3 ¡Xatis jʉmchiyaxaes Dios,

japon wajpaklon Jesucristo pax:

“Xam xabich pachaemam” —chiyaxaes!

Dios nakkajachawaesfʉl puexa nejmach xatisliajwa chiekal pachaemaliajwa japonxotse,

naexasisfʉlas xot Jesucristo pejwʉajan.

4 Chajiakolaxtat,

Dios ampathat is-el wʉtfʉk,

xatis nakmakanoton Jesucristo pejjiwaliajwas,

Dios pejwʉajnalel bʉꞌwʉajanjilaliajwas.

5 Dios naknejxasink xot,

japon chajia nejchaxoel xatis japon paxiliajwas,

asamatkoi Jesucristo tʉpaxael xot xatis babijaxan isaspoxanliajwa.

Samata,

Dios japox nejxasink xot,

Jesucristo tʉp xatis babijaxan isaspoxanliajwa.

6 Samata,

amwʉtjel xatis pomatkoicha jʉmtis Diosliajwa:

“Xam xabich pachaemam,

nabeltaenam xot” —tis xatis japonliajwa.

Jasoxtat Dios xatis nakbeltaen paxʉlan Jesucristo,

xabich nejxasinkpon,

pijaxtat.

7 Dios xabich naknejxasink xot,

paxʉlan toꞌa tʉpaliajwa cruztat.

Samata,

xatis babijaxan isaspoxan ajil Diosliajwa.

8 Ja-aech wʉt,

chiekal matabijas Dios xabich naknejxasinkpox.

Ja-aech wʉtbej,

Dios naktapaei pejjamechan chiekal matabijaliajwas.

9 Dios chajia nejchaxoel asamatkoi toꞌaliajwapon Cristo,

japon tatoꞌlaliajwa puexa ampathatpijiw.

Japox majt chinax kaen aton matabijs-elfʉk.

Dios xatis naktapaei japox chiekal matabijaliajwas.

10 Japoxlap asamatkoi jachiyaxael.

Japamatkoi wʉt,

Dios tapaeyaxael Jesucristo puexa tatoꞌlaliajwa ampathatpijiw,

Diosxotsepibej.

11 Xatis nalaela-esal wʉtfʉk,

Dios chajia nakmakanot Jesucristo pejjiwaliajwas.

Samata,

Dios naktapaeyaxael pomatkoicha duilaliajwas japonxotse,

Cristo sʉapich.

Japoxlap chajiakolaxtat Dios nejchaxoel.

12 Xanal,

judíos,

matxoela naexasitx Jesucristo pejwʉajan.

Samata,

xanal jʉm-an Diosliajwa:

“Xam xabich pachaemam” —an,

japon xajʉp xot puexa isliajwa.

13 Xamalbej,

judíos-emilpim,

jʉmtaenam wʉt chimiawʉajan,

Cristo pejwʉajan,

diachwʉajnakolaxpox,

naexasitam japawʉajan Dios xamal bʉꞌweliajwa.

Japawʉajan naexasitam wʉt,

Dios toꞌak Espíritu Santo xamalxotaliajwa kajachawaesliajwabej,

chiekal matabijaliajwam xamal japon pejjiwampox.

Ja-aech,

Espíritu Santo xamalxot pask wʉt,

Dios jʉmdutpox pat xotlisox xamalxot.

14 Espíritu Santo wajmatpʉatanxot.

Samata,

chiekal matabijas diachwʉajnakolax pomatkoicha duilaxaes Diosxotse.

Dios nakchaxduiyaxaelbej puexa xatisliajwa owapipon,

wejewliajwa.

Samata,

xatis jʉmtis Diosliajwa:

“Xam xabich pachaemam” —tis,

japon xajʉp xot puexa isliajwa.

Asew jiw,

weꞌppifʉk naexasisliajwa Jesús pejwʉajan,

japi puexa naexasit wʉt Jesús pejwʉajan,

Dios japoxan nakchaxduiyaxael,

owapipon wejewliajwa.

15 Xan xamal wʉltaenx chiekal naexasitampox wajpaklon Jesús pejwʉajan.

Wʉltaenxbej nejxasinkampox puexa Dios pejjiw.

16 Samata,

xan pomatkoicha Dios kawʉajnax xamalliajwa.

Kawʉajnax wʉt,

jʉm-an Diosliajwa:

“Gracias-an,

Éfeso paklowaxpijiwbej naexasit xot Jesucristo pejwʉajan” —an Diosliajwa.

17 Dios,

athʉxotsepon,

japon wajpaklon Jesucristo pax,

xabich pachaem.

Dios kawʉajnax wʉt xamalliajwa,

Dios jʉm-an Espíritu Santo xamal kajachawaesliajwa Dios chiekal matabijaliajwam.

18 Dios kawʉajnaxbej xamal chiekal matabijaliajwam Dios chaxduiyaxaelpox.

Xabich pachaem japox,

xamal Dios pejjiwam wʉajnawetampox.

19-20 Dios kawʉajnaxbej xamal chiekal matabijaliajwam,

japon xabich mamnik.

Samata,

Dios xajʉp nakkajachawaesliajwa,

Jesucristo pejwʉajan naexasichpis.

Cristo tʉp wʉt,

Dios mat-echpon pejme dukaliajwa.

Ja-aech wʉt,

Dios itpaei pejpamamax.

Do jawʉx,

paxʉlan bʉꞌfolon athʉ poxase ekaliajwa japon pejpoklalel,

tatoꞌlaliajwabejpon,

japon sʉapich.

21 Samata,

amwʉtjel Jesús kaes paklon.

Me-ama puexa tatoꞌalpi,

athʉxotsepi,

ampathatpijiwbej,

jachi-el Jesús.

Pomatkoicha tatoꞌlaxaelon.

22 Dios tapaei Cristo puexa tatoꞌlaliajwa.

Samata,

Cristo puexa jiw tatoꞌlafʉl.

Cristo tatoꞌlafʉlbej puexa japon pejwʉajan naexasitpi.

23 Cristo pejwʉajan naexasiti,

puexa japi jiw Cristo pejbʉꞌt wʉt,

ja-aechi.

Samata,

Cristo japixot.

Japon xajʉp puexa isliajwa athʉxot,

ampathatxotbej.