2 REYES
Resumen: Ã yoa Davi macʉno, Salomõ Cohamacʉ ya wʉhʉre to tuhsʉ dapori baharo, payʉ cʉhmari baharo, Yawere yʉhdʉrʉca payʉriro wahaha. Cʉ̃ nʉmʉ tiro Salomõ cjiro yariaa wahaa tiha. To yariari baharo, to macʉno Roboã wama tiriro sehe tirore pʉhtoro ji, cohtotaa tiha tjoa. Tiro Roboã israe masa curua, jipihtiri curuare pʉhtoro ji mʉhtaboriro jimaha. Wiho mejeta Cohamacʉ sehe, Roboã pʉcʉro Salomõ cjiro to tirore yʉhdʉrʉca payʉri buhiri, payʉ israe masa to macʉno to pʉhtoro jichʉ cahmaerachʉ yoaha. Tuhsʉ, tí mehne ti basi tuaro cahma sayochʉ yoa, israe masa curuare cʉ̃ curuata ti jimanore pʉa curua tju warʉcʉ sʉchʉ yoaha. Tuhsʉ, ti jiri yahpa cʉ̃hʉre pʉa yahpa tju warʉcʉ sʉchʉ yoaha. Judá wama tiri yahpa, ã jichʉ Israe wama tiri yahpa tju warʉcʉ sʉchʉ yoaha. Judá wama tiri yahpa sehere Judá curua macaina, Benjamí curua macaina jia tiha. Israe wama tiri yahpa sehere israe masa dʉhsaa curuari, diez curuari macaina tju warʉcʉ sʉ, jia tiha.
à yoa Cohamacʉ sehe to ã tju warʉcʉ sʉchʉ yoahto panopʉ Davi cjirore õ sehe ni yahu cũ tuhsʉa tiha: “Mʉhʉre ji, cohtota turiaina mʉ pohna, mʉ panamana sahsero yʉ ya curua israe masa ti pʉhtoa ji, cohtota turia wahcãahca. Pʉhtoa ti ji, cohtota turia wahcãa tia sehe ne pihtisi” ni, yahu cũ tuhsʉa tiha. à jia Cohamacʉ to ya curuare pʉa curuapʉ to tju warʉcʉ sʉchʉ yoari baharo, Judá wama tiri yahpa macaina sehe ti ñʉchʉno Davi cjirore ji, cohtota turiainare cʉ̃iro bese, ti pʉhtoro cjihto cjʉa turia wahcãa tiha, Cohamacʉ to yahu cũriro cjiro seheta.
Wiho mejeta Israe wama tiri yahpai tju warʉcʉ sʉ, jiina sehe Davi cjirore ji turiainare ti pʉhtoro cjihto cahmaera tiha jʉna. Ã jia tina cʉ̃hʉ ti mʉ sʉro Nabate macʉno Jeroboã wama tiriro sehere bese, pʉhtoro sõa tiha tina cʉ̃hʉ. Ã yoa tiro Jeroboã sehe to masa curuare dói waro Yawere ño payo duhuchʉ yoaa tiha. Ã ño payo duhuchʉ yoaro, pʉa masʉ, wachʉa masʉri dahre duti, tí masʉri sehere sʉho ño payo dʉcaa tiha tiro. Ã yoaro, to masare Yawe sehere tuaro waro yʉhdʉrʉcachʉ yoaa tiha.
à jia to yariari baharo cʉ̃hʉre, tiro cjiro masa sehe Yawere ã yʉhdʉrʉcarucuina jia tiha jʉna. Ti pʉhtoro cjiro to ñano sʉho ji mʉhtari cjirire duhu duaera tiha tina. Ti ñaa jia tiare ti duhu duaerachʉ ñʉno, Yawe sehe tirore dahra cohtaina to yare yahu mʉhtaina mehne tí buhiri tinare to buhiri dahrehtire yahu tuhsʉa timaha. Ti yahu mʉjapachʉta, tina sehe tinare tʉho duaera tiha. Ti ã tʉho duaerari buhiri, Yawe sehe Asiria yahpa macaina mehne tinare buhiri dahrea tiha jʉna.