Jesús pejwʉajan naexasiti, japi duil Dios tanbichliajwa
12
Takoew,
xamal chiekal matabijam,
Dios nakbeltaen,
xatis majt babijaxan isas wʉt.
Samata,
xamal toꞌax.
Me-ama kaenanʉla ofrenda chaxduwam wʉt,
¡ja-amde xamal Diosliajwa!
¡Xamal najut nawoeyam Diosxot isliajwam Dios nejxasinkpoxan!
¡Isfʉlde Dios pejbichax Dios nejchachaemlaliajwa xamalliajwa!
¡Japoxan isfʉlde,
Dios xabich sitaenam xot!
2 ¡Nabej is babijaxan!
Me-ama Dios naexasis-elpi is babijaxan,
¡xamal nabej ja-aecheꞌ!
¡Tapaem Dios kajachawaesliajwa,
xamal nejchaxoelampoxan babijaxan kofaliajwam!
Nejchaxoelam wʉt,
¡nejchaxoelde Dios pijaxan!
Ja-am wʉt,
xamal chiekal duilaxaelam.
Matabijaxaelambej Dios nejxasinkpoxan isliajwam.
Japoxan pachaem.
Pachaempoxan isam wʉt,
ja-am wʉt,
Dios nejchachaemlaxael xamalliajwa.
3 Dios nabeltaen xot,
japon xan natoꞌa pejbichax nabichliajwan.
Samata,
puexa xamal jʉm-an ampox.
Nabichfʉlam wʉt Diosliajwa,
nejchaxoelam wʉtbej,
¡nabej nejchaxoeleꞌ:
“Xan asabichax nabichasian,
Dios pejbichax,
kaes pejme pachaempox,
jiw kaes chiekal nasitaeliajwa” —nabej aecheꞌ,
nejchaxoelam wʉt!
Jasox nejchaxoelasamatam,
¡majt chiekal nejchaxoelde chiekal matabijaliajwam,
ma-am xamal Dios pejbichaxanliajwa,
Dios xamal chaxduwbichaxan!
4 Kaenanʉla wajbʉꞌantat maenk pathi,
pawibej,
kaes asaxanbej,
japoxan kaenanʉla isfʉlaliajwa isaxaelpoxan.
5 Xatisbej xabich pin-iatas.
Pe nakiowa,
kaebʉꞌtas,
Cristo sʉapich.
Xatis kaenanʉla nabistas asabichaxan Diosliajwa.
Jatis wʉt,
¡nakaewa nakajachawaesaxaes!
6 Dios nakchaxduw kaenanʉla pejbichaxan,
me-ama japon nejchaxoel japabichaxan nakchaxduiliajwa japon tanbichliajwas.
Samata,
xatis xabich pachaems wʉt asew jiw naewʉajnaliajwas Dios pejjamechan,
jatis wʉt,
¡Dios xanaboejaxaes naewʉajnaliajwas asew jiw!
7 Xatisbej xabich pachaems wʉt kajachawaesliajwas asew jiw,
naexasiti Jesús pejwʉajan,
¡japi jiw kajachawaesaxaes!
Atonbej xabich pachaem wʉt chiekal chanaekabʉanaliajwa Jesús pejwʉajan naexasiti,
¡japon aton nej chanaekabʉane asew jiw!
8 Asanbej xabich pachaem wʉt chiekal naewʉajnaliajwa asew jiw japi kaes Dios chiekal xanaboejaliajwa,
¡japon aton chiekal nej naewʉajneꞌ japi jiw nejchachaemlaliajwa!
Asanbej xabich pachaem wʉt kajachawaesliajwa pejewtat jiw kijilpi,
¡japon aton nej kajachawaesfʉle japi jiw!
Asanbej xabich pachaem wʉt jiw chiekal tatoꞌlaliajwa,
¡japon aton chiekal jiw nej tatoꞌleꞌ japi jiw!
Asanbej xabich pachaem wʉt asew jiw kajachawaesfʉlaliajwa,
xabich weweꞌpaspi,
¡japon aton xabich nej kajachawaesfʉle nejchachaemlaxtat!
Machiyaxaelpox Jesús pejwʉajan duil wʉt
9 ¡Nakaewa chiekal nanejxasinkafʉlde!
¡Xamal nabej nejxasinkeꞌbej pachaema-elpoxan!
¡Isfʉlde pachaempoxan!
10 Nejxasinkam wʉt asew jiw,
Jesús pejwʉajan naexasiti,
¡japi nejxasinkafʉlde!
Me-ama nakoewkola nejxasinkam wʉt,
¡ja-amsfʉlde asew jiwliajwabej!
Japi jiwliajwa nejchaxoelam wʉt,
¡nejchaxoelde:
“Japi jiw kaes pejme pachaem.
Me-ama xan,
jachi-elpi” —amde,
nejchaxoelam wʉt!
¡Nakaewa nasitaembej!
11 ¡Nabichliajwam nabej kiwesleꞌ!
Nabistam wʉt Dios pejbichax,
¡nabichfʉlde puexa nejpamamaxtat!
12 Asamatkoi duilaxaelam pomatkoicha Diosxotse.
Samata,
¡nejchachaemlafʉlde!
Nabijatam wʉt asew jiw pijaxtat,
naexasitam xot Jesús pejwʉajan,
¡boejtaliasfʉlde!
Ja-am wʉt,
¡pomatkoicha Dios kawʉajnaxaelam!
¡Nabej bʉxkofeꞌ Dios kawʉajnafʉlampox!
13 ¡Dios naexasiti kajachawaesfʉlde weweꞌpaspoxanliajwa!
Japi,
naexasiti Jesús pejwʉajan,
pat wʉti nejbachanxot,
¡chiekal bʉꞌkʉlim!
14 Nabijatam wʉt,
jiw babejchow babijax is xot xamalliajwa,
naewʉajnam xot Jesús pejwʉajan,
Dios kawʉajnam wʉt,
¡jʉm-amde:
“Dios,
¡xam japi jiw kajachawaeꞌe tapasasamatas babijaxan” —amde!
Dios kawʉajnam wʉt japi jiwliajwa,
¡nabej nejchaxoeleꞌ:
“Japi nej tapasas babijaxan xam kastikaliajwam japi jiw!”
—nabej aecheꞌ,
Dios kawʉajnam wʉt!
15 Asew jiw nejchachaemil wʉt,
¡xamalbej nejchachaemilde,
japi sʉapich!
Asew jiw now wʉt asaxliajwa,
¡xamalbej noem,
japi jiw sʉapich!
16 ¡Kaenejchaxoelaxde,
asew jiw sʉapich,
chiekal duilaliajwam!
Xamal nejchaxoelam wʉt,
¡nejchaxoelde:
“Xan kaes pachaeman.
Me-ama asew jiw kijila,
xan jachi-enil” —amde!
¡Nabej nejchaxoeleꞌbej:
“Xan kaes pejme matabijtax.
Me-ama asew jiw,
xan jachi-enil” —nabej aecheꞌ,
nejchaxoelam wʉt!
17 Asew jiw babijaxan is wʉt xamalliajwa,
¡xamallax nabej is babijax japi jiwliajwa wetawiasliajwam japox babijax!
¡Isfʉlde pachaempoxan puexa jiwliajwa!
18 ¡Ma ixajʉpamdoꞌ,
do japoxtat xamal isfʉlde chiekal duilaliajwam,
asew jiw sʉapich!
19 Takoew,
xamal nejxasinkaxpim,
asew jiw babijax is wʉt xamalliajwa,
¡xamal nabej is babijaxan japiliajwa!
Japoxliajwa nejchaxoelam wʉt,
¡nejchaxoelde:
“Asamatkoi japi Dios kastikaxaes,
babijax is xoti xanliajwa” —amde,
nejchaxoelam wʉt!
Japox Dios pejjamechan,
chajia lelspox,
jʉm-aech wʉt,
Dios jʉm-aech:
“Jiw babijaxan ispi asew jiwliajwa,
japi jiw xan tajut kastikaxaelen” —aech Dios,
jʉm-aech wʉt.
20 Dios pejjamechan,
chajia lelspox,
jʉm-aech wʉtbej,
Dios jʉm-aech:
“Nadaelman litaxaela wʉt,
¡chaxduꞌe naxaeyax!
O,
minsila wʉtbejpon,
¡chaxduꞌe mint!
Japoxan isam wʉt,
nadaelman pajut xabich padalaxael,
majt babijax is xoton xamalliajwa” —aech Dios,
jʉm-aech wʉt.
21 Asew jiw babijaxan is wʉt xamalliajwa,
¡boejtaliaꞌe!
¡Kamta nalalaximilbej babijax isasamatam japi jiwliajwa!
¡Isfʉlde pachaempoxan japi jiw babijaxan ispiliajwa xamalliajwa!
Ja-am wʉt,
pachaempoxan isaxtat malechaxaelam babijax.