Machiyaxaespox, laelpas wʉt ampathatat Dios nejchachaemlaliajwa xatisliajwa
13
Xamal,
Jesús pejwʉajan naexasitampim,
¡nakaewa nanejxasinkampox nabej nakofeꞌ!
2 Matabija-emilpi pat wʉti nejbaxot,
¡nabej mastaeꞌ japi jiw chiekal bʉꞌkʉlaliajwam!
Chajiakolaxtat asew jiw matabija-elpi bʉꞌkʉla wʉt,
ja-aech wʉt,
japi jiw bʉꞌkʉla Dios pej-ángeles.
3 ¡Jiw jebachantat jiaspiliajwa,
xamal nejchaxoelafʉlde!
Japiliajwa nejchaxoelam wʉt,
¡jʉm-amde:
“Xanbej,
me-ama najia jiw jebatat,
jiaspi sʉapich” —amde,
nejchaxoelam wʉt japiliajwa!
¡Nejchaxoeldebej nabijatpiliajwa asew jiw pijaxtat!
Japiliajwa nejchaxoelam wʉt,
¡jʉm-amde:
“Xanbej,
me-ama nabijatax,
japi jiw sʉapich” —amde,
nejchaxoelam wʉt!
4 Puexa jiw chiekal sitaeyaxael nakjiyax.
Samata,
poejiw pijowpi wʉlwekaxil asew wathoꞌ.
Wathoꞌ pamalpibej wʉlwekaxil asew poejiw.
Poejiw pijowpi,
japi asew wathoꞌ wʉlwek wʉt,
japi poejiw Dios kastikaxaes.
Wathoꞌ pamalpi wʉlwek wʉti asew poejiw,
ja-aech wʉt,
japi wathoꞌbej Dios kastikaxaes.
5 ¡Xabich plata nabej nejxasinkeꞌ!
Ma nejew wʉt,
¡do japoxankal xanejchachaemilde!
¡Ja-amde,
Dios chajia jʉm-aech xot:
“Xamal kofsaxinil tajjiwampox.
Xamal tamach waelaxinilbej” —aech xot Dios!
6 Samata,
Dios xanaboejas xot,
nakaewa najʉmchiyaxaes:
“Dios xatis nakkajachawaet.
Samata,
wajlewlaxil,
jiw asax isasia wʉt xatisliajwa” —nachiyaxaes nakaewaliajwa.
7 ¡Xamal chiekal nejchaxoelde majt xamal tatoꞌalpiliajwa!
¡Asewbej,
xamal naewʉajanpi Dios pejjamechan,
japiliajwa chiekal nejchaxoeldebej!
¡Chiekal nejchaxoeldebej japi jiwliajwa,
ma-aech japi jiw,
laelp wʉt ampathatat,
is wʉtbejpi pachaempoxan!
¡Xamallap-is,
me-ama japi,
ja-amsfʉlde!
¡Chiekal Dios xanaboejimbej!
8 Jesucristo pomatkoicha xabich pachaempon.
Asax nejchaxoela-elon.
9 ¡Xamal nabej naexasis,
asew jiw xamal naewʉajan wʉt asawʉajan,
Jesús pejwʉajana-el wʉt!
Kaes pejme pachaem Dios naexasisliajwam,
japon xamal kajachawaesaxael xot,
xamal nejxasink xoton.
Asew jiw xae-el nejmachnaxaeyaxan,
kaechafiach xoti.
Ja-aech wʉt,
japi pejxanaboejaxan nakiowa kaes chiekal mamnika-el Diosliajwa.
10 Moisés chajia lelpox naexasiti,
japi jiw nejchaxoel:
“Xatis naexasisaxaes Moisés chajia lelpox.
Samata,
choef xʉaꞌasaxaes templobaxot ofrenda isliajwas Diosliajwa” —aechi,
nejchaxoel wʉt.
Pe nakiowa,
japi jiw Dios beltaeyaxisal.
Pe naexasich wʉtlax Jesús tʉppox xatisliajwa,
jatis wʉt,
Dios nakbʉꞌweyaxael.
11 Puexa sacerdotespaklokolan Lugar Santísimo poxade chaxlech choefjal ofrenda isliajwa Diosliajwa,
jiw babijaxan ispoxanliajwa japi bʉꞌwʉajanjilaliajwa.
Pe choef,
xʉaꞌataspi,
xafolipi bowaliajwa tathoetlel jiw duilxot.
12 Jatisbej Jesucristo.
Paklowax tathoetlel kimatamatlas cruztat.
Japon tʉp wʉt cruztat moton puexa jiw babijaxan ispoxanliajwa,
japi jiw bʉꞌwʉajanjilaliajwa Diosliajwa.
13 Jesús kimatamatlas wʉt tʉpaliajwa paklowax tathoetlel,
japox xabich padalapox.
Asew jiw xatis nakjʉm-aech wʉt Jesús pejwʉajan naexasichpoxliajwa:
“Japawʉajan naexasisliajwa xabich padalapox” —nak-aech wʉti,
nakiowa xatis naexasisfʉlaxaes Jesús pejwʉajan.
14 Ampathatat ajil wajpaklowax pomatkoicha duilaliajwas.
Samata,
xatis wʉajnawesfʉlaxaes asamatkoi Dios pejpaklowaxxotse pomatkoicha duilaliajwas.
15 Jesucristo tʉp wʉt xatisliajwa,
Dios naktapaei kawʉajnaliajwas Dios.
Samata,
xatis pomatkoicha Dios jʉmchiyaxaes:
“Xam xabich pachaemam” —chiyaxaes.
Japox jʉmtis wʉt Diosliajwa,
me-ama ofrenda chaxduws wʉt,
ja-aechox.
Samata,
japox pomatkoicha Dios jʉmchiyaxaes.
16 ¡Nabej nejkioweꞌ isliajwam pachaempoxan!
¡Kajachawaeꞌebej kijila!
Japoxan isam wʉt,
Diosliajwa,
me-ama ofrenda chaxduwam wʉt,
jachiyaxaelpox.
Samata,
Dios nejchachaemlaxael japoxanliajwa.
17 ¡Xamal chiekal naexasisfʉlde,
paklochow tatoꞌal wʉt!
Japi paklochow kofa-el xamal tataeflafʉlpox.
Japi chiekal matabija.
Chiekal xamal tataeflafʉla-el wʉt,
ja-aech wʉt,
japi jiw pejbʉꞌwʉajnaxael Diosliajwa.
Samata,
¡chiekal duilaxaelam japi nejchachaemlaliajwa xamalliajwa!
¡Babijaxan nabej is paklochow nejxaejwasamatas xamalliajwa!
Babijaxan isam wʉt,
xamalliajwa pachaemaxil.
18 ¡Xamal Dios kawʉajanafʉlde xanalliajwa!
Xanal nejchaxoelx:
“Xan babijax is-enil Diosliajwa,
asew jiwliajwabej” —an,
nejchaxoelx wʉt.
Samata,
¡xamal Dios kawʉajande xanalliajwa pomatkoicha chiekal duilaliajwan!
19 ¡Dios kawʉajandebej xan Dios natapaeliajwa xamal poxaliajwan!
Xan nejxasinkax xamal kamtalejen pejme taeliajwan.
Ampox carta lelpon saludos xatoꞌapox
20 Dios nakkajachawaet chiekal duilaliajwas,
asew jiw sʉapich.
Dios mat-et wajpaklon Jesucristo pejme dukaliajwa,
tʉp wʉton cruztat.
Jawʉt tʉadut pajelwʉajan,
xatis Jesús pejwʉajan naexasich wʉt nakbʉꞌweliajwa babijaxan isaspoxanliajwa.
¡Japox pomatkoicha chiekal naexasisfʉlde!
Samata,
Jesús chiekal naktataefʉl.
Me-ama oveja tataeflan chiekal pejew oveja tataefʉl,
ja-aech Jesús,
xatis naktataefʉl wʉt amwʉtjel,
pomatkoichaliajwabej.
21 Samata,
Dios kawʉajnax chaxduiliajwa puexa xamal weweꞌppoxan,
isliajwam Dios nejxasinkpoxan.
Dios kawʉajnaxbej nakkajachawaesliajwa Jesucristo pijaxtat pachaemaliajwas wajmatpʉatanxot,
me-ama Dios nejxasink,
jachiliajwas.
Pomatkoicha jʉmchiyaxaes Jesucristoliajwa:
“¡Xam xabich pachaemam!”
—chiyaxaes japonliajwa.
22 Takoew,
xan lelxpox xabicha-ellejen xamal naewʉajnaliajwan.
Samata,
¡nabej naewes naewesliajwam ampajamechan!
23 Xan xatoꞌax ampawʉajan xamal chiekal matabijaliajwam.
Timoteo tapaeis nakolsliajwa jiw jebaxot.
Japon piach kijla-el wʉt,
xanxot paꞌan wʉt,
bʉflaeyaxaelen xamal poxade xamal taeliajwam japon.
24 ¡Nawesaludam xamal tatoꞌalpi!
¡Nawesaludambej puexa asew jiw,
japi Dios pejjiwpi,
naexasiti Jesús pejwʉajan!
Italia tʉajnʉpijiw xamalliajwa saludos xatoꞌa.
25 Xan pomatkoicha Dios kawʉajnax puexa xamal kajachawaesliajwapon.