəɗə jigadəma nji. Nya aji, Hyel ngə tə nə mən ga'a. Ghəyarsəu səlirma 11 tə char ənda nji ɗakaɗa, nya zhang nda kwa ɓwanya ni, ngə Hyel ku gyalkur nyi, cha səya ki huɗamələm ga səya nə nda Nya pampaməu ga wiɗənda nda tə dunəya dəhəu.

Tləm Həba nga, nacha ngə, “Piyarɗufəu” ya Ndər Həba ndər piyarɗufəu nga. Ma ndə kwa pə Nya Həba, na nda cha kwa na “A mən ngya piyarɗufəu.”

Həba (nda alenya nji kwa nga nda Kilba) njo uya nda na ngya ku Zər Mətla Hə'i Hong aku Dəgalər Mətla Adamawa təwa Vwa, Ku pama Vwa ana Zədər Pəchi nə Nigeria. “Joshua Project” tə tsəftə ənda ɗangkura Həba kwa ɗa 314,000, 82 ku gharəu (82%) nə Həba Kərista nda. Tsəfə da ɗang təkəra nda ana sər jival kənda ku alenya nya wi ka nya vwa, kəl ja, a vanya tsəfə mənakə da ku Nya Həba wa.

Tlər sha Taɗər Alkawal na tə ghəya ku fa 2006, ahir alenyi nda nja ɗaka ghəya yahi, ya a da nja nda biyama nə wa. Mangə kwa ɓwanya nji na Nya Həba ku dəhə hə'i Həba, ya tuku ngə kəl nja ghəya ɓwanya na nya təvi nja fəu ku tsəfa. Ənda Həba kwa pə nya kənda tə ɗa pampam kwah, Garaha, Gaya, Hong, Kwapər, Məgwahi ana Yadəl. Təvi nja ghəya sha Likatəkatə na kəl nda nja nga tsəmdzə nə dəhə nya pampam inga, ngə nja ɓubiya ɓəli ga tabiya nya Hong aka nacha ngə kusəu. Sha likatəkatə na tə ɗa təwa nji nda nja dlədləɓətə nda mənakə ənda njo sha Nya a yo vanya Nya. Dəhə dlədləɓətə hya'atə təwa njir “Nigeria Bible Translation Trust” (NBTT) Jos, nda kwa daɓəkər ka njir “Seed Company, Wycliffe Bible Translators” ana Həba nda hyanjir nya. Dəhə tlər na tə kiɗa dzuku ingə nja jiga da gi nga. Aka ənga Həba uyatə lakur uya ɓwanya Hyel ku Nya kənda. Usaku ana fal ngyatə nə Hyel!

Likatəkatə ɓwanya Hyel nə nya vwa ana nə alenya Nya wi ka Hausa nja ɗəm ngwahya'a kwa, kəl ja, nda gəla məməlandə na Likatəkatə Taɗər Alkawal nə nya njir Heleni (Greek) ga nja la'a a ɗatə təkəɗəu wi nda tə cha ku Nya njir Heleni nda. Njir sha ɓwanya mbabiya tə dza, ka nda biyandə dəhə ɓwanya wi nda tə cha a nə Həba, ya aka ga Həba ngabiya.

Aku mbadzə ka Taɗər Alkawal ɗa tə babal, alenya vala da nda tə gwa kwa wi ka ɓwanya inda tə pabiyadza, nda njo nga (cross references) aka ga nja zəndəbiya mbwa nda chul ɓwanya inda ti. Tsəfə inda da kiɗi (footnotes), ga cha chabiya alenya sənda a da tə babal wa. Chati (Map), ka cha char mbwa ana mələm inda Likatəkatə tə ɓwanya təkəri. Dəkəti (glossaries), a biyahir likatəkatə na ka cha dəkəbiya ɓwanya inda dza'u. Dəhə ba'ada ana səlirma nda ku Taɗər Alkawal na kəl nda nja uya laku tsa hyanjinyi, təvi nja mər tlər ni. Tlər Changhabal 2:11 “ … dəhə məno ngatə nda kwa ɓwanya, ana nya kəmən a təkəra sər məngəl nda Hyel tə məra!”

Nəna tlər sha likatəkatə nja mər ka nja mər tlər ni ku vi həsəli, ngwahi likatəkatə ku daɓədza ku pama njir nəuwa ana nji nda pa'a njir nəuwa.