Pakmolow asan poi nakmoejtpox
8
Jawʉt,
Jesús Olivonaechanmʉax poxade.
2 Kandiawa wʉt,
itliakafʉl wʉt,
Jesús kaxadin Dios pejtemploba poxadin.
Do xabich jiw mox soepa Jesúsxot.
Jesús ek wʉt,
tʉaduton jiw naewʉajnaliajwa.
Jesús perdona a mujer condenada (Juan 8.02-11)
3 Do jawʉt,
judíos chanaekabʉanapi,
fariseosbej,
bʉflaeni kaeow pakmolow Jesúsleldin.
Japow faens,
asan aton nakmoejt wʉt.
Japon aton japow pamla-el.
Do jawʉt,
notipow puexa jiw pejwʉajnalel,
Jesús wʉajnalelbej.
4 Japi jʉm-aech Jesúsliajwa:
—Jiw chanaekabʉanan,
ampow,
pakmolow,
faens,
asan aton bʉꞌmoejt wʉt.
5 Moisés chajia lelpox jʉm-aech:
‘Wathoꞌ,
jasox ispi,
iaꞌtat dadaepaxtat matkaejabaxaesi’ —aechox.
¿Achaxkat xam jʉmchiyaxaelam japoxliajwa?
—aechi Jesúsliajwa.
6 Jasoxtat japi xapaejt Jesús,
asax jʉm-aech wʉt tasalaliajwapi Jesús.
Pe Jesús natxatdik wʉt,
pejkothiyatat sat lelon.
7 Japi nakiowa japox kaeyax wʉajnachaemsfʉl.
Do jawʉt,
Jesús mat-et wʉt,
jʉm-aechon:
—Xamalxot kaen aton chinax babijax is-el wʉt,
¡japon aton iaꞌtat nej matxoeladaeppon japow!
—aech Jesús.
8 Do jawʉt,
Jesús pejme natxatdik pejkothiyatat sat lelaliajwa.
9 Japi jʉmtaen wʉt Jesús jʉm-aechpox,
kaenanʉla chijiasfʉllisi japowxot.
Kaes chiekal pakdiachowpi matxoela chijiasfʉl.
Do jawʉx,
wachakal chijiasfʉl pansiachowpi.
Do jawʉt,
tamach waelti japow,
Jesús sʉapich.
10 Jesús mat-et wʉt,
wʉajnachaemt wʉt,
jʉm-aechon japowliajwa:
—Pawis,
¿amxotkat xam jʉm-aechpi nejbʉꞌwʉajanpoxliajwa?
¿Japixotkat kaen xam daep-el iaꞌtat?
—aech Jesús japowliajwa.
11 Japow jʉmnot wʉt,
jʉm-aechow:
—Tajpaklon,
amxot japi jiw ajillisi —aechow.
Do jawʉt,
Jesús jʉm-aech japowliajwa:
—Xanbej toꞌaxinil xam kastikaliajwa nejbʉꞌwʉajanpoxliajwa.
¡Xabʉaꞌde nejmach!
¡Kaes nabej is babijaxan!
—aech Jesús japowliajwa.]
Jesús, me-ama itliakaxpox ampathatpijiwliajwa
12 Do jawʉx,
Jesús pejme naewʉajan wʉt,
jʉm-aechon jiwliajwa:
—Xan ampathatpijiw kajachawaetx japi matabijaliajwa Dios.
Samata,
xan,
me-ama itliakax jiwliajwa.
Xan nanaexasiti,
japi jiw kaes nej is-eleꞌ babijaxan.
Jasoxtat xan kajachawaesaxaelen jiw matabijaliajwa diachwʉajnakolaxpox,
japi chiekal duilaliajwa ampathatxot —aech Jesús jiwliajwa.
Jesús es la luz del mundo (Juan 8.12-30)
13 Do jawʉt,
fariseos jʉm-aechi Jesúsliajwa:
—Xam najut japox naksiyam.
Samata,
xanal matabija-enil,
xam diachwʉajnakolax paeyam wʉt —aech fariseos Jesúsliajwa.
14 Jesús jʉmnot wʉt,
jʉm-aechon fariseosliajwa:
—Xan tajut japox naksiyax wʉt,
diachwʉajnakolaxpox jʉm-an.
Xan tajut matabijtax amxot fʉlaenx.
Pejme japoxaxaelen.
Xamallax matabija-emil japox.
15 Xamal nijaxtat xanliajwa jʉm-am:
‘Japon nej kastikas,
is xoton babijaxan’ —am xamal xanliajwa,
chiekal matabija-emil wʉt.
Xanlax jasoxtat jʉmchi-enil jiw pejbʉꞌwʉajanpoxanliajwa.
16 Pe jʉm-an wʉt jiw pejbʉꞌwʉajanpoxanliajwa,
xan jʉmchiyaxaelen diachwʉajnakolaxtat.
Tajut japox jʉmchi-enil jiw pejbʉꞌwʉajanpoxanliajwa.
Natoꞌapon,
japon taj-ax,
nakajachawaesaxael,
xan jiw jʉmchiliajwan wʉt japi pejbʉꞌwʉajanpoxanliajwa.
17 Moisés chajia lelpox jʉm-aech xamal chiekal matabijaliajwam:
“Kolenje kaeyax chiekal jʉm-aech wʉt asan aton ispoxliajwa,
ja-aech wʉt,
japox diachwʉajnakolax” —aechox.
18 Xan tajut tajaxtat jʉm-an wʉt isxpoxanliajwa,
taj-ax,
japon xan natoꞌapon,
japonbej japox kaeyax jʉm-aech xan isxpoxanliajwa —aech Jesús fariseosliajwa.
19 Do jawʉt,
fariseos wʉajnachaemt wʉt,
jʉm-aechi Jesúsliajwa:
—¿Amxotkat nej-ax?
—aechi.
Jesús jʉmnot wʉt,
jʉm-aechon:
—Xamal xan namatabija-emil.
Matabija-emilbej taj-ax.
Xan namatabijaxaelam wʉt,
ja-am wʉt,
matabijaxaelambej taj-ax —aech Jesús fariseosliajwa.
20 Jesús japoxan jʉm-aech wʉt,
nukon ofrenda jiaxot,
Dios pejtemplobatat.
Pe Jesús jaels-esal paklochow,
jiw jebaxot jeliajwas,
pejmatkoi wepas-esal xotfʉkon.
Naexasis-eli Jesús pejwʉajan, japi pasaxilpox ma Jesús jaxotaxaelxot
21 Jesús pejme jʉm-aech judíosliajwa:
—Xan pejme nawiasaxaelen wʉt fʉlaenxot,
xamal nawʉlwekaxaelam.
Pe xamal tʉpaxaelam babijaxan isampoxantat Dios beltae-el wʉt.
Samata,
pasaximil xan jaxotaxaelenxot —aech Jesús judíosliajwa.
22 Do jawʉt,
judíos nakaewa najʉm-aech:
—¿Jesúskat pajut bej nakijsaxaelbej?
Samata,
jʉm-aechon japox:
‘Pasaximil xan jaxotaxaelenxot’ —aechon —aechi nakaewa.
23 Jesús pejme jʉm-aech:
—Xamal ampathatpijwamkal.
Xan ampathatpijna-enil.
Xan athʉpijnan.
24 Samata,
jʉm-an:
‘Xamal tʉpaxaelam babijaxan isampoxantat,
Dios beltae-el wʉt’ —an xan,
naexasis-emil xot,
xan jʉm-an wʉt tajutliajwa —aech Jesús.
25 Do jawʉt,
japi wʉajnachaemt wʉt,
jʉm-aechi:
—¿Achanamkat xam?
—aechi.
Jesús jʉmnot wʉt,
jʉm-aechon:
—Xan naewʉajnax wʉt,
chajia jʉm-an,
achanan xan.
26 Xan xabich xamal jʉmchiliajwan nejbʉꞌwʉajanpoxanliajwa.
Pe xan jʉmchiyaxinil.
Jʉmchiyaxaelenlax ampathatpijiwliajwa taj-ax Diosxot jʉmtaenxpoxankal.
Kaes pejme asaxan jʉmchiyaxinil.
Dios,
xan natoꞌapon,
jʉm-aech diachwʉajnakolax —aech Jesús judíosliajwa.
27 Japi jiw jʉmtaen Jesús jʉm-aechpox.
Pe japi jʉmmatabija-el,
Jesús jʉm-aechpox pax Diosliajwa.
28 Samata,
Jesús pejme jʉm-aech judíosliajwa:
—Xan,
puexa jiw pakoewkolnan,
asajiw cruztat nakematamatal wʉt,
jawʉt xamal chiekal matabijaxaelam xan diachwʉajnakolax Cristowanponan.
Matabijaxaelambej puexa xan isxpoxan,
japoxan tajut tajaxtat is-enil.
Xamalbej matabijaxaelam puexa xan jʉm-anpoxan,
japoxan jʉm-an,
taj-ax Dios nabʉxtoꞌapoxan.
29 Taj-ax,
xan natoꞌapon,
japon pomatkoicha xanxot.
Tamach nawaels-elon,
isfʉlax xot japon nejxasinkpoxan —aech Jesús judíosliajwa.
30 Japox Jesús jʉm-aech wʉt,
xabich jiw chiekal naexasiti japon Cristopon.
Japi jiw chiekal xanaboejabejpi Jesús.
Amxot jʉm-aechpox Dios paxiliajwa, Satanás paxiliajwabej
31 Jesús jʉm-aech asew judíosliajwa,
japi cha-aex naexasiti japon Cristopon:
—Naexasisfʉlam wʉt xan naewʉajnaxpox,
ja-am wʉt,
diachwʉajnakolax tajnachalwaxaelam.
Jesús se enfrenta a falsos discípulos (Juan 8.31-59)
32 Xamal chiekal matabijam wʉt diachwʉajnakolaxpox,
xan jʉm-anpox,
ja-am wʉt,
xamal kaes esclavosximil —aech Jesús judíosliajwa.
33 Judíos japox jʉmtaen wʉt,
jʉm-aechi Jesúsliajwa:
—Xanal Abraham pamojiwan.
Chinax xanal esclavos-enil.
¿Ma-aech xotkat xanal najʉm-am:
‘Xamal kaes esclavosximil’ —na-amkat xanalliajwa?
—aech judíos Jesúsliajwa.
34 Jesús jʉmnot wʉt,
jʉm-aechon japi judíosliajwa:
—Diachwʉajnakolax xan jʉm-an.
Puexa jiw,
babijaxan ispi,
japi jiw,
me-ama esclavos wʉt,
ja-aechi,
kofa-el xoti babijaxan ispoxan.
35 Esclavo-aton pomatkoicha dukaxil paklon pejbatat,
japon paklon paxʉlna-el xot.
Paklon paxʉlanlax dukaxael pomatkoicha pax pejbatat,
japon paklon paxʉlan xot.
36 Samata,
xan Dios paxʉlnan jiw bʉꞌweyaxaelen,
japi xan nanaexasit wʉt.
Beltaeyaxaelenbej japi babijaxan ispoxanliajwa.
Ja-aech wʉt,
japi diachwʉajnakolax bʉꞌwʉajanjilaxael babijaxan ispoxanliajwa.
37 Xan matabijtax diachwʉajnakolax xamal Abraham pamojiwam.
Pe xamal nejchaxoelam xan naboesaliajwam,
naexasis-emil xot tajnaewʉajnax.
38 Xan jʉm-ansfʉlax taj-ax na-itpaeipoxan.
Pelax xamal isfʉlam nej-ax tatoꞌalpoxan —aech Jesús judíosliajwa.
39 Do jawʉt,
japi judíos jʉm-aech Jesúsliajwa:
—Xanal Abraham pamojiwan.
Japon,
me-ama taj-ax xanalliajwa —aech judíos.
Jesús pejme jʉmnot wʉt,
jʉm-aechon judíosliajwa:
—Diachwʉajnakolax xamal Abraham pamojiwam wʉt,
xamal isaxaelam pachaempoxan Diosliajwa.
Me-ama nej-am Abraham chajiakolaxtat is Dios nejxasinkpoxan,
xamalbej jachiyaxaelam.
40 Xan jʉm-an diachwʉajnakolaxpox xamalliajwa,
Dios na-itpaeipox.
Pe nakiowa,
xamal nejchaxoelam xan naboesaliajwam.
¡Wajwʉajnapijin Abraham chinax jasox nejchaxoela-el,
xamal nejchaxoelampox!
41 Xamalbej isam,
me-ama nej-ax is —aech Jesús judíosliajwa.
Jawʉt judíos jʉm-aech Jesúsliajwa:
—Xanal pafliachxiya-enil.
Xanal kaen taj-ax.
Japon Dios.
Diachwʉajnakolax xanal Dios paxin —aech judíos.
42 Jesús jʉmnot wʉt,
jʉm-aechon judíosliajwa:
—Diachwʉajnakolax Dios nej-ax wʉt,
xan nanejxasinkaxaelam,
xan fʉloekx xot Diosxotsik.
Amwʉtjel xamalxotx,
Dios natoꞌa xot.
Tajut tajaxtat fʉlae-enil.
43 ¿Ma-aech xotkat tampoel tajjamechan xamal jʉmmatabijaliajwam?
Tampoel tajnaewʉajnaxan,
nejxasinka-emil xot chiekal nanaewesliajwam.
44 Pe xamal nej-axpon,
japon Satanás.
Japon pejjiwambej.
Isasiam nej-ax nejxasinkpoxan.
Akaseskolaxtat Satanás bapon jiw.
Amwʉtjel nakiowa ja-aechfʉlon.
Nejxasinka-elbejpon diachwʉajnakolaxpox.
Jʉmchi-elbejpon diachwʉajnakolaxpox.
Japon jʉm-aech wʉt,
jʉm-aechon naekichachajbaliajwa,
naekichachajbapijin xot.
Satanáslap matxoelanaekichachajbapijin.
45 Pelax xan jʉm-an xot diachwʉajnakolaxpox,
xamal xan nanaexasis-emil.
46 Xamalxot,
¿achankat nataen xan tajbʉꞌwʉajanpox?
Xan jʉm-an wʉtlax diachwʉajnakolaxpox,
¿ma-aech xotkat xamal xan nanaexasis-emil?
47 Dios pejjiwpi,
japi jiw chiekal naewet Dios pejjamechan naexasisliajwa.
Pe xamal Dios pejjiwa-emil xot,
nejxasinka-emil naewesliajwam Dios pejjamechan —aech Jesús.
Abraham wʉajna Cristo dukpox
48 Do jawʉt,
judíos jʉm-aech Jesúsliajwa:
—Xanal jʉm-an wʉt xamliajwa:
‘Xam Samaria tʉajnʉpijnam.
Xambej nejmatpʉatat dep webaponam’ —an wʉt,
diachwʉajnakolax xanal jʉm-an —aech judíos Jesúsliajwa.
49 Do jawʉt,
Jesús jʉmnot wʉt,
jʉm-aechon judíosliajwa:
—Xan tajmatpʉatat dep chiekal ajil.
Xan sitaenx taj-ax Dios.
Pe xamallax xan nasitae-emil.
50 Xan wʉlweka-enil sitaeyax tajutliajwa.
Pelax taj-ax,
Dios,
nejxasink jiw xan nasitaeliajwa.
Dios jʉmchiyaxaelbej pachaempoxan xanliajwa.
51 Diachwʉajnakolax xan jʉm-an.
Xan jʉm-anpoxan naexasiti,
japi tʉpaxil —aech Jesús.
52 Judíos japox jʉmtaen wʉt,
jʉm-aechi:
—Amwʉtjel xanal chiekal matabijax,
diachwʉajnakolax xam nejmatpʉatat dep weba.
Abraham,
asew Dios pejprofetaspibej,
puexa japi chajia tʉp.
Xamlax jʉm-am:
‘Xan jʉm-anpoxan naexasiti,
japi tʉpaxil’ —am xam.
53 ¿Xamkat kaes pejme paklonam?
¿Me-ama wajwʉajnapijin Abraham,
jachi-emilkat xam?
Japonbej chajia tʉp.
Puexa Dios pejprofetaspi,
japibej chajia tʉp.
Xam najutliajwa nejchaxoelam wʉt,
¿achanamponam xam?
—aech judíos Jesúsliajwa.
54 Jesús jʉmnot wʉt,
jʉm-aechon:
—Xan tajutliajwa jʉm-an wʉt pachaempox,
japox xanliajwa pachaemaxil.
Pe taj-ax pajut xan nasitaen.
Japonliajwa xamal najut jʉm-am:
‘Japon tajDios’ —am xamal.
Pebej japon xan taj-ax.
55 Pe xamal matabija-emil Dios.
Xanlax chiekal matabijtax Dios.
Xan jʉm-an wʉt:
“Xan matabijs-enil Dios” —an wʉt,
ja-an wʉt,
xan naekichachajbaxaelen xamal.
Me-ama xamal,
jachiyaxaelen.
Diachwʉajnakolax xan chiekal matabijtax taj-ax Dios.
Japon pejjamechan chiekal naexasisfʉlaxbej.
56 Abraham,
nejwʉajnapijin,
nejchachaemil,
matabijt wʉton xan fʉlaeyaxaelenpox ampathatasik.
Amwʉtjel,
nataekon.
Samata,
Abraham xabich nejchachaemil xanliajwa —aech Jesús.
57 Do jawʉt,
judíos jʉm-aechi Jesúsliajwa:
—Xamfʉk patiꞌna-emil.
Xambejfʉk pas-emil cincuenta waechan jʉmchiliajwam:
‘Xan taenx Abraham’ —chiliajwam —aech judíos Jesúsliajwa.
58 Jesús jʉmnot wʉt,
jʉm-aechon:
—Diachwʉajnakolax xan jʉm-an.
Xan Abraham wʉajna chajia dukx —aech Jesús.
59 Do jawʉt,
judíos iaꞌ not dadaepliajwapi Jesús.
Pe faena-eli,
Jesús namoest xot jiwtat.
Do jawʉx,
nakoltlison Dios pejtemplobaxot.