Puexa jiw chimiajamechan jʉmchiyaxaelpox Cristoliajwa
2
Jesús pejwʉajan naexasitam xot,
Dios xanaboejam.
Xamal najut matabijambej Cristo xamal nejxasinkpox.
Samata,
xamal nejchaxoela-emil asaxan.
Espíritu Santo xamal nejmatpʉatanxotpon.
Samata,
chiekal pachaemam nakaewaliajwa.
Nabeltaenambej nakaewa.
2 Samata,
¡xamal isfʉlde xan toꞌaxpox,
xan nejchachaemlaliajwan xamalliajwa!
¡Xamal nakaewa nanejxasinkde!
¡Xamal isaxaelampox isfʉlde kaenejchaxoelaxantat!
3 Xamal nejchaxoelam wʉt,
¡nabej nejchaxoeleꞌ ampox:
“Xan isxpoxan,
japoxan xan tajutliajwa” —nabej aecheꞌ!
¡Nabej nejchaxoeleꞌbej:
“Ampoxan isx jiw xabich nasitaeliajwa” —nabej aecheꞌ,
nejchaxoelam wʉt!
Xamal najutliajwa nejchaxoelam wʉt,
¡nejchaxoelde ampox:
“Xan kaes pachaema-enil.
Me-ama asew jiw,
xabich pachaempi,
xan jachi-enil” —amde,
nejchaxoelam wʉt!
4 Xamal nejchaxoelam wʉt,
¡nabej nejchaxoeleꞌbej isliajwam pachaempoxan xamal najutliajwakal!
¡Nejchaxoelde isliajwam pachaempoxan asew jiwliajwabej!
5 Me-ama Jesucristo nejchaxoel,
¡jasox xamalbej nejchaxoelde!
6 Jesucristo chiekal najʉp,
pax Dios sʉapich.
Pe japon jʉmbisnika-el,
me-ama pax Dios wʉt,
jachiliajwa.
7 Samata,
kofton tatoꞌalpox Diosxotse fʉlaeliajwa ampathatasik.
Ja-aech wʉt,
nalaelton ampathatat.
Japon chiekal tiꞌt wʉt,
me-ama nejmach-aton wʉt,
ja-aechon.
8 Ampathatat wʉton,
pajut nejxasinkpoxan is-el.
Japonlax isfʉl Dios nejxasinkpoxan.
Samata,
pajut natapaeipon asajiw boesaliajwas,
Dios toꞌas xoton japox jachiliajwas.
Jatis wʉt,
japon tʉp cruztat.
Me-ama xabich babijaxan ispon wʉt,
jakitison,
kimatamatlas wʉt cruztat.
9 Jatis wʉton,
japon Dios mat-ech pejme dukaliajwa.
Bʉꞌfosbejpon athʉ poxase,
kaes paklon nadofaliajwa,
puexa tatoꞌlaliajwabejpon.
Kaes asan ajil,
me-ama japon,
jason.
10 Dios jasox toꞌa Jesús,
puexa jiw brixtat nuilaliajwa Jesús pejwʉajnalel,
puexa athʉxotsepi,
ampathatpijiwbej,
infiernoxotpibej.
11 Puexa jiw jʉmchiyaxael Jesúsliajwa:
“Japon paklon puexa jiwliajwa” —chiyaxaespon.
Ja-aech wʉt,
puexa jiw pajut matabijaxael Dios diachwʉajnakolax xabich pachaem.
Jesús pejwʉajan naexasiti ampathatat, me-ama itliak wʉt, ja-aechi
12 Takoew,
xamal nejxasinkaxpim,
majt xamalxotx wʉt,
xamal xan nanaexasitam.
Amwʉtjel,
atʉajan wʉt,
¡kaes pejme nanaexasisfʉlde!
Kaenanʉla xamal chiekal duilam,
Dios xabich sitaenam xot,
naexasitam xotbej Jesús pejwʉajan.
13 Dios xamal kajachawaesfʉl xot,
nejxasinkam isliajwam Dios nejxasinkpoxan.
Dios nejxasinkpoxan isaxaelam wʉt,
japon kajachawaesfʉlaxaelbej xamal japoxan isliajwam.
14 Kiwesla wʉt asax isliajwam,
¡nakiowa isde!
¡Nabej jʉm-aecheꞌ babejjamechan japoxliajwa!
¡Nakaewa nabej nalosbej!
15 Ja-am wʉt,
asew jiw babejjamechan jʉmchiyaxil xamalliajwa.
Dios paxim xot,
¡chiekal duilafʉlde jiw babejchowxot!
Ja-am wʉt,
xamal,
me-ama ithaej,
madoi itliak wʉt,
jachiyaxaelam japi jiwliajwa.
16 ¡Jiw babejchowxot naewʉajande Jesús pejwʉajan japi jiw chiekal matabijaliajwa,
chiekal duilaliajwabejpi pajelnejchaxoelaxantat!
Ja-amsfʉlam wʉt,
Cristo fʉloek wʉt,
xan nejchachaemlaxaelen xamalliajwa.
Matabijtax xan nawenafoꞌaxilpox,
xamal naewʉajnaxpox.
17 Dios nejchachaemil,
xamal naexasitam xot Cristo pejwʉajan.
Xan matabijtax wʉt Dios nejchachaemilpox xamalliajwa,
xanbej nejchachaemlax.
Xan bej nabʉꞌaboesaxaelbej asew jiw,
xamal naewʉajnax xot Jesucristo pejwʉajan.
Japi nabʉꞌaboesa wʉt,
xan nejchachaemlaxaelen Diosxotse.
18 ¡Xamalbej xanliajwa nabej nejxaejweꞌ!
¡Asbʉan jʉmch nejchachaemilde!
Pablo nejchaxoelpox toꞌaliajwa Timoteo, Epafrodito sʉapich, Filipos paklowax poxade
19 Wajpaklon Jesús nejxasink wʉt,
kamtalejen xan toꞌaxaelen Timoteo xamal poxade.
Timoteo xamalxot nawiaꞌan wʉt,
wʉltaeyaxaelen,
ma-am xamal,
duilam wʉt.
Wʉltaenx wʉt chiekal duilampox,
xan xabich nejchachaemlaxaelen.
20 Kaen Timoteo kaenejchaxoelax,
xan sʉapich.
Xanxot kaes asan aton ajil,
xamalliajwa xabich nejchaxoelpon,
me-ama xan,
ja-aechpon.
21 Puexa amxotpijiw nejchaxoel pajut isasiapoxan.
Samata,
nejchaxoela-eli isliajwa Jesucristo pejbichax.
22 Xamal chiekal matabijam,
Timoteo chiekal nabist Jesúsliajwa.
Japon asew jiw naewʉajan Jesús pejwʉajan,
xan sʉapich.
Samata,
Timoteo xanliajwa,
me-ama taxʉlan wʉt,
jabʉan-anpon,
nakajachawaesfʉl xot naewʉajnaxpoxan.
23 Xan tajut chiekal matabijtax wʉt jachiyaxaelpox xanliajwa amxot jiw jebatat,
jawʉt toꞌaxaelen Timoteo xamal poxade.
24 Dios nejxasink wʉt,
xanbej tajut fʉlaeyaxaelen xamal taeliajwan.
25 Timoteo fʉlaeyaxil wʉtfʉk,
xan nejchaxoelx matxoela toꞌaliajwan wajkoewan Epafrodito xamal poxade.
Epafrodito nakajachawaet xan jiw naewʉajnax wʉt Jesús pejwʉajan.
Xamal japon toꞌam wʉt,
japon fʉlaen xanlel nakajachawaesliajwa naweweꞌppoxan.
26 Epafrodito majt xabich bʉꞌxaenk,
xanxot wʉt.
Amwʉtjel chiekal nejchaemlison.
Samata,
japon xamal xabich taesia.
Xabich nejchaxoelon xamalliajwa,
xamal xabich nejchaxoelam xot japonliajwa,
wʉltaenam wʉt japon majt xabich bʉꞌxaenkpox.
27 Epafrodito bʉꞌxaenk wʉt,
diachwʉajnakolax mox pejtʉpapon.
Dios beltaens xot,
kajachawechpon boejthʉlaliajwas japawaxae.
Pe japonkal Dios beltae-esal.
Xanbej Dios nabeltaen,
Epafrodito tʉp wʉt xabich kaes nanejxaejwasamata.
28 Samata,
Epafrodito toꞌaxaelen xamal poxade.
Pejme xamal japon taeyaxaelam wʉt,
xabich nejchachaemlaxaelam japonliajwa.
Xanbej nejchachaemlaxaelen,
xamal pejme japon taeyaxaelam wʉt,
chiekal nejchaem xotlison.
29 Epafrodito xamalxot pat wʉt,
¡xamal chiekal bʉꞌkʉlim,
nejchachaemlaxtat,
japonbej naexasit xot Jesús pejwʉajan!
¡Chiekal sitaembejpon!
¡Asew jiw,
Jesús pejwʉajan naexasiti,
japibej sitaem!
Me-ama Epafrodito sitaenam wʉt,
¡ja-amdebej japi jiwliajwa!
30 Epafrodito xan nakajachawaet wʉt Cristo pejbichax,
japon waxae waech wʉt,
mox pejtʉpepon.
Xamal japon toꞌam xan nakajachawaesliajwa,
xamal najut nakajachawaesaximil xot.