13
Puexa jiw chiekal naexasisaxael jiw tatoꞌla.
Japi jiw tatoꞌal,
Dios tapaeis xot.
Dios tapaeis xotbej,
japi xajʉp puexa jiw tatoꞌlaliajwa.
2 Samata,
jiw naexasis-el wʉt jiw tatoꞌla,
japibej sitae-el Dios tatoꞌalpox.
Naexasis-el wʉti,
asamatkoi Dios kastikaxaes japi jiw.
3 Jiw,
ispi pachaempoxan,
japi pejlewla-el jiw tatoꞌalpiliajwa.
Pe babijaxan ispi,
japi jiwlax pejlewla jiw tatoꞌalpiliajwa.
Xamal nejlewlasamata jiw tatoꞌalpiliajwa,
¡isfʉlde pachaempoxan!
Ja-am wʉt,
jiw tatoꞌalpi nejchachaemlaxael xamalliajwa.
4 Japi tatoꞌal jiw,
Dios tapaeis xot puexa xamalxot chiekal pachaemaliajwa.
Babijaxan isam wʉt,
xamal nejlewlaxael jiw tatoꞌalpiliajwa.
Jiw tatoꞌalpi,
japi Dios tapaeis jiw kastikaliajwa,
babijaxan ispi.
5 Samata,
¡chiekal naexasisfʉlde jiw tatoꞌalpi!
Xamal japi chiekal naexasitam wʉt,
nejchaxoelam wʉt,
¡nabej nejchaxoeleꞌ:
“Jiw tatoꞌalpi xan naexasitx nakastikasamata” —nabej aecheꞌ,
nejchaxoelam wʉt!
¡Nejchaxoelafʉldelax:
“Jiw tatoꞌalpi naexasisaxaelen,
pachaem xot naexasisliajwan” —amsfʉlde,
nejchaxoelam wʉt!
6 Samata,
xamal impuesto motam jiw tatoꞌalpi chiekal xanbichfʉlaliajwa japaplata,
me-ama Dios tatoꞌlas japi.
7 Samata,
jiw tatoꞌalpi kaenanʉla dewatam wʉt,
¡moꞌe!
Nabistpi jiw tatoꞌalpiliajwa,
japibej xamal mat-omwʉljow wʉt,
impuesto dewatampoxan,
¡moꞌe japox impuesto!
Asew jiw,
sitaenspi,
¡japibej xamal sitaem!
8 ¡Xamal asew jiw nabej dewas!
¡Xamallax asew jiw nejxasinkafʉlde!
Xatis asew jiw nejxasinkas wʉt,
jatis wʉt,
kaewʉtje naexasich puexa Moisés chajia lelpox.
9 Moisés chajia lelpox jʉm-aech:
“Xam nijowponam,
¡asew wathoꞌ nabej bʉꞌmoejs!
¡Nabej beꞌbej asew jiw!
¡Nabej natkoweꞌbej asew jiw pejew!
¡Nabej nejxasinkeꞌbej asew pejew nejewliajwa!”
—aech asafʉtat Moisés chajia lelpox.
Moisés lelbej asawʉajan.
Puexa japawʉajanxot jʉm-aechpoxan,
jʉmchiliajwa ampox:
“¡Asew jiw nejxasinkde!
Me-ama xamal najut nanejxasinkam wʉt,
¡ja-amsfʉlde asew jiwliajwa!”
—chiliajwa japox.
10 Jiw nejxasink wʉt asew jiw,
japi jiw is-el babijaxan asew jiwliajwa.
Samata,
japi jiw ja-aech wʉt,
kaewʉtje naexasiti Moisés chajia lelpox jʉm-aechpoxbej.
11 Xatis asew jiw nejxasinkaxaes,
mox pawʉajna xot Jesucristo pejme pasliajwa ampathatasik.
Samata,
¡xamal nabej bʉxkofeꞌ jiw naewʉajnaliajwam wajpaklon Jesucristo pejwʉajan!
Akasestat naexasich wʉt Jesús pejwʉajan,
nejchaxoels:
“Jesucristo makach bej pasaxilbej” —tis,
nejchaxoels wʉt.
Amwʉtjel mox pawʉajna Jesucristo pejme pasliajwa ampathatasik,
xatis nakbʉflaeliajwa Dios poxase.
12 Mox pawʉajna matkoiyan toepaliajwa,
xatis ampathatat laelpaspisliajwa.
Moxsfʉlbej matkoi xatis duilaliajwaspox Diosxotse.
Samata,
kofaxaes babijaxan isaspoxan.
Amwʉtlax isfʉlaxaes Dios nejxasinkpoxan.
13 Babijaxan isaxisal chiekal duilaliajwas.
Samata,
feyaxisal saxa naksaxsliajwa.
Najajinaxisalbej fiestanxot.
Bʉꞌmoejsaxisalbej asew wathoꞌ.
Nabʉꞌmoejsaxisalbej nakaepoejwa.
Kaes asaxan babijaxan isaxisalbej.
Nabeyaxisalbej.
Nusasiowlaxisalbej asew jiwliajwa.
14 Xatislax wajpaklon Jesucristo pejjiws xot,
chiekal duilaxaes,
japon nakkajachawaesaxael xot.
Isaxisal babijaxan,
wajut isasiaspoxan.