Machiyaxaelpox Timoteo, duk wʉton Jesús pejwʉajan naexasitixot
5
Aton,
patiꞌin,
is wʉt pachaema-elpox,
japon fiatam wʉt,
¡nabej los!
Naewʉajnam wʉt ispoxliajwa,
¡chiekal naewʉajande!
Me-ama nej-ax jʉm-am wʉt,
¡ja-amde japon atonliajwa!
Wathoꞌ,
pansiachow,
naewʉajnam wʉtbej,
me-ama nakoew naewʉajnam wʉt,
¡ja-amde!
2 ¡Wathoꞌ,
pakdiachow,
sitaem!
Me-ama nej-en wʉt,
¡ja-amde!
¡Wathoꞌ,
pansiachow,
sitaembej!
Me-ama nakoewkola wʉt,
¡ja-amde!
¡Nabej bʉꞌnejchaxoeleꞌ asax isax,
japi wathoꞌ sʉapich!
Amxot jʉm-aechpox, wathoꞌ, pamaljiw naetʉpspi, japi naexasiti Jesús pejwʉajan
3 ¡Naewʉajande naexasiti Jesús pejwʉajan,
japi kajachawaesliajwa asew wathoꞌ,
pamaljiw naetʉpspi,
japi wathoꞌ pejjiw chiekal kijilpi kajachawaesliajwas!
4 Wathoꞌ,
pamaljiw naetʉpspi,
paxi,
pamojiwbej,
pakdiachow wʉt,
ja-aech wʉt,
nej kajachawaesas japi wathoꞌ.
Amwʉtjel,
japi pakdiachow xot,
¡nej tataefleꞌ penjiw,
paeꞌjiwbej!
Ja-aech wʉt,
Dios nejchachaemlaxael japi jiwliajwa.
5 Wathoꞌ,
pamaljiw naetʉpspi,
diachwʉajnakolax pejjiw chiekal kijilpi,
japi wathoꞌ Dios xanaboeja kajachawaesfʉlaliajwas.
Japi wathoꞌ bʉxkofa-elbej Dios kawʉajnaxpoxan matkoi,
madoibej,
Dios kajachawaesfʉlaliajwas.
6 Asew wathoꞌ,
pamaljiw naetʉpspi,
pajut isasiapoxan,
pachaema-elpoxan,
isfʉl wʉt,
ja-aech wʉt,
japi wathoꞌ,
me-ama patʉpa,
jachiyaxaeli Diosliajwa.
7 ¡Jesús pejwʉajan naexasiti toꞌim kajachawaesliajwapi wathoꞌ,
pamaljiw naetʉpspi!
Jesús pejwʉajan naexasiti chiekal kajachawaet wʉt japi wathoꞌ,
chinax kaen aton,
Jesús pejwʉajan naexasis-elpon,
wʉljʉmchiyaxil babejjamechan Jesús pejwʉajan naexasitiliajwa.
8 Aton,
Jesús pejwʉajan naexasitpon,
japon kajachawaes-el wʉt pejjiw,
pejjiwkolabej,
ja-aech wʉt,
asew jiw matabijaxaeson,
japon aton koft Jesús pejwʉajan naexasitpox.
Me-ama naexasis-eli Jesús pejwʉajan,
jachiyaxil japon.
Kaes pejme chaemilaxaelon.
Naexasis-elpi Jesús pejwʉajan,
japi chiekal tataefʉl pejjiw.
9 Wathoꞌ,
pamaljiw naetʉpspi,
japi kaes sesenta waechanpi wʉt,
japi pejwʉlan lelaxaes pelfʉtat,
kajachawaesliajwas naexasiti Jesús pejwʉajan.
Japi wathoꞌ pamaljiw naetʉps wʉt,
pejme poejiw nos-eli.
10 Japi wathoꞌ chiekal matabijas asew jiw,
majt is xoti pachaempoxan asew jiwliajwa,
pamaljiw naetʉpa-esal wʉti.
Japi wathoꞌbej majt paxi wʉt,
chiekal tataefʉl.
Japi wathoꞌbej chiekal bʉꞌkʉla,
asew jiw pat wʉt japi pejbatat.
Japi wathoꞌbej majt tʉakkiatpi,
naexasiti Jesús pejwʉajan pat wʉt japi pejbatat chiekal bʉꞌkʉlaliajwa.
Japi wathoꞌbej majt kajachawaetbej asew jiw,
nabijat wʉt.
Isbejpi puexa pachaempoxan asew jiwliajwa.
Me-ama japi wathoꞌ,
jasi wathoꞌlap,
kajachawaesaxaes naexasiti Jesús pejwʉajan.
11 ¡Wathoꞌ,
pamaljiw naetʉpspi,
sesenta waechana-elpifʉk,
japi pejwʉlan nabej leleꞌ pelfʉtat,
naexasiti Jesús pejwʉajan kajachawaesliajwas!
Japi wathoꞌ pejme nosaxael wʉt poejiw,
ja-aech wʉt,
bej kofaxaelbejpi Jesús pejbichax nabistpox.
12 Ja-aech wʉt,
japi wathoꞌ pejbʉꞌwʉajnaxael Diosliajwa,
chiekal is-el xoti jʉmduwpox,
Dios tanbichaxaelpox.
13 Ja-aech wʉt,
japi wathoꞌ asbʉan jʉmch nanʉamsaxael asabachan mathʉnaliajwa.
Ja-aech wʉtbej,
japi wathoꞌ kiwecha nadofaxael.
Bʉxwʉajanmaenkaxaelbejpi.
Bʉxxandadʉsaxaelbejpi.
Japi wathoꞌbej jʉmchiyaxael asew jiwliajwa pachaema-elpoxan jʉmchiliajwa asew jiw.
14 Samata,
wathoꞌ,
pamaljiw naetʉpspi,
japi chiekal pakdiachowa-el wʉtfʉk,
xan jʉm-an japi wathoꞌ pejme nakjiyaliajwa.
Ja-aech wʉt,
paxi wʉlxaeli.
Chiekal tataeflaxaelbejpi jiw pejbachanpijiw.
Ja-aech wʉt,
wajdaelmajiw babejjamechan jʉmchiyaxisal japi wathoꞌliajwa.
15 Xan japox jʉm-an,
asew wathoꞌ,
pamaljiw naetʉpspi,
kofa xoti Jesús pejwʉajan naexasitpox.
Do jawʉx,
asbʉan jʉmch islisi Satanás tatoꞌalpoxan.
16 ¡Wathoꞌ,
naexasiti Jesús pejwʉajan,
japi wathoꞌ kaenanʉla nej kajachawaes pejjiw,
wathoꞌ,
pamaljiw naetʉpspi!
Japi japox isfʉl wʉt,
ja-aech wʉt,
asew,
naexasiti Jesús pejwʉajan,
xajʉpaxael kajachawaesliajwa asew wathoꞌ,
pejjiw chiekal kijilpi.
Jesús pejwʉajan naexasiti, japi sitaeyaxaelpox ancianos
17 Ancianos chiekal tataefʉl wʉt naexasiti Jesús pejwʉajan,
ja-aech wʉt,
¡chiekal nej sitaes!
¡Ancianosbej chiekal nej mosas,
pomatkoicha naewʉajan wʉti,
chiekal chanaekabʉana wʉtbejpi jiw Dios pejjamechan!
18 Dios pejjamechan,
chajia lelspox,
jʉm-aech wʉt,
jʉm-aechox:
“Woei xanbistam wʉt trigo matbokkiyanaliajwa,
¡woei nabej kaechjoeleꞌ bozal trigo xaesamata!”
—aechox.
Jʉm-aechbejpox:
“Kaen aton nabist wʉt asanliajwa,
¡japon nej mosas!”
—aechox.
Samata,
¡ancianos chiekal nej mosas,
pomatkoicha chiekal naewʉajan wʉti,
chanaekabʉana wʉtbejpi asew,
Jesús pejwʉajan naexasiti!
19 Asan aton xam jʉm-aech wʉt:
“Xan taenx,
anciano babijax is wʉt” —aech wʉton,
¡japox kamta nabej naexasisfʉk!
Pe kolenje,
o,
tres aton,
japox kaeyax chiekal jʉm-aech wʉt,
ja-aech wʉt,
¡japi chiekal naexasiꞌe!
Pablo kaes lelpox, naewʉajnaxan Timoteoliajwa
20 Diachwʉajnakolax ancianos babijaxan isfʉl wʉt,
¡fiaꞌe puexa Jesús pejwʉajan naexasiti pejwʉajnalel!
¡Japoxlap xamal ja-amde puexa Jesús pejwʉajan naexasiti pejlewlaliajwa,
japibej babijaxan isasamata!
21 Paklon babijax is wʉt,
o,
paklona-elpon wʉtbej,
¡japi fiaꞌe!
Xam japox toꞌax isliajwam.
Dios chiekal matabijt,
Jesucristo sʉapich,
ángelesbej,
xam toꞌaxpox isliajwam.
22 Xam Timoteo,
ki-osasiam wʉt aton pejtaꞌtat japon aton makafisliajwam ancianoliajwa,
japon tatoꞌlaliajwa naexasiti Jesús pejwʉajan,
¡xam majt chiekal nejchaxoelde japon atonliajwa!
Chiekal matabijs-emilpon makafitam wʉt ancianoliajwa,
asamatkoi japon aton babijax is wʉt,
ja-aech wʉt,
japi jiw xam wʉljʉmchiyaxael:
“Timoteo kaenejchaxoelax,
japon aton sʉapich,
japox babijaxliajwa” —chiyaxael japi jiw xamliajwa.
Dukam wʉt,
¡chiekal najut tataefʉlde pomatkoicha babijax isasamatam!
23 Asamatkoi xam nejpoklawoejt chalechkal xabich jiwexaenk.
Ja-aech wʉt,
¡nabej feꞌ minkal!
¡Cha-aeldoech tanialde vinomint!
24 Asew jiw babijaxan is wʉt,
puexa jiw japoxan chiekal matabija.
Samata,
japi tasalas.
Pelax asew jiw maliach babijaxan is wʉt,
matabija-esal.
Pe baxael,
japi tasalas wʉt,
jawʉt puexa jiw matabija japi babijaxan ispoxan.
25 Jiw tulaela is wʉtbej pachaempoxan,
puexa jiw chiekal taen.
Asew jiw,
tulaela is-el pachaempoxan.
Pe japoxan asamatkoi puexa jiw chiekal matabijaxael.