“Vanya ndə tə biyar gwa tləka. 4 Nda cho huɗa uchə chuli, ngə alenyi tə pəpə ku laku, ngə eakə tə shili tsakuti. 5 Alenya chuli tə pəpə səya tə hya fafa mbwa nda a hə'i da dur wa. Ɗəɗəu tanyi nda tsa aka a hə'i da dur tangnda wa. 6 Nda pəchi tə dədatə nda, ngə nda titi'ua ga 'ula, aka a nanda chiya ngilang wa. 7 Alenyi tsəu tə pəpə gu lya shikəɗi, ngə shikəɗi tə hə ga tsakə nda chi. 8 Alenyi chuli inda tsəu tə səya tə hə'i mənakəu, nda tsa ga həa, ga pəu li alenyi makərkumənyi, alenyi kwakumənyi alenyi ma'a gharəu gharəu. 9 Ndə nda na himi, cha ngati.”

10 Ngə Shawa nyi tə shili da cha ga jawa, “Mya gwa'atə ko ɓwanya nə nji na ba'ada?”

11 Ngə cha wuma, “Nahi, a ngya hi tə nji hya zəndəbiya dəhə sə'inda tə ɗəwa ku təlkur huɗamələm, kəl ja, nanda kəl ana ba'ada. 12 Ndə nda na ngabiya, njo tsakətə nyi ga cha uya 'ualəu, ndə nda pa'a da na ngabiya tsəu, njo dləuya mada kushə nda cha ni. 13 Nacha gwa'atə ya kwa ɓwanya nənda na ba'ada, aka mada nanda ndzama, a səda nda kwa la'a wa, mada nanda səya himi, a da nda kwa ngatə ndara nda ngabiya wa. 14 Sənda Ishaya tə na təkəra nda nyabiya tə dzəa, bəra,

16 “Kəl ja, njir papa'akur hi, aka hya la'a sə'inə na lya hi ga ngatə na hima hi. 17 Jiri yo nar hi, ɗang njir mətakər ka njir mər sə tsa'atsa'a inda tə chim ka nda la'a sə'inə hyo la'a na, ya a da nda la'a wa, ana sə'inə hyo ngatə na, ya a da nda ngatə wa.

18 “Jan sənda ba'adar ndər tləka ngə təkəri. 19 Chuli inda pəpə ku laku nda, nanda ingə nji'inda tə ngatə mafakə təkəra təlkur huɗamələm, ya a da nda ngabiya wa, kəl sərtakə tə shili ga həbiya ɓwanya nda ku ɗufwa nda. 20 Chuli inda səya tə hya fafa nda, nanda ingə nji'inda ngatə mafakə nga, ga dləutsə ɗəɗəu na hirgyaɗi. 21 Kəl ja, manda a mafakə nda da chiya dzə ku ɗufwa nda wa, a da nda hətə bəji wa, nda nda gu ɓwaɓwatə ana məndza'u anyar ɓwanya Hyel, ɗəɗəu tanyi nda dla. 22 Chuli inda pəpə gu shikəɗi nda, na nda ingə nji'inda ngatə ɓwanya Hyel, kəl ngə ɗəngha təkəra sər ngyar dunəya ana mwaɓər gəna, tə tsakər chi təkəra mafakə nda, ga katə nyi tsa mər sakəda. 23 Chuli inda səya tə hə'i mənakə nda tsəu, nanda ingə nji'inda ngatə ɓwanya Hyel ga ngabiya ga mər sakəda, alenyi makərkumənyi, alenyi kwakumənyi alenyi ma'a gharəu gharəu.”

24 Yesu tə par nda vanya ba'ada səkəu, ga na, “Təlkur huɗamələm kwa pabiya da ndər zwa nda tləkanda chuli durdur ku fa nyi. 25 Kəl ja, sakanda madawa gwatə piya, kəl ngə ndər dawa nyi tə shili uchiu hihili ku fa alkama nda, ga tərata nyi. 26 Nda alkama tə həa ga ghəya hə kər, ngə hihili inda tə chabiyadza. 27 Ngə mavi'i tlakər fa nda yi həya nyi ga na, ‘Tlaka, a da chuli alkama nda ka tləka ku fa nghə ma? Ama hihili tə nda gwa kwa?’ 28 Ngə cha na, ‘Ndər dawa ɗa nga mər sənga.’ Mavi'i inda jawa, ‘Kwa i kəea gwa tətəsbiya hihili inda ya?’

29 “Ngə cha wuma, ‘A'a! Hya da ba'a təsənda alkama tə vir təsə hihili. 30 Ngya nda ma nda hə dəhə nda tsa'a tə bəjir mər alkama, aku bəji nda ngə ja, yo nar nyi nə njir mər tləra, nda ghəya tsəmbiya hihili tangərma nda mbabiya dəmadəma, nda nginda, kəl nda alkama ja, nja tsəkəu gu val.’ ”

31 Ngə Yesu tə tsakətə mər vanya ba'ada ga na, “Təlkur huɗamələm kwa pabiya da məlar mustad nda ndə tə tləkəya ku fa nyi. 32 Nacha ngə kushəu ku huɗa dəhə sə məlaməla, kəl ja, ma cha tsa cho ɗa dəgal matsa dəhə sə'inda ku fa nda. Cho ɗa ka wu dəgaləu, ma'a eakə kwa la ki kənda tə cha wu nda.”

33 Yesu tə ɓəla dəkar nda vanya ba'ada ga na, “Təlkur huɗamələm kwa pabiya da tləlam, nda vanya malakə tə zəkutə upə 'ual ni, ngə upə nda bua ga ɗa 'ualəu.”

34 Yesu tə pə dəhə sə'ingə nə dlama nji ana ba'ada, a da cha dəkə madami nənda wa, kəl nda ana ba'ada. 35 Cha mər ənga, ka ga cha nyabiya sənda Ishaya ndər mətakər tə na,

36 Ngə Yesu tə ngyar dlama nji'inda ga gu ki, ngə shawa nyi tə shili da cha ga na, “Dəkar ea sənda ba'adar hihili ku fa ngə təkəri.”

37 Ngə Yesu tə wum ga na, “Ndə nda tləka nda chuli durdur nda, na cha ngə Zər Ndəu, 38 fa nda na cha ngə dunəya, chuli durdur nda, na cha ngə nguli təlkur. Hihili nga na cha ngə nguli ndə pəla'a, 39 ndər dawa ngə tə tləkau hihili ku alkama nda na cha ngə sərtakəu. Bəjir mər alkama na cha ngə bəjir hya'atər dunəya, ana njir mər fa nda tsəu, na nda ingə Chama Hyel. 40 Tang wi ngə tə nja tsəmtə hihili ga nginda nda, əngə tanyi cho ɗa atə bəjir hya'atər dunəya. 41 Zər ndə kwa sətə chama nyi i nda kwa tsəmbiya dəhə nji'inda kwa gwa'atə njo mər səpəla'a ana dəhə njir mər səɗimi ku təlkur nyi. 42 Nda kwa vakəu nda ku hu'u nda ba'anawa, aku nda nda kwa tiwi nda kwa ɗəhir. 43 Aku bəji nga, nji'inda tsa'atsa'a ka Hyel kwa mbəl tang wi pəchi ku təlkur Adan nda. Ndə nda na himi ngati, cha ngati!

44 “Təlkur huɗamələm kwa pabiya da gəna nda tə ɗəwa ku fa. Ngə vanya ndə tə ghahə ni, ngə cha ɓəla ɗəwanda səkəu. Ana hirgyaɗi cha ki ɗəlnda dəhə sənda tsa cha, ga shili ɗəlbiya fa nda ni.

45 “Ətsəu, təlkur huɗamələm kwa pabiya da ndər shafəli nda kwa gwa'a hangu mbəlmbəl inda njo ɗəl na kwaba 'ualəu. 46 Nda cha uya zhang nda na səli gagaɗa, ngə cha təra ga ki ɗəlnda dəhə sənda tsa cha ga shili ɗəlbiya ni.

47 “Ətsəu təlkur huɗamələm kwa pabiya da bangama nda nja sətə gwatə fa'a, nga sətsə kalfi pampaməu. 48 Nda bangama tə nyi, ngə njir timi tə təɗəbiya biya nya bam. Ngə nda ngya ga daɗəbiya durdur nyi ga pəu ku tsəla, kəl ja, pəlapəla'a nyi nda pənda. 49 Əngə tanyi cho ɗa atə bəjir hya'atər dunəya. Chama Hyel kwa səya təkəbiya nji pəla'a ana nji'inda tsa'atsa'a na Hyel. 50 Njo vakəu nji pəla'a ku hu'u gəɗəgəɗa, aku nda nda kwa tiwi nda kwa ɗə hira nda.” 51 Yesu tə jau nda, “Ngabiya tə hi sə ingə ja?”

Ngə nda wuma ga na, “A.” 52 Ngə cha nar nda, “Kala maləm gadlagadla nda tə ɗa ka shawa təlkur huɗamələm, wi tlakər ki cha, nda tə tatsə taɗər gəna ana halhalənyi ku məɗəwa nyi.”

53 Nda Yesu tə wur na dəkə ba'ada inga, ngə cha ngyar mbwa nda. 54 Ngə cha ɓəl tanyi yo mələm nyi ga yi dlədləɓə nə nji ku vi pətlənya nə njir Yahuda. Nji'inda ngatə nyi tə mər məngəl, nda kwa na, “Ama uya cha ngəna dəma ana gyalkur mər səshinshin inga? 55 A zər ndər fiɗə wu nda nə ma? A zər Maryamu nə ma, ka zamə nyi tsəu ya, a nanda ngə ka Yakubu, Yusufu, Shiman ba'a Yahuda wa ya? 56 A namən ka kwamə nyi ngə tangnə ma? Ya ama ngə cha nda uya chul sə'ina?” 57 Aka ənga huɗa nda tla nacha gagaɗa, ngə nda ngyar nənyi jiri.

Ngə cha nar nda, “Madawa kwa la'a səlir ndər mətakər, kəl nda ku mələm nyi ana ku huɗa njikə nda ngə pa'a nja kwa la'a səli nyi.” 58 A da cha mər səshinshin ɗang tangnda wa, aka tar jiri kənda.