Jesús pejwʉajan naexasiti Dios kawʉajnaxaelpox puexa asew jiwliajwa
2
Timoteo,
xan xabich nejxasinkax naexasiti Jesús pejwʉajan Dios kawʉajnaliajwa puexa asew jiwliajwa.
Japi jiw Dios kawʉajan wʉt,
graciaschiyaxaelbejpi Diosliajwa,
Dios puexa jiw kajachawaetpoxliajwa.
2 Japi,
naexasiti Jesús pejwʉajan,
Dios kawʉajnaxaelbejpi Dios chiekal kajachawaesliajwas jiw tatoꞌalpi,
nabistibej japiliajwa.
Ja-aech wʉt,
ajilaxael nabeyax.
Samata,
xatis chiekal duilaxaes.
Ja-aech wʉt,
xatisliajwa chiekal pachaemaxael Dios naexasisfʉlaliajwas,
me-ama japon nejxasink.
3 Pachaem,
xatis Dios kawʉajnas wʉt asew jiwliajwa.
Dios,
nakbʉꞌwiapon,
nejchachaemilbej,
japon kawʉajnas wʉt asew jiwliajwa.
4 Dios bʉꞌwesia puexa jiw.
Nejxasinkbejpon puexa jiw matabijaliajwa Jesús pejwʉajan,
diachwʉajnakolaxpox.
5 Dios kaen.
Do kaes asan Dios ajil,
me-ama Dios,
jason.
Jesucristobej kaen.
Japonlap asamatkoi jiw bʉflaeyaxael Dios poxase.
6 Cristo pajut natapaei asajiw kimatamatlaliajwas puexa jiw babijaxan ispoxan wemosliajwapon,
Dios puexa jiw bʉꞌweliajwa.
Japawʉajan Dios naktapaei matabijaliajwas,
naewʉajnaliajwasbej asew jiw ampamatkoiyan.
7 Samata,
Dios xan namakafit apóstolliajwan,
potʉajnʉcha judíos-elpi naewʉajnaliajwan chimiawʉajan,
Jesús pejwʉajan.
Xan jʉm-anpox,
diach chiekal wʉajnakolax.
Kichachajba-enil.
8 Xan nejxasinkax poejiw potʉajnʉcha Dios kawʉajnaliajwa.
Japi mʉaxxachoeyaxael,
Dios kawʉajan wʉt.
Japi poejiw,
chiekal pachaempi,
me-ama Dios nejxasink.
Palala-elpibej,
asew jiw sʉapich.
Majt nalot wʉt,
asew jiw sʉapich,
chiekal chaemtpibejlis.
9 Xan nejxasinkaxbej wathoꞌ naxoeliajwa,
madoꞌ ipachaem.
Do japoxantat wathoꞌ naxoeyaxael.
Wathoꞌ nachaemt wʉt,
chiekal mathiayaxael.
Xabich duiyaxil oro,
perlasbej.
Wathoꞌ naxoeyaxilbej yiafan,
xabich ommaenkpi.
10 Jachiyaxil wathoꞌ,
naexasiti Jesús pejwʉajan.
Japi wathoꞌlax isaxael pachaempoxan asew jiw kajachawaesliajwa.
Ja-aech wʉt,
asew jiw sitaeyaxaesi.
Japi wathoꞌliajwa jʉmchiyaxaesbej:
“Japi wathoꞌ xabich pachaem” —chiyaxaesi.
11 Poejiw Dios pejjamechan naewʉajan wʉt,
wathoꞌ boejlach chalakaxael chiekal naewesliajwa.
Ja-aech wʉt,
asew jiw nejchaxoelaxael japi wathoꞌliajwa:
“Japi wathoꞌ diachwʉajnakolax chiekal sitaen,
asew jiw naewʉajan wʉt Dios pejjamechan” —chiyaxael jiw,
nejchaxoels wʉt japi wathoꞌliajwa.
12 Xan tapae-enil wathoꞌ naewʉajnaliajwa Dios pejjamechan,
jiw natameja wʉt.
Wathoꞌlax chiekal boejlach chalakaxael naewesliajwa Dios pejjamechan.
Wathoꞌ tatoꞌlaxil poejiw.
13 Dios matxoela is Adán.
Do jawʉx,
Adán pijow ispon.
Samata,
wathoꞌ tatoꞌlaxil poejiw.
14 Adán naekichachajba-esal Satanás.
Eva naekichachajbas Satanás.
Samata,
japow naexasis-el Dios.
15 Wathoꞌ,
paxipi,
chiekal isfʉl wʉt puexa Dios tatoꞌlaspoxan paxi chiekal tiꞌsliajwa,
ja-aech wʉt,
Dios bʉꞌweyaxaes japi wathoꞌ.
Japi wathoꞌbej chiekal naexasisaxael Jesús pejwʉajan.
Asew jiw nejxasinkaxaelbejpi.
Chiekal duilaxaelbejpi,
me-ama Dios nejxasink.