Amxotpox jʉm-aechpox Jesús kaes pejme pachaempon, me-ama Moisés pachaem wʉt, jachi-elpon
3
Takoew,
xamal Dios pejjiwam,
makanot xoton japon pejjiwaliajwam.
Nejchaxoelam wʉt,
¡chiekal nejchaxoelde Jesucristoliajwa,
japon Dios toꞌakas ampathatasik xatis naknaewʉajnaliajwa Dios pejjamechan!
Jesús diachwʉajnakolax sacerdotekolan,
japon Dios nakwekawʉajnaliajwa Dios nakkajachawaesliajwa xatis.
2 Chajiakolaxtat Moisés chiekal tataefʉl puexa Dios pejjiw,
Dios japox toꞌas xoton japi israelitas tataeflaliajwapon.
Jesúsbej chiekal is Dios pijax bichax ampathatat.
3 Jesús kaes pejme pachaem.
Me-ama Moisés pachaempon,
jachi-el Jesús.
Jesús kaes pejme xabich sitaens,
jiw bʉꞌweyaxael xoton,
naexasiti japon pejwʉajan.
Bachan isanbej sitaens.
Me-ama japon ba ispox sitaens wʉt,
jachi-esal.
4 Xatis bachan taens,
jiw isbachan.
Pe Dios ampathatat puexa nejmach is.
5 Chajiakolaxtat Dios pajut toꞌa Moisés chiekal tataeflaliajwa puexa Dios pejjiw.
Samata,
Moisés chiekal naexasit,
Dios toꞌas wʉt.
Moisés jʉm-aechbej asamatkoi Dios jʉmchiyaxaelpoxan jiwliajwa.
6 Cristo,
Dios paxʉlan,
chiekal naktataeflafʉl,
Dios pejjiws xot.
Chiekal naexasich wʉt Cristo pejwʉajan,
nejchachaemlas wʉtbej Dios nakbʉꞌweyaxaelpoxliajwa,
jatis wʉt,
pomatkoicha Dios pejjiwaxaes.
Dios tapaeyaxaelpox pejjiw leliajwa japonxotse
7-8 Kaes pejme pachaem Jesucristo.
Me-ama Moisés,
ángelesbej,
jachi-el Jesucristo.
Samata,
¡Jesús chiekal naexasisfʉlde!
Dios pejjamechan chajia lelsxot jʉm-aech,
Espíritu Santo jʉm-aechpox:
“Amwʉtjel,
xamal jʉmtaenam wʉt Dios jʉm-aechpox,
¡nabej naexasisleꞌ Dios naexasisliajwam!
Me-ama asew nejwʉajnapijiwxot,
naexasis-eli Dios,
¡xamal nabej ja-aecheꞌ!
Chajiakolaxtat pajilaxtat japi duilafʉl wʉt,
japi nejwesla isfʉlaliajwa Dios tatoꞌlaspoxan.
Japi naexasisfʉla-el Dios.
Pe nakiowa,
japi toes-esal Dios.
9 Nejwʉajnapijiw naexasis-el,
Dios pajilaxtat wʉti.
Naexasis-elbejpi,
Dios toꞌas wʉt.
Cuarenta waechan Dios is koechaxan nejwʉajnapijiwliajwa.
Japoxan taen wʉt,
nakiowa naexasisfʉla-eli,
Dios tatoꞌlas wʉt.
10 Samata,
Dios palala nejwʉajnapijiwliajwa.
Dios jʉm-aech:
‘Japi naexasisfʉla-el,
xan tatoꞌlax wʉt.
Nejwesla isliajwa xan tatoꞌlaxpoxan’ —aech Dios nejwʉajnapijiwliajwa.
11 Samata,
Dios palala wʉt,
jʉm-aechon:
‘Japi pasaxil xan chaemtaxxotse damlathʉlaliajwa’ —aech Dios nejwʉajnapijiwliajwa” —aech japox Espíritu Santo.
12 Takoew,
¡najut chiekal natataefʉlde!
Nejchaxoelam wʉt Diosliajwa,
¡nabej nejchaxoeleꞌ:
“Xan kofsaxaelen Dios naexasitxpox,
Dios chiekal ajil xot” —nabej aecheꞌ,
nejchaxoelam wʉt!
Diachwʉajnakolax Diosjila-el.
Japon duk.
13 Xamal ampathatat laelpam wʉtfʉk,
¡pomatkoicha nakaewa nanaewʉajande Dios pejjamechan Dios kaes xanaboejaliajwam!
¡Ja-amde,
kaen xamalxot Satanás naekichachajbasamatas babijax isasamatapon!
¡Ja-amde kaen xamalxot naexasislasamata Dios,
asew jiw xamal naewʉajan wʉt!
14 Xatis chiekal naexasisaxaes Jesús pejwʉajan.
Me-ama akasestat chiekal naexasisfʉlas wʉt,
jachisfʉlaxaes.
Laelpas wʉt ampathatat,
kofaxisal naexasichpox Jesús pejwʉajan.
Jatis wʉt,
xatis duilaxaes Cristo tatoꞌalxotse.
15 Dios pejjamechan,
chajia lelspox,
jʉm-aech wʉt,
jʉm-aechox xamal naexasislasamatam:
“Amwʉtjel,
xamal naewetam wʉt Dios jʉm-aechpox,
¡nabej naexasisleꞌ chiekal naexasisliajwam!
Me-ama nejwʉajnapijiw pajilaxtat naexasis-el,
¡xamallax nabej ja-aecheꞌ!”
—aech Dios pejjamechan,
chajia lelspox.
16 Xamal chiekal matabijam,
Moisés bʉꞌfol wʉt,
israelitas nakola wʉt Egipto tʉajnʉxotdin.
Japibej Dios naexasis-el,
jʉmtaen wʉti,
Dios pajut chiekal jʉm-aech wʉt.
17 Xamal chiekal matabijambej,
israelitas babijaxan is wʉt Diosliajwa,
cuarenta waechan pajilaxtat wʉti,
Dios palala.
Samata,
japi tʉp pajilaxtat.
18 Japi naexasis-el wʉt Dios jʉmtispox,
japi leyaxil Dios chaemtxotse jiw damlathʉlaliajwa.
19 Xatis matabijas,
wajwʉajnapijiw le-el damlathʉlaxxotse,
naexasis-el xoti Dios jʉm-aechpox.