4
Xam toꞌax jiw naewʉajnaliajwam Dios pejjamechan japon pijaxtat,
Jesucristo pijaxtatbej.
Jesucristo pejme pask wʉt,
japon kaenanʉla ampathatpijiw tatoꞌlaxael.
Jʉmchiyaxaelbejpon kaenanʉla jiw chajia tʉpiliajwabej:
“Xam Dios kastikaxael,
nejbʉꞌwʉajan xot” —chiyaxaelon tʉpiliajwa.
O,
jʉmchiyaxaelbejpon:
“Xam Dios kastikaxil,
nejbʉꞌwʉajan ajil xot” —chiyaxael Jesucristo.
2 Samata,
¡asew jiw naewʉajande Jesús pejwʉajan!
Jiw naewet wʉt,
¡japi jiw naewʉajande!
Nejxasinka-el wʉtbejpi xam naewʉajnampox,
¡nakiowa naewʉajande!
¡Naewʉajande japi jiw kaenanʉla pajut chiekal nejchaxoelaliajwa:
“Ampawʉajan diachwʉajnakolax.
Samata,
xanbej naexasisaxaelen” —chiliajwapi,
pajut nejchaxoel wʉt!
Japi babijaxan is wʉt,
¡fiaꞌe!
¡Toꞌim naexasisliajwapi Dios pejjamechan!
Naewʉajnam wʉt,
¡nabej bʉxkofeꞌ!
¡Nakiowa naewʉajnafʉlde!
3 Asamatkoi jiw nejweslaxael naewesliajwa diachwʉajnakolaxwʉajan.
Japi wʉlwekaxael asew jiw naewʉajnaliajwas asawʉajan,
naewesasiawʉajan.
4 Nejweslaxaeli naewesliajwa diachwʉajnakolaxpox.
Japi naewesaxael puexa nejmachwʉajan,
asew naewʉajanpoxan,
jiw pajut faekwʉajan.
5 ¡Xamlax nabej tapaeꞌ japi jiw naekichachajbaliajwa!
¡Naexasisfʉlde diachwʉajnakolaxpox!
¡Japawʉajan asew jiwbej naewʉajnafʉlde!
Cristoliajwa nabijatam wʉt,
¡boejtaliasfʉlde!
¡Jiw naewʉajnafʉlde chimiawʉajan,
Jesús pejwʉajan,
japi Dios bʉꞌweliajwas!
¡Chiekal puexa isde Dios xam tatoꞌalpoxan!
6 Tajmatkoi moxlisox asew jiw xan naboesaliajwa,
naewʉajnafʉlax xot wajpaklon Jesús pejwʉajan.
7 Me-ama aton xabich najaet puexa pejpamamaxtat premio kanaliajwa,
xanbej ja-an.
Dios tanbistax wʉt,
puexa tajpamamaxtat chiekal nabistax.
Bichax toetx,
isxpox,
Dios natoꞌapox.
Xan jiw naewʉajnax diachwʉajnakolaxpox,
me-ama Dios natoꞌa.
8 Amwʉtjel Dios naxawʉajnawet corona xan nachaxdusliajwa.
Wajpaklon Jesucristo,
japon juez,
xabich pachaempon.
Japon asamatkoi xan najʉmchiyaxael:
“Xam chiekal nabistam xanliajwa” —chiyaxaelon.
Do jawʉt,
nachaxdusaxaelon corona.
Jawʉt xan kaenan japon nachaxdusaxil corona.
Puexa asew jiwbej kaenanʉla chaxduiyaxaes corona.
Japi jiw,
nejxasinkpi Cristo,
wʉajnawetibej japon pejme pasliajwapox.
Pablo wʉllalapox Timoteo
9 Timoteo,
xam kamta fʉlaesiam wʉt,
¡xabʉaꞌtlejno xan nataeliajwam!
10 Japon Demas,
xanxot chijia wʉt,
fʉlaechon Tesalónica paklowax poxade,
kaes nejxasink xoton ampathatpijaxan.
Crescente toꞌax japon naewʉajnaliajwa Jesús pejwʉajan Galacia tʉajnʉpijiw.
Tito toꞌaxbej japon Jesús pejwʉajan naewʉajnaliajwa Dalmacia tʉajnʉpijiw.
11 Lucas,
japon kaen,
naman xanxot.
Samata,
¡wʉlwekde Marcos!
Faenam wʉt,
¡japon bʉflaeman xanlel!
Japon xan nakajachawaesaxael Dios pijax bichax.
12 Tíquico toꞌax Éfeso paklowax poxade.
13 Xam fʉlaeman wʉt,
¡nawexalaemno tajax,
thuch naxoelxpox!
Japox Troas paklowaxxot waeltax,
Carpo pejbaxot.
¡Nawexalaemanbej tejew libros,
asa-ʉafbej,
xakoeyasi!
Japapel-ʉaf xabich xan naweweꞌp.
14 Alejandro,
anaeltat nejmach-isan,
japon babijaxan is xanliajwa.
Samata,
japon asamatkoi Dios kastikaxaes,
japoxan is xoton xanliajwa.
15 ¡Xam chiekal taem Alejandroliajwa!
Japon xabich nejwesla xatis naewʉajnaspox.
16 Roma paklowaxxotx wʉt,
tadaelmajiw natasala wʉt paklochow pejwʉajnalel,
xan jʉmnotx wʉt,
tajut chiekal jʉm-an:
“Diachwʉajnakolaxa-el japi xan natasalapox” —an xan japi paklochowliajwa.
Jawʉt asan aton chinax asalel jʉmchi-el xan nakajachawaesliajwa.
Puexa tajnachala asbʉan jʉmch tamach nawaelti.
Xan japiliajwa Dios kawʉajnax Dios kastikasamatas.
17 Tajnachala tamach nawaelt wʉt,
Dios nakajachawaet tadaelmajiw naboesa-elaliajwa.
Dios nakajachawaetbej mamnikaliajwan naewʉajnaliajwan chimiawʉajan,
Jesús pejwʉajan,
puexa jaxotpijiw,
judíos-elpi.
18 Dios nakajachawaesaxael,
asew babijaxan is wʉt xanliajwa.
Dios nabʉflaeyaxaelbej japon tatoꞌalxotse.
Samata,
xatis Diosliajwa pomatkoicha jʉmchiyaxaes:
“¡Xam xabich pachaemam!”
—chiyaxaes.
¡Jasox nej ja-aecheꞌ Diosliajwa!
Pablo saludos xatoꞌapox asew jiwliajwa
19 ¡Nawesaludam Aquila,
japon pijowbej,
Prisca!
¡Nawesaludambej Onesíforo pejjiw!
20 Erasto kaweta naman Corinto paklowaxxot.
Trófimo bʉꞌxaenk xot,
namanax toꞌax Mileto paklowaxxot.
21 ¡Kamtalejen fʉlaemno pasliajwam iama wʉajna!
Saludos xatoꞌapi xamliajwa ampilape,
Eubulo,
Pudente,
Lino,
Claudiabej,
puexa asew jiw,
Jesús pejwʉajan naexasitibej.
22 Xan Dios kawʉajnax Jesucristo xam chalaliajwa.
Xan Dios kawʉajnaxbej puexa xamal kajachawaesliajwapon.