4
Xamal paklochwam,
¡xamal chiekal pachaemde nej-esclavosliajwa!
Me-ama Dios nejxasink,
¡ja-amsfʉlde japiliajwa!
¡Xabich nabej tatoꞌleꞌ nej-esclavos xabich nabichliajwa bichaxan!
¡Chiekal nejchaxoelde!
Xamalbej nejpaklon athʉxotse.
Pablo toꞌapox Colosas paklowaxpijiw, japi Dios kawʉajnaliajwa japonliajwa
2 ¡Xamal Dios kawʉajnafʉlde!
¡Gracias-amsfʉldebej Diosliajwa,
kawʉajnam wʉt!
3 ¡Xanalliajwabej Dios kawʉajande japon xanal natapaeliajwa pejme jiw naewʉajnaliajwan Jesús pejwʉajan,
majt jiw matabija-elwʉajan!
Japawʉajan naewʉajnax xot,
amwʉtjel jiw jebatat asew jiw xan najia.
4 ¡Dios kawʉajande,
xan jiw naewʉajnax wʉt chiekal naewʉajnaliajwan,
japibej chiekal matabijaliajwa Jesús pejwʉajan!
5 Xamal Jesús pejwʉajan naexasis-elixotam wʉt,
¡chiekal duilafʉlde!
Japixot pachaem wʉt naewʉajnaliajwam Jesús pejwʉajan,
¡naewʉajande!
6 Xamal nospaeyam wʉt,
jiw sʉapich,
¡nospaem pachaempoxan jiw chiekal nejchachaemlaliajwa!
¡Matabijimbej chiekal jʉmnosliajwam kaenanʉla japi jiw!
Pablo saludos xatoꞌapox asew jiwliajwa
7 Wajkoewan Tíquico,
xatis nejxasinkaspon,
chiekal nabist wajpaklonliajwa,
xan sʉapich.
Tajwʉajan japon xalaeyaxael xamal chapaeliajwa,
paꞌa wʉton xamalxot.
8 Samata,
japon toꞌaxaelen amwʉt xamal poxade jʉmchiliajwapon,
ma-an xanal,
amxotan wʉt.
Ja-aech wʉt,
xamal xabich nejchachaemlaxaelam xanalliajwa.
9 Tíquico fʉlaeyaxael wʉt xamal poxade,
wajkoewan Onésimo,
xatis xabich nejxasinkaspon,
japonbej fʉlaeyaxael xamal poxade.
Onésimo majt xamalxoton.
Japon chiekal nabistbej wajpaklonliajwa.
Kofs-elpon.
Japi xamalxot paꞌa wʉt,
xamal chapaeyaxaelon xanliajwa amxot ja-aechpoxan.
10 Aristarco,
japon tajnachalan jiw jebatat,
saludos xatoꞌa xamalliajwa.
Marcos,
Bernabé pakoewan,
japonbej saludos xatoꞌa xamalliajwa.
Xamal chajia toꞌax,
Marcos pat wʉt xamalxot chiekal bʉꞌkʉlaliajwam.
11 Asan pawʉl Jesús.
Japonbej saludos xatoꞌa xamalliajwa.
Japon asawʉl Justo.
Japi tres poejiw,
judíos,
naexasiti Jesús pejwʉajan.
Puexa judíosxot,
japi koew,
xan sʉapich,
nabist Diosliajwa,
asew jiw Dios naexasisliajwa.
Samata,
xan xabich nejchachaemlax,
japi nakajachawaet xot.
12 Epafras majt xamalxoton,
japon nabist Jesucristoliajwa.
Japonbej saludos xatoꞌa xamalliajwa.
Japon xabich Dios kawʉajan nejxanaboejaxan kaes mamnikaliajwa Diosliajwa.
Xabich Dios kawʉajanbejpon xamal kajachawaesliajwa isliajwam puexa Dios nejxasinkpoxan.
13 Xan taenx,
Epafras xabich nejchaxoel wʉt xamalliajwa,
Laodicea paklowaxpijiwliajwabej,
Hierápolis paklowaxpijiwliajwabej.
14 Lucas,
japon médico,
xatis nejxasinkaspon,
japonbej saludos xatoꞌa xamalliajwa.
Asan,
pawʉlpon Demas,
japonbej saludos xatoꞌa xamalliajwa.
15 Xan saludos xatoꞌax naexasiti Jesús pejwʉajan,
Laodicea paklowaxpijiwliajwa.
Saludos xatoꞌaxbej japon Ninfaliajwa.
Saludos xatoꞌaxbej,
japi natamejapi Ninfa pejbaxot,
naexasiti Jesús pejwʉajan.
16 Xamal ampox carta xaljoeyax toetam wʉt,
¡xatoꞌim Laodicea paklowaxpijiw poxade,
japi naexasiti Jesús pejwʉajan,
japibej xaljoeliajwa ampox carta!
Asacarta chajia xatoꞌax Laodicea paklowaxpijiwliajwa.
Japox carta japi xatoꞌaxaen xamal poxadin.
Carta xamal chaxdut wʉti,
¡xamalbej xaljoem japox carta!
17 ¡Arquipo jʉm-amde chiekal toesliajwa Jesucristo toꞌaspox japon isliajwa!
18 Xan Pablo,
tajut lelx xamal saludaliajwan.
Xamal Dios kawʉajnam wʉt,
¡nabej nejkioweꞌ xanliajwabej Dios nawekawʉajnaliajwam,
xan jiw jebatataxpoxliajwa!
Xanbej Dios kawʉajnax xamalliajwa japon xabich kajachawaesliajwa xamal.