5
Takoew,
xanal ampox lelx wʉt,
lela-enil jʉmchiliajwan:
“Japamatkoitat Jesús pasaxoek” —chiliajwan.
Japon asamatkoi pajut chiekal pasaxoek.
2 Xamal chiekal matabijam wajpaklon Jesús asamatkoi pejme pasaxoekpox.
Chalechkal pasaxoekon,
jiw japox nejchaxoela-el wʉt.
Me-ama kithakan madoi chalechkal pat wʉt,
jachiyaxael,
wajpaklon Jesús chalechkal pasaxoek wʉt.
3 Jiw jʉm-aech wʉt:
“Potʉajnʉcha chiekal wʉajan ajil.
Puexa jiw nejmach chiekal duil” —aech wʉti,
jawʉt chalechkal Jesús pejwʉajan naexasis-eli Dios kastikaxaes.
Me-ama pawis xabich wexaenks naxʉwlaliajwa wʉt,
jachiyaxaelbej jiw,
naexasis-eli Jesús pejwʉajan,
xabich kastikaxaes wʉt.
Japi jiw xabich nabijasaxael.
4 Takoew,
xamal,
me-ama asew jiw,
naexasis-eli Jesús pejwʉajan,
¡nabej ja-aecheꞌ!
Japi pejnejchaxoelaxan,
me-ama itkʉaꞌnik,
babijaxan is xot.
Xamal wʉajnawetam wajpaklon Jesús pasaxoekpox athʉlelsik.
Japamatkoitat fʉloek wʉton,
¡xamal nabej belweꞌ!
Me-ama kithakan chalechkal pat wʉt,
jiw beljow,
¡xamal nabej ja-aecheꞌ,
Jesús chalechkal pasaxoek wʉt!
5 Puexa xamal Jesús pejjiwam xot,
itliakaxpijwam.
Itkʉataxpijwa-emil.
6 Samata,
Jesús pejjiws xot,
chiekal nejchaxoelaxaes babijax isasamatas.
Me-ama asew babijaxan is,
xatislax jachiyaxisal.
7 Madoi jiw moejt.
Jiw saxtaspi,
japi madoi saxtas.
8 Xatis itliakaxpijwas xot,
wajut chiekal natataeflaxaes babijaxan isasamatas.
Kaes naexasisaxaesbej Dios pejjamechan,
Satanás nakmalechasamata.
Nakaewa nanejxasinkaxaesbej.
Dios xanaboejaxaesbej nakbʉꞌweliajwa.
9 Dios xatis nakmakanot wʉt,
nakmakanos-el nakkastikaliajwa.
Nakmakanotlax nakbʉꞌweliajwa wajpaklon Jesucristo pijaxtat.
10 Jesucristo tʉp xatis nakbʉꞌweliajwa.
Samata,
Jesús pejme fʉloek wʉt,
xatis ampathatat laelpaspisfʉk,
o,
tʉps wʉtbej,
jawʉt Jesús puexa xatis nakbʉflaeyaxael duilaliajwas japonxotse.
11 Xamal nakaewa nanaewʉajnampoxlis nejchachaemlaliajwam,
kaes Dios xanaboejaliajwambej,
¡japoxlap xamal nakaewa nanaewʉajnafʉlde!
Pablo pejme naewʉajanpox naexasiti Jesús pejwʉajan
12 Takoew,
xamal jʉm-an sitaeliajwam nabisti Diosliajwa xamalxot.
Japi Dios makanoch xamal tataeflaliajwa,
naewʉajnaliajwabejpi Dios pejjamechan.
13 ¡Japi jiw chiekal sitaem!
¡Nejxasinkdebej,
nabist xoti Diosliajwa!
Duilam wʉt,
¡chiekal duilafʉlde,
asew jiw sʉapich!
14 Takoew,
xamal toꞌax jiw kiwecha nabichax toꞌaliajwam.
Jesús pejwʉajan naexasiti,
nejchaemil wʉt,
¡japi jiw naewʉajande nejchachaemlaliajwa!
¡Kajachawaeꞌebej jiw Dios xanaboejapox chiekal mamnika-elpi,
kaes chiekal Dios xanaboejaliajwa!
Asew jiw xamal taliat wʉt,
¡kamta nabej nalaleꞌ!
15 Asew jiw babijaxan is wʉt xamalliajwa,
¡xamal chiekal taem babijaxan isasamatam japi jiwliajwa!
¡Xamallax isfʉlde pachaempoxan nakaewaliajwa,
puexa asew jiwliajwabej!
16 ¡Pomatkoicha nejchachaemildebej!
17 ¡Dios kawʉajandebej pomatkoicha!
18 ¡Diosliajwa gracias-amdebej puexa Dios ispoxanliajwa xamalliajwa!
Japoxlap Dios xabich nejxasink xamal jʉmchiliajwam,
naexasitam xot Jesucristo pejwʉajan.
19 Espíritu Santo xamal toꞌa wʉt isaxaelampox,
¡japoxliajwa nabej nejchaxoeleꞌ:
“Xan japox isaxinil” —nabej aecheꞌ,
nejchaxoelam wʉt!
20 Profetas jʉm-aech wʉtbej asamatkoi jachiyaxaelpoxliajwa,
¡xamal nejchaxoelam wʉt,
nabej nejchaxoeleꞌ:
“Japox asamatkoi diachwʉajnakolax jachiyaxil” —nabej aecheꞌ,
nejchaxoelam wʉt!
¡Profetas naewʉajanpoxanliajwabej nabej jʉm-aecheꞌ:
“Japi naewʉajanpoxan,
Dios bʉxtoꞌaspoxana-el” —nabej aecheꞌ!
21 ¡Profetas jʉm-aechpoxan xamal majt chiekal xapaejam Dios pejjamechantat!
Do ja-am wʉt,
xamal chiekal matabijaxaelam.
Do jawʉtbej,
¡jʉm-amde:
“Diachwʉajnakolax japi Dios bʉxtoꞌas naewʉajnaliajwa japajamechan” —amde,
nejchaxoelam wʉt!
Do jawʉt,
¡japi chiekal naexasiꞌe!
22 ¡Puexa pachaema-elpoxan nabej is!
¡Puexa babijaxan ispixot xamal atʉajimbej!
23 Dios,
xabich pachaempon,
¡japon pajut nej kajachawaes xamal chiekal duilaliajwam,
is-elaliajwambej babijaxan!
Dios xamal kajachawaet wʉt,
xamal xabich pachaemaxaelam,
wajpaklon Jesucristo pasliajwa wʉt.
24 Jasoxtat Dios kajachawaesaxael,
xamal makanot xoton japon pejjiwaliajwam.
Isaxaelbejpon puexa chajia jʉmdutpoxan.
Pablo toꞌapox naexasiti Jesús pejwʉajan nakaewa nasaludaliajwa, Tesalónica paklowaxpijiw
25 Takoew,
¡xamal Dios kawʉajande xanalliajwa!
26 ¡Jesús pejwʉajan naexasitampim,
nakaewa chiekal nasaludam!
27 Dios pijaxtat xamal toꞌax ampox carta chanaexaljoeliajwam puexa wajkoew,
Jesús pejwʉajan naexasitiliajwa.
28 Xan wajpaklon Jesucristo kawʉajnax xamal xabich kajachawaesliajwapon.