3 Do jawʉx,

xan Espíritu Santo pijaxtat masoxtat taenx,

ángel nabʉꞌfol wʉt pajilax poxade.

Jaxotde taenx kaeow pawis,

tʉa-ek wʉt pejmachoefan,

pasoeyan.

Pejmachoefan siete matnaetje,

diez mat-etjebejpon.

Pobʉꞌta xabich pawʉlan lels.

Japawʉlan jʉm-aech babejjamechan Diosliajwa.

4 Japow pejyiaf xabich pasoeyax.

Xatafals,

asacolor sʉapich.

Japacolor pawʉl púrpura.

Pejyiaf xabich duws oro chapachaemaliajwa,

iaꞌ ommaenkpibej,

asewbej,

pawʉli perlas.

Japow chaxfol orocopa.

Xan japacopa taenx wʉt,

chiekal matabijtax japow xabich babijaxan ispoxan,

ídolos kawʉajanpoxanbej.

5 Japow pejmaktat kaewʉl lels.

Japawʉl jʉm-aechpox puexa jiw matabija-el.

Pe japawʉl ampox jʉmchiliajwa:

“Pinjiyax,

Babilonia paklowax,

japapaklowaxpijiw kofa Dios kawʉajanpoxan.

Amwʉtjel japi jiw kawʉajnafʉl ídolos.

Isfʉlbejpi kaes asaxan,

babijaxan.

Ja-aech wʉt,

puexa asapaklowaxanpijiw nakxataefʉl japoxan isaxan” —chiliajwa japawʉl,

japow pejmaktat lelspox.

6 Do jawʉt,

xan tajut chiekal matabijtax,

japow saxtas Dios pejjiw pejjal,

japi baespi,

Jesús pejwʉajan naewʉajan wʉt.

Japox taenx wʉt,

xan xabich nejchaxoelx.

7 Do jawʉt,

ángel najʉm-aech:

“¿Ma-aech xotkat xam xabich nejchaxoelam?

Xam amwʉt chiekal chanaekabʉanaxaelen asew jiw matabija-elpoxfʉk ampow pawisliajwa,

pejmachoefanliajwabej,

japon siete matnaetje,

diez mat-etjebejpon.

8 Pejmachoefan,

xam taenampon,

majt japon duk.

Pe amwʉtjel,

japon amxota-el.

Japon asamatkoi nakolsaxoen mʉthxot.

Japox mʉth xabich fʉniachdik.

Jiw matdukax tae-esal.

Jiw,

wʉllela-esalpi Cordero pejfʉtat,

kimatamatlaspon cruztat,

japi jiw pejme taen wʉti pejmachoefan,

xabich nejchaxoelaxaeli.

Pe nakiowa,

pejmachoefan asamatkoi,

Dios pejkastikamatkoi pat wʉt,

japon pejmachoefan kastikaxaesbej” —na-aech ángel.

9 Ángel pejme najʉm-aech:

“Jiw matabijapi,

japi jiw matabijaxael xan jʉmchiyaxaelenpox.

Pejmachoefan,

siete matnaetjepon,

japon pejmatnae japi jiw taen wʉt nejchaxoelaliajwa siete mʉaxanmatwʉajantat isaspox Babilonia paklowax.

Japon pejmachoefan pejmatnae,

siete matnaetjepox,

japi jiw taen wʉt nejchaxoelaliajwa siete reyes tatoꞌalpox japapaklowaxpijiw.

10 Cinco reyes,

Babilonia paklowaxpijiw tatoꞌalpi,

japilis kaenanʉla nakolafʉl.

Amwʉtjel asan reywich tatoꞌal japapaklowaxpijiw.

Japontat seis reyes.

Tatoꞌla-elfʉk sietepijin.

Asamatkoi,

japon sietepijin rey wʉt,

xabich piach tatoꞌlaxilon.

11 Pejmachoefan,

majt tatoꞌalpon,

japonliajwa amwʉtjel chiekal matabija-esal,

chiekal ajil wʉt,

o,

nakiowa wʉton.

Japonlap asamatkoi ochopijnaxael,

rey wʉton.

Siete reyesxot,

japon kaen majt rey nadofa.

Japon pejme rey wʉt,

japonlap Dios chiekal toesaxaeson” —na-aech ángel xanliajwa.

12 Do jawʉt,

pejme ángel najʉm-aech:

“Diez mat-etje taenampox,

jiw japox taen wʉt,

nejchaxoelaliajwa diez reyes tatoꞌlaxaelpoxliajwa.

Japi reyes tʉadui-elfʉk jiw tatoꞌlax.

Asamatkoi japi reyes kamta kaewʉtje jiw tatoꞌal wʉt,

asbʉan jʉmch tapaeyaxaes kaehora jiw tatoꞌlaliajwa.

Japi reyes tatoꞌal wʉt,

tatoꞌlaxaeli,

pejmachoefan sʉapich.

13 Diez reyes asamatkoi tatoꞌal wʉt,

japi kaenejchaxoelaxael.

Japi kaenanʉla tapaeyaxael pejmachoefan tatoꞌlaliajwa pejjiw.

14 Japi reyes nabeyaxael,

Cordero sʉapich.

Pe Cordero malechaxael,

puexa jiw tatoꞌlan xot,

japon puexa reyes tatoꞌlan xotbej.

Puexa jiw,

Dios makanochpi japon pejjiwaliajwa,

japi jiw,

Cordero sʉapich,

malechaxaeli pejmachoefan,

japon pejjiwbej” —na-aech ángel.

15 Ángel pejme najʉm-aech:

“Nawelan mox xam taenampi Babilonia paklowaxxot,

japi nawelan,

jʉmchiliajwa ampox:

‘Ampathatpijiw’ —chiliajwapox.

16 Japi,

diez reyes,

pejmachoefan sʉapich,

japi xabich nejweslaxael Babilonia paklowaxpijiw.

Samata,

japi Babilonia paklowaxpijiw ba wʉti,

japapaklowaxpijiw pejew xabich nosaxaeli.

Do jawʉx,

japapaklowax lausaxaelbejpi.

17 Diez reyes asamatkoi kaenejchaxoelaxael tapaeliajwapi japon pejmachoefan tatoꞌlaliajwa puexa ampathatpijiw.

Japox jachiyaxael,

me-ama Dios chajiakolaxtat jʉm-aech japoxliajwa.

18 Xam taenampow,

pawis,

tʉa-ekpow pejmachoefan,

pasoeyan,

japow taenam wʉt,

nejchaxoelaliajwam:

‘Ampow,

me-ama Babilonia paklowaxpijiw,

ja-aechow’ —chiliajwam,

nejchaxoelam wʉt.

Babilonia paklowaxpijiw tatoꞌal puexa ampathatpijiw,

reyes” —na-aech ángel xanliajwa.